سیاسەت و كۆرۆنا و لەنگە!

0
873

كاروان محەمەد سینو

ئۆپۆزیسیۆن و جیاوازی بیروڕا و دیدی جیاواز و…هتد، لەنێو هەموو كۆمەڵگایەكی مرۆڤدا بوونی هەیە، ( تەشبیهـ نەبێ) دەتوانم بڵێم لە نێو كۆمەڵگای ئاژەڵانیشدا جیاوازی لە رەفتار و هەڵسوكەوت هەیە، بۆ نموونە هەموومان لە پرۆگرامەكانی ناشناڵ جیۆگرافیكدا دیومانە لەكاتی هەڕەشە و قەیراندا یاخود لە كاتی ئاساییدا مێگەڵیك دەبێتە دوو پارچە یاخود سێ پارچە و هەر پارچەیەك بە لایێكدا دەڕوات… بەهەرحاڵ، لێرەدا مەبەستم ئەوەیە بڵێم كە جیوازای لە دید و بۆچوون و بیروڕا لە نێو گیانداراندا (بەمرۆڤیشەوە) شتێكی ئاساییە و بوونی هەیە، بەڵام پەیوەست بە مژاری جیاوازی بیروڕا، ئەوەی كۆمەڵگای مرۆڤ لە كۆمەڵ مێگەلی ئاژەڵان جودا دەكاتەوە بریتییە لە بوونی عەقڵ و هۆش و مەنتق و لۆژیك و لێكۆڵینەوە و بەراورد كردن لە نێو كۆمەڵگای مرۆڤدا، بەڵام ئەم خەسڵەت و خاسیەتانە لە نێو كۆمەڵگای ئاژەڵاندا بوونیان نییە. بۆیە ئۆپۆزیسیۆن و جیاوازی بیروڕا و دید و بۆچوونی ئاژەڵان هەردەم بێ لێكدانەوە و بەراورد و بنەما و نالۆجیكە بۆیە هەردەم بەرەو هەڵدێرە. ئەم چەند دێرەی سەرەوە بریتین لە جیاوازی لە بڕیار و كردار و بیروبۆچوونی نێوان مرۆڤ و ئاژەڵ بەشێوەیەكی گشتی دوور لە تیرو و توانج لە هیچ كەس و دەستەو لایەنێك.
لەئەزەلەوە.. هەر لەوكاتەی كە دوو مرۆڤ بەیەكەوە ژیاون جیاوازی لە بیروڕا دروست بووە (ئەمە شتێكی سروشتییە و شاراوە نییەوە) لە ژیانی سیاسی كۆمەڵگای مرۆڤایەتیدا بوونی جیاوازی بیرورا و دەستە و گروپی ئۆپۆزیسیۆن شتێكی ئاساییە، بەڵام لێرەدا دەتوانین دەستە و گروپەكانی ئۆپۆزیسیۆن پولین بكەین بۆ دوو گروپی سەرەكی، ئەویش ئۆپۆزیسیۆنی بونیاد نەر (نیشتیمان پەروەر) و ئۆپۆزیسیۆنی روخێنەر (ئەنارشی – فەوزەوی) خۆپەرست. بەكورتی ئۆپۆزیسیۆنی بونیادنەر و نیشتیمان پەروەر ئەو ئۆپۆزیسیۆنەیە كە بە بیرو بۆچوونەكانی كۆمەڵگا و وڵات بونیاد دەنێت و حكوومەت و دەسەڵات رووەو ئایندەیەكی تەندروست و چاكساز ئاراستە دەكات. بەڵام ئۆپۆزیسیۆنی رووخێنەر (ئەنارشتی – فەوزەوی) ئەو ئۆپۆزیسیۆنەیە كە لە پێناو دەسكەوت و بەرژەوەندی سیاسی و ئابووری بەرتەسكی خۆی، كۆمەڵگاو وڵات لێك دەترازێنێت و كۆسپ و تەگەرە و لەمپەر دەخاتەبەردەم حكوومەت و دەسەڵات و تۆمەت و بوختانیان بۆ دروست دەكات و سیستم و حكوومەت و دەسەڵات و كۆمەڵگا بەرەو ڕق و كینە و ناتەبایی و ئایندەیەكی ناهەموار و نادیار ئاراستە دەكات.
لە ئەمڕۆی كوردستاندا كە پەتای كۆرۆنا و گوشاری ئابووری و سیاسی بەغدا و ئەجیندای تێكدەرانە لەودیوی سنوورەوە بەرۆكی كوردستانیان گرتووە، دەبینین و دەبیستین كە لێرە و لەوێ لە لایەن هەندێك لایەن و گڕوپ و دەستە؟! دەنگی ناشاز و بیرۆكەی روخێنەر لەناو كۆمەڵگای كوردستاندا بەرزدەكەنەوە و موزایەدەی پێوەدەكەن و كۆمەڵگای كوردستان چەواشە دەكەن و رووەو ئایندەیەكی ناتەندروست و نادیار ئاراستەدەكەن، كە بەزیانی هەمووخەڵكی كوردستان تەواو دەبێت.
ساڵی 2018 كاتێك بازاڕی لەنگەی شاری هەولێر سووتا، زۆر چاك لەبیرمە و هەمووخەڵكی كوردستانیش لە بیریانە، هەرلەكاتی رووداوەكە و بەرلەوەی ئاگرەكە بكوژێتەوە، هەندێك لایەن و گڕوپ و دەستە لە میدیا و ماڵپەڕ و تۆڕەكۆمەڵایەتییەكانی خۆیاندا ڕایانگەیاند كە حكوومەت خۆی لەنگەیان سووتاندووە (بۆ ئەوەی دوكاندارەكان دەركەن و عەرزەكەی بفرۆشن) و چەندین پڕۆپاگەندەی دیكەی پڕوپوچیان بڵاو كردەوە و خەڵكیان چەواشەكرد، بەڵام پاش ئەوەی لە رێگەی كامێراكانی چاودێری راستییەكە رووداوەكە بەدیار كەوت و لەماوەیەكی كورتدا حكوومەتی هەرێمی كوردستان لەسەر ئەركی خۆی بازاری لەنگەی بە شێوەیەكی سەردەمیانە و باشتر لە جاران بەپارەیەكی زۆر بونیادی كردەوە، تەنها رووڕەشی و شەرمزاری بۆ ئەو دەستەو گروپ و لایەنانە (ئەنارشستیانە) مایەوە…
ئێستاش بۆ نموونە موزایەدە بە مووچە و قوتی خەڵكی كوردستانەوە دەكرێ و خەڵك رووەو ناسەقامگیری و نائارامی و ناڕەزایی دژی حكوومەتی كوردستان ئاراستەدەكەن، لەكاتێكدا مووچە و بودجە لە بەغداوە دەنێردرێ و بەغدا بۆ گوشار و دەسكەوتی سیاسی لەسەر حیسابی مافە دەستورییەكانی خەڵكی كوردستان هەرجارەو بە بیانە و بالوورێك دەست دەخانە سەر مووچە و بوودجەی هەرێمی كوردستن، كەچی هیچێك لەو دەستەو گروپ و لایەنانە تاكو ئێستاش هیچ گلەیی و گازندە و باس و ناڕەزایینان لە بەغدا نەكردووە و نایكەن؟!.


ئەمڕۆ پەتای كۆرۆنا بەرۆكی هەموو جیهانی گرتووە و قەیرانی دارای و ئابووری زۆرگەورەی بەدوای خۆیدا هێناوە و بەهەمانشێوە بەرۆكی كوردستانیشی گرتووە. لەسێ مانگی رابردوودا (بەسوپاسەوە) حكوومەتی هەرێمی كوردستان بەهەموو تواناكانییەوە لایەنە پەیوەنددارەكانی خۆی خستەگەڕ و زۆر سەركەوتووانە بەرۆكی كۆرۆنایان گرت تا ئەوكاتەی كە چیدی تووشبوونی كۆرۆنا لەسەرانسەری كوردستاندا تۆمار نەدەكرا. لەو ماوەیشدا هەمان ئەو لایەن و گڕوپ و دەستە(ئەنارشستیانە) لە میدیا و ماڵپەڕ و تۆڕەكۆمەڵایەتییەكانی خۆیاندا دیسانەوە كەوتنەوە (سیاسەتی لەنگە) و خەڵكیان دژی میكانزم و رێكارەكانی حكوومەت و رێنماییەكانی خۆپارساتن دژی كۆرۆنا هاندا و مووچەی فەرمانبەر و مامۆستا و دكۆرەكانیان كردبووە (قەمیسی عوسمان) بۆ ئەوەی خواست و مەرامی سیاسی خۆیان پێ ڕەواج بكەن و موزایەدەی پێ بكەن، تا ئەو ڕادەیەی كە كۆمەڵێك خەڵكیان بەوە قەناعەت پێكرد كە(كۆرۆنا فشەیە و نییە و ئەگەر هەشبێ كۆرۆنای كوردستان وەكو هی وڵاتانی دیكە نییە و سووكە و كاریگەر نییە و كەس ناكوژێت و حكوومەت نایەوێ مووچە بدات بۆیە قەدەغەی هاتوچۆی سەپاندووە….هتد). ئای لەم سیناریۆیە دیماگۆگیانەیە و لەم رەفتارە ئەنارشتیانە كە ئەو دەستەو گروپ و لایەنانە پەیڕەوی دەكەن، لەكاتێكدا كەتەنها لە رۆژێكدا لە شاری سلێمانی خۆشەویست (101)حاڵەتی تووشبوون بەڤایرۆسی كۆرۆنا تۆمار كراوە، ئایا ئێستاكە ئەو لایەن و گڕوپە (ئەنارشستیانە) چی بە رووی رەشی خۆیان دەڵین؟!، وەڵامیان بۆ خەڵكی كوردستان چییە؟!، لەپای چی و لەبەرژەوەندی كێ ئەوان (سیاستی لەنگە و كۆرۆنا) و چەواشەكاری پەیڕەو دەكەن بۆ لێكترازاندنی كۆمەڵگای كوردستان و ئاراستەكردنی بەرەو هەڵدێر و ئایندەیەكی نادیار؟!!.

زیاتر

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابه‌تی تر

سه‌رۆكی هه‌رێم سه‌ره‌خۆشى له‌ خانه‌واده‌ى غه‌یدا كه‌مبه‌ش ده‌كات

له‌ پرسه‌نامه‌یه‌كدا نێچیرڤان بارزانی، سه‌رۆكی هه‌رێمی كوردستان سه‌ره‌خۆشی له‌ خانه‌واده‌ی…