44ساڵیادی شۆڕشی گوڵان … شۆڕشی گوڵان گڕی ژیلەمۆی گڕكانی شۆڕشی مەزنی ئەیلوول بوو

0
804

كاروان محەمەد سینۆ

زۆرێك لە دوژمن و داگیركەرانی كوردستان و ناحەزانی پارتی و بارزانی، خەون و هیوای گڵاوی خۆیان لەسەر گرەوی نسكۆ و لەناوچوونی شۆڕی 11ی ئەیلوول دانابوو. ئەگەرچی پاش رێكەوتنە شوومەكەی (جەزائیر 1975) و خیانەتی وڵاتانی كە خۆیان بە هاوڕێی كورد دەزانی؟!، بۆ چەند مانگێك، شۆڕشی ئەیلوول دووچاری وەستانێكی كاتی چالاكی سەربازی ببوو، بەڵام شۆڕشی مەزنی ئەیلوولی پیرۆز لەرووی سیاسی و پاڵپشتی كادیر وپێشمەرگە و جەماوەری خەڵكی كوردستان هەر بە هەمان گوڕ و تین لەنێو ناخی خەڵكی كوردستان و كادیرانی پارتی لە جۆشدا مابوو، لەبەر ئەوەی جەنابی مەلامستەفا بارزانی هەر لەسەرەتاوە پێشمەرگە و خەڵكی كوردستان و كاك ئیدریس و مسعود بارزانی وا راهێنابوو و شیرەت و ئامۆژگاری كردبوون كە (لەشكست نائومێد نەبن و لە سەركەوتن مەغروور نەبن). لەسەر ئەم بنەمایە و زەروورەتی بەردەوامی دانی شۆڕشی 11ی ئەیلوول و سووربوونی بارزانی نەمر لەسەر بەدەستهێنانی مافی گەلی كورد،بۆیە هەر پاش چەند مانگێك لە رێكەوتنە شوومەكەی (جەزائیر 1975) كاتێك خەڵك و خێزانی پێشمەرگەكانی ئەیلوول بە ئاوارەیی لە ئیراندا گیرسانەوە، دەست بەجێ لە مانگی تشرینی دووەمی 1975 بارزانی نەمر فەرمانی بە كاك ئیدریسی جوانەمەرگ و جەنابی سەرۆك مسعود بارزانی كرد، كە بەزووترن كات دەستبكەنەوە بە رێكخستنەوەی پێشمەرگەی ئەیلوول و كادیر و جەماوەری پارتی ئەوانەی كە ئاوارەی ئیران بوونە، هەڵبەت ئەم ئەركەی كە جەنابی مەلامستەفا بارزانی بە شهید ئیدریس بارزان و كاك مسعود بارزانی راسپارد،خاڵی نەبوو لە كۆسپ و تەگەرە و كێشە، چونكە دامودەزگا سیخوڕی و هەواڵگرییە داپلۆسێنەرەكانی ئەوكاتی ئیران (ساواك) جمووجووڵ و چالاكییەكانی ئیدریس و مسعودبارزانییان خستەبەر چاودێری و راوەدوونان (جارجاریش هەڕەكردن). بەڵام لێهاتووی و شارەزایی و پسۆری ئەم دووسەركردە (كاك ئیدرس و مسعود بارزانی) قوتابیانی رێبازی بارزانی لەكاروباری رێكخستن و شۆڕش گێریدا، ئەگەری سەركەوتنی ئەم دوو سەركردە گەنجەبوو لە رێكخستنەوەی جەماوەر و كادیر و پێشمەرگەكانی شۆڕشی ئەیلوول لەنێو ئاوارەكانی شۆڕش لە ئیران و رێكخستنەوە و جۆشدانی جەماوەری ناوخۆی باشووری كوردستان بەرەو قۆناغێكی دیكەی شۆڕش بە شێوازێكی (پارتیزانی) كە دواتر ناونرا بە شۆڕشی 26ی گوڵان.


هەروەها پاش رێكەوتنی (جەزائیر 1975) و گیرسانەوەی ئاوارەكانی شۆڕشی ئەیلوول لە ئیران، جەنابی مەلامستەفا بارزانی بڕیاریدا بە دامەزراندنی سەركردایەتی كاتی شۆڕش و لە 10ـی كانوونی یەكەم 1975 بەیاننامەی دامەزراندنی سەركردایەتی بە دەستخەت و نوسین و ئیمزای سەرۆك مسعود بارزانی لە چوار لاپەڕەدا بەزمانی عەرەبی بڵاوكرایەوە كە بەم سەردێڕە دەستی پێكردووە: ” كردستان ساحة حقیقیة للنضال، یاجماهیرنا ناضلی و ارفعی واقع النكسة”. واتا (كوردستان گۆڕەپانی راستەقینەی خەباتە، ئەی جەماوەر خەبات بكەن و واقعی نسكۆ هەڵدێرن). لەم بەیانامەیدا، سەرۆك مسعود بارزانی ڕاشكاوانە واقعی ئەوكاتی شۆڕشی ئەیلوول و ئەگەر و پێشهاتەكانی شلۆڤە كردووە و كەمووكوڕییەكانی ئەوكاتی خستووتەروو و پێشمەرگە و كادیر و جەماوەری خەڵكی كوردستانی هاندا بۆ گڕدانەوەی شۆڕش و خەبات و وەلانانی ئەو واقیعە تاڵەی (نسكۆ) كە بەسەر شۆڕشی ئەیلوولدا سەپێنراوە. هەرلە هەمان بەیاننامەدا پارتی بڕیاری دامەزراندنی سەركردایەتی كاتی شۆڕش راگەیاند.
ئینجا فەرمان بە پێشمەرگە و مەفرەزكانی شۆڕی ئەیلوول كرا (ئەوانەی كەپاش (رێكەوتنی جەزائیر) هەر لە نێو باشوری كوردستاندامابوونەوە و نەچووبوونە نێو خاكی ئیران و توركیا) كە خۆیان و جەماوەری دەڤەرەكانیان رێكبخەنەوە و قۆناغێكی دیكەی شۆڕش (بەشێوەی پارتیزانی) گڕبدەنەوە. بەم شێوەیە دەمودەست كادیر و پێشمەرگەكانی پارتی دیموكراتی كوردستان دەستیانكردەوە بە خۆرێكخستن و كاروچالاكی پێشمەرگایەتی. بۆ نموونە لە 3ـی3ـ1976 لە دەڤەری بادینان، جەوهەر نامق و كەریم شنگاری و زەعیم عەلی و مەحمود ئێزدی و چەندین كادیری دیكەی پارتی كۆبوونەوە و فەرمان و رێنماییەكانی جەنابی مەلامستەفا بارزانییان لە رووی رێكخستن و پارتیزانییەوە خستە واری جێ بەجێ كردن و دەستكرا بەچالاكی پارتیزانی. هەروەها لە سۆران و گەرمیان بەهەمان شێوە، فەرمان بە كادیرە پێشكەوتووەكانی پارتی كرا بۆ جۆشدانەوەی گڕی شۆڕش چالاكی پێشمەرگایەت لە سەرانسەری باشوری كوردستان.
هەروەها لە دەڤەری گەرمیان… لە سەرەتای مانگی ئایاری 1976 دكتۆر كەمال كەركووكی لە گوندی (بێكڵۆ) دەستی بە رێكخستن و كۆكردنەوەی كادیرانی پارتی كرد، دواتر لە گوندی (خوڕخوڕە و یاخیان و شارستێن) ئینجا لە بناری پشدەر و بناری ئاسۆس و مەرگە و دۆڵی جافایەتی و سنووری ناحیەی سوورداش و گوندەكانی شارباژێڕ و ناحیەی ماوات و….هتد.
لەلایەكی دیكەوە… لە شەوی 52/26ـی ئایار (گوڵان) 1976 لە دەڤەری حاجی ئۆمەران سنووری (بەردوناز) مەفرەزەیەكی پێشمەرگەكانی پارتی و بارزانی كە پێكهاتبوو لە (24)پێشمەرگە بەسەرپەرشتی (سەید عەبدوڵڵا حاجی ئۆمەرانی)، بە پلانێكی توكمە و رێكخراوی پێشوەختە، هێرشیان كردە سەر بارەگایەكی سوپای عێراق لە (گردی سەڵەوات)، بەداخەوە لەو شەڕەدا (سەید عەبدوڵڵا حاجی ئۆمەرانی) شەهید بوو و دوو لە هەڤاڵانی بریندار بوون. بەم شێوەیە و پاش ئەم هێڕەشە بەجەرگەی پێشمەرگەكانی پارتی و بارزانی و شەهیدبوونی یەكەم پێشمەرگەی پارتی پاش شۆڕشی11ی ئەیلوول و لەبەر مەزنی ئەم رووداوە لەو كاتەناسكەدا، بۆیە قۆناغی دووەمی پارتیزانی شۆڕشی 11ی ئەیلوول ناونرا بە (شۆڕشی 26ـ گوڵان) و شەهید( سەید عەبدوڵڵا حاجی ئۆمەرانی) بە یەكەم شەهیدی ئەم شۆڕشە نازناوكرا. دیارە كاتێك لەو بەروارەدا مەفرەزەیەكی رێكخراوی پێشمەرگەی پارتی كەلە(24)پێشمەرگە پێك هاتبێ و هێرش بكەنە سەر مۆڵگەیەكی سوپای عێراق و دوژمن بكوژن و شەهید بكەنە قوربانی كوردستان، بێگومان ئەم ئەرك و هەڵمەتەی پێشمەرگە پێشووتر رێكخراوە و پلانی بۆ داڕێژراوە و پێشمەرگەی بۆ ئامادە كراوە و فەرمانی شۆڕشی پێدراوە. بۆیە بێ گومان شۆڕشی 26ـی گوڵان بەردەوامی پێدەری شۆڕشی مەزنی ئەیلوول بووە كە رابەری مەزنی كورد مەلا مستەفا بارزانی رابەرایەتی كردووە.
هەروەها شۆڕشی 26 گوڵان تومارگەی چەندین شەڕ و داستان و قارەمانێتی بووە كە بۆ دۆست و دوژمنانیان سەلماند ” ئەگەر لە قۆناغێكدا، خەباتی گەلی كوردستان تووشی وەستان و نسكۆ هاتبێت، بەڵام ئیرادەی تێكۆشان و خەباتی گەلی كوردستان هیچ كات نەشكاوە و بە هەناسە و تینێكی تازە بەردەوام دەبێت بۆ گەیشتن بە ئازادی… (مسعود بارزانی)”.
زۆرن ئەو داستان و قارەمانێتیانەی كە شۆڕی 26ی گۆڵان تۆماری كردوون، وەكو (داستانی دێرەلوك ، كانی ماسێ ، مانگێشك ، مێرگەسور ، خواكورك و چەندین داستانی دیكە كە تێیدا چەندی پێشمەرگە گیانی خۆیان كردە قوربانی ئازادی و سەرفەرازی كورد و كوردستان.
ئەمڕۆلە 44ساڵیادی شۆڕشی 26ی گوڵان، سڵاو لە گیانی پاكی رابەری كورد مەلامستەفای بارزانی و كاكە ئیدریسی هەمیشە زیندوو، سڵاو لە خەبات و ماندوو نەناسی جەنابی سەرۆك مسعود بارزان پێشمەرگەی هەردوو شۆڕشی ئەیلوول و گوڵان و پێشمەرگە و مەرجەعی ئەمڕۆی كوردستان، سڵاو لە گیانی شەهید (سەید عەبدوڵڵا حاجی ئۆمەرانی) یەكەم شەهیدی شۆڕشی گوڵان و سڵاو لە هەموو شەهیدانی كوردستان و رێبازی بارزانی.

زیاتر

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابه‌تی تر

سەرۆکی حکومەتی هەرێمی کوردستان پێشوازی لە وەزیری گەیاندنی عێراق دەکات

ئەمڕۆ پێنجشەممە 2020/7/2 مەسرور بارزانی سەرۆکی حکومەتی هەرێمی کوردستان پێشوازی لە ئەندازیا…