58 ساڵیادی بوونی سەرۆك مسعود بارزانی بە پێشمەرگە

0
684

سەرۆك مسعود بازانی پێشمەرگەو ئومێدی هەموو خەڵكی كوردستانە

كاروان محەمەد سینۆ

ئەمڕۆ یادی58 ساڵەی خەباتی پێشمەرگەیەك دەكەینەوە كە هەموو تەمەنی قوربانی و تێكۆشان بووە لەپێناو خاك و خەڵكی كوردستان، ئەوەیش سەرۆك مسعود بارزانییە كە ئومێد هەموو خەڵكی كوردستانە بە هەموو نەتەوە و ئاین و ئاینزاكانەوە. لە سەردەمی كۆماری كوردستان لە مەهاباد كە یەكەم كیانی سەربەخۆی كورد بووە، مەسعود مەلا مستەفا بارزانی لە (16/8/1946) لە شاری مەهاباد لە رۆژهەڵاتی كوردستان، لە ژێر سێبەری ئاڵای پرۆزی كوردستان و لە رۆژی دامەزراندنی پارتی دیموكراتی كوردستان لە دایك بووە. جەنابی سەرۆك بارزانی لە تەمەنی خۆیدا لە پێناوی سەربەخۆیی كوردستان رووبەرووی گەلێك هەوراز و نشێوی پێشمەرگایەتی و سیاسی و عەسكەری بووە، رووبەرووی زۆرێك لە بارودۆخی شەڕ و ئاشتی و پیلان و گەلەكۆمی بووە… كە ئەستەمە لەم چەند دێرەدا بتوانین تەنانەت سەردێرەكانیش دیاری بكەین. تەنانەت لە ئەمڕۆی كوردستان ئەوا دیسانەوە چەند كاڵ فام و هەرزەكاری سیاسی و خۆپەرست لە پێناوی بەرژەوەندی بەرتەسكی خودی خۆیان لە چوارچێوەی ئەجندایەكی دەرەكی دژ بە هەبوونی كیانی سیاسی هەرێمی كوردستان، بانگەشی دووئیدارەیی و لێكترازانی ئیداری و دارایی و جوگرافی هەرێمی كوردستان دەكەن و لەوەنەگەیشتوون كە لاوازی و نەمانی كووردستان وەكو هەرێمێكی فیدڕاڵی لە عێراق لاوازی و نەمانی ئەوانە.
سەرەرای هەوراز و نشێوەكان، سەرەرای بەربەست و ئاستەنگەكان، سەرەرای خیانەت و پلانەكان، بەڵام لەوەتەی دەستی تفەنگی گرتووە تاكۆ ئەمڕۆ جەنابی سەرۆك مسعود بارزانی وەكو بەرزترین كێوی كوردستان سەر بەرز و سەرفەراز بووە بەرامبەر گەل و وڵاتەكەی خۆی و بەرامبەر بزاڤی رزگاری خوازی كوردستان، ئەڕۆش خەڵكی كوردستان و هەمووجیهان مەسعود بارزانی وەكو سەركردەیەكی بەئەزموون و كاریزمادار و رابەر و ڤەگەری نیشتمانی تەماشادەكرێ، بۆیە ئەمڕۆ ئێمەش بە شانازییەوە 58ساڵیادی بەپێشمەرگەبوونی جەنابی سەرۆك مسعود بارزانی دەكەین و هیوای تەمەندرێژی و سەركەوتن و سەرفرازی بۆ دەكەین.

مسعود مستەفا بارزانی لە 20ـی ئایاری 1962 بۆتە پێشمەرگە

پاش گەلەكۆمی و لە خاچدانی كۆماری كوردستان لە مەهاباد لەساڵی (1947)، بنەماڵە سەربەرزەكەی جەنابی سەرۆك مسعود بارزانی لەگەل پێشمەرگە و ماڵەكانیان كە گوشارێكی زۆری (ئیران و عێراق) لەسەر یان بوو، ناچار بوون بگەڕێنەوە باشووری كوردستان و سەرەرای بوونی لێبوردنی فەرمی لەلایەن رژێمی عێراق بەڵام هەموو بارزانییەكان دوورخرانەوە بۆ شارەكانی خوارووی عێراق، بە تایبەتی (بەغدا و بەسرە)، بەڵام مەلا مستەفا بارزانی باوكی مەسعود بارزانی ڕێبەری شۆرش و بەخودانی كورد، خۆی و ژمارەیێك پێشمەرگەی بەشداربوو لە پارێزگاری كردنی كۆماری كوردستان كە هەرلەسەرەتاوە خۆیا بەدەست هیچ دەسەڵاتێكەوە نەدابوو ، بەو واقیعە رازینەبوو ئەگەرچی رژێمی عێراق چەندین گفت و پەیمان و دەسكەوتیان بۆ خودی بارزانی خستەروو، بەڵام جەنابی بارزانی بەرژەوەندی كەسی خۆی و بنەماڵەكەی وەلانا و لەپێناو بەردەوامی بزوتنەوەی رزگاری خوازی كورد و بەردەوامی شۆڕشی كورد، مەلامستەفا بارزانی رابەرایەتی زیاتر لە (500) لە هەڤاڵانی كرد و بەرەو یەكێتی سۆڤیەت بەڕێكەوتن و تا ساڵی (1958) وەكو پەنابەر خەباتكاری سیاسی لەوێ مانەوە.
سەرۆك مسعود بارزانی لەبەر ئەگەری سیاسی و پەیوەندی كردنی بە شۆڕشی ئەیلول، خوێندنی ناوەندی تەواو نەكرد و بەغدای بەجێهێشت. لە تەمەنی (16) ساڵی واتا لە ساڵی (1962) چەكی هەڵگرتووە و چووە نێو ریزی پێشمەرگەی كوردستان و رۆڵێكی بەرچاوی هەبووە لە شۆڕشی ئەیلوول كە لە یانزدەی ئەیلولی (1961) بە رابەرایەتی مەلا مستەفای بارزانی بەرپا ببوو. هەر لە تەمەنی لاوێتیدا هزری كوردایەتی دەچیتە ناخی جەنابی مسعود بارزانی و هۆگری شۆڕش و خەبات دەبێت، بۆیە لە تەمەنی 16 ساڵی لە 20-5-1962 سەرۆك بارزانی پەیوەندی بە بارەگای بارزانیی نەمركرد و گەیشتە ئاواتی پێشمەرگایەتی خۆی .
هەروەك سەرۆك بارزانی دەفەرموو: “شانازی بەوە دەكەم كە كوڕی مەلا مستەفا بارزانیم، ئەو سیمبولی گەلە و لەسەر دەستی ئەو فێری زۆر شت بووم و من قوتابی ئەوم و بەشێكی زۆری ژیانی خۆم لەگەڵ ئەو بردە سەر، بەڵام شانازیش بە كەسایەتی خۆم و مێژوو و رێبازی خۆیشم و كردارەكانیشم دەكەم، بوونم بە كوڕی مەلا مستەفا دەرفەتی زۆری بەمندا و زۆر یارمەتیدام و توانیم متمانەی خەڵك وەربگرم و ئەوەی لە توانامدابوو پێشكەشمكرد، بارودۆخ لەسەردەمی باوكم جیاواز بوو لە رووی ئیقلیمی و نێودەوڵەتیشەوە، بەڵام ئەوەی هاتە دەست بنەماكەی خەباتی مەلا مستەفا بارزانی بوو”.

سەرۆك مسعود بارزانی یادوەری چۆنیەتی بوونی بە پێشمەرگە دەگێڕێتەوە:

هەروەك سەرۆك مسعود بارزانی لەكتێبی بارزانی و بزوتنەوەی رزگاریخوازی كورد باس لە چوونی بۆناو شۆڕش و بوونی بە پێشمەرگە دەكات كە رۆژی 20-5-1962 یەكێك لەو ڕۆژانەی ژیانییە كە هەرگێز لە یادی ناچێتەوە، لە ورۆژەدا چۆتە ریزی پێشمەرگەی كوردستان، لەم رووەوە بەرێزیان لە بیرەوەریەكانیدا نووسیویەتی: ” باوكم، لەو ماوەیەدا كە لە بادینان خەریكی رێكخستنی شۆڕش بوو، هەرگیز بۆی رێك نەدەكەوت لەگەڵ كوڕەكانی و ئەندامانی خێزانەكەیدا یەك بگرێتەوە. ئەندامانی خێزانی ئێمە و هەموو شێخەكانی دیكە، هەموو لە مێرگەسۆر بوون. بۆیە چی ئامۆژگاری و ڕێ پێشاندانێكی هەبووایە هەمووی بە عەلی شەعبان دا بۆ دەناردین، كاروباری وا ڕێك خستبووین كە ئیدریس جێنیشینی بێ و هەموو بە فەرمانی ئەو بجووڵێینەوە و ڕای سپاردین كە من و ئیدریس هەمیشە لە ناو خۆماندا كۆك بین و هاریكاری لەگەڵ یەكتردا بكەین و بە گوێرەی ئەو ڕستەیەی ئەو بجووڵێینەوە كە بەدەمی خۆی فەرمووبووی و بە ئێمەیان ڕاگەیاند بوو، ئەویش ئەوە بوو:(دەبێ ئیدریس و مسعود گیانێك بن لە دوو جەستەدا)، لەسەری پێویست كردبووین لەهەر چییەكدا پێویست بوو پرس و ڕاوێژ بە شێخ بابۆی ماممان بكەین، ئەگەر بەرژەوەندییەكیش پێویستی كرد، ئەو (واتە شێخ بابۆ) بگەڕێتەوە بۆ شێخ ئەحمەد و پرس بەو بكا). لە رێگەی عەلی شەعبانەوە داوام لە باوكم كرد رێگەم بدات بكەومە پاڵی و ببم بە پێشمەرگە، بەڵام ئەو رازی نەبوو. من لەوكاتە 15ساڵان بووم. ئەو لەسەر ئەو سوور بوو كە لەگەڵ ئیدریس بم، منیش بەفەرمانیم كرد. بارەكە بەو جۆرە مایەوە تا باوكم هات بۆ (گەلیێ نەهلە)، ئەو كاتە تكاكەم لێ دووبارە كردەوە، كە بچم و ببم بە پێشمەرگە و نامەیەكەم بۆ نووسی و ئارەزووی زۆری خۆمم تێدا دەربڕی كە لەگەڵی بم. وەڵامی ئەوە بوو پاش ئەوەی ئیدریسی برام ڕازی بێ رێگە دەدا، بەمەرجێ مامم شێخ بابۆ و مستەفا عەبدوڵڵا ڕازی بن، پاشانیش بڕیاری یەكجاریی دایە دەستی شێخ ئەحمەد، زۆرم بە ئیدریس گوت تا ڕازیم كرد، ئیدریس لەگەڵ شێخ بابۆ چوون بۆ لای شێخ ئەحمەد تا ئیزن و ڕوخسەتم بۆ لێ وەربگرن. لەو ماوەیەدا كە ئەوان لە ماڵ نەبوون و چوون بۆ لای شێخ ئەحمەد كە دوو ڕۆژی خایاند، من هەمیشە دڵم لە ناو پەراسووەكانمدا زیاد لێی دەدا و تەپەتەپی بوو. دڵە كوتەم پێ كەوتبوو، دەترسام شێخ ئەحمەد ڕازی نەبێ و ڕێگەم نەدا، چونكە نەمدەزانی ئەگەر ڕێگەم نەدا و بڵێ: (نە)، من چی لە خۆم بكەم، وام دەزانی ئەوە ئیتر كۆتایی هەموو شتێكە بۆم، بەڵام خواستی خوا بەدەنگمەوە هات و ئاواتەكەی بۆ هێنامەدی و مامم و ئیدریس ڕێیان دام بڕۆم. ئیدریس نامەیەكی بۆ باوكم نووسی تیایدا باسی كرد كەوا هەموو ڕازی بوون بەوەی ببم بە پێشمەرگە و داوای لێ كرد هەموو زانیارییەكی پێویستی لەبارەی ئەوەوە بداتێ كە كەی و كوێی پێ باشە بمنێرێ بۆ ئەوێ. بارزانیش عوزێر دۆڵەمەریی نارد بۆ ناوچەیەكی دیاری نێوان ناوچەی ڕێزان و ئالكە كە لەوشوێنەدا پردێ بەسەر زێوە هەیە، ئیتر ئەو لەوێوە بمبا بۆلای. لەگەڵ محەمەد مستەفا دا كە یەكێك بوو لە پاسەوانەكانی خۆمان لە زێ پەڕیمەوە ئەو بەر، هەر كە چاوم بە عوزێر و كۆمەڵی پێشمەرگە كەوت كە هەموو ناسیاوی خۆم بوون شادمانییەكی وا زۆر دایگرتم كە بۆم باس ناكرێ، هەستم كرد كەوا بووم بە خاوەنی هەموو دنیا و ئامادەم لەگەڵ بادا بكەومە پێشببڕكێ بۆ ئەوەی بگەمە لای ئەوان.
شەوی 19-20ی ئایاری 1962 هەموویمان بەڕێگەبڕینەوە بردە سەر. بۆ سبەینێی ڕۆژی دوایی، كەوتینە سەركەوتن بەچیای پیرسدا تا گەیشتینە لووتكەی كە (سەری ئاماد)ـە. بۆعەسری ئەو رۆژە گەیشتینە (كانیا تۆزێ) واتە كانی چنار لە گەلیی (بێخەمە). لە ڕێگەدا تووشی چەندین كۆمەڵ و دەستەی پێشمەرگە دەبووین ڕوویان گەش و پڕ بوو لە مژدە و خۆشی و باوەڕ بەخۆكردن. دیمەنێكی زۆر جوانی بەسام بوو لەوە پێش شتی وام نەدیبوو، كە بەلایاندا تێپەڕ دەبووم سەرەڕای باوەڕ و هیوا، شانازیش دڵ و دەروونی هەموو دەگرتمەوە. كاتژمێر 6ی عەسری 20ی ئایار، گەیشتمە بارەگای باوكم، بەڵام ئەو بەخۆی لەوێ نەبوو، چووبوو بۆ بەسەركردنەوەی بارودۆخی ناوچەی (بێخمە)، كە گەڕایەوە و چاوم هاتە خوار، سەرنجمدا كە باوكم چەند بەدیتنم شادمان بوو. یەكەم شت هەواڵی تەندروستیی شێخ ئەحمەد و مامم بابۆ لێ پرسیم، پاشان كەوتە پرسیاركردن لەبارەی ئەندامانی تری خێزانەوە و یەكەیەكە ناوی دەهێنان، منیش وەڵامم دەدایەوە و پاشان سڵاوی ئەوانم پێ دەگەیاند. كەواتە ڕۆژی چوونی من بۆ ناو شۆڕش 20ئایاری 1962، ئەم ڕۆژە مێژوویەكی رۆشەنە لە ژیانمدا. باسی ئەو خۆشییەم بۆ ناكرێ كە لەو كاتەدا دڵ و دەروونمی گرتەوە. دیمەنی ئەو لەشكرە رێكخراو و سیلاح شۆڕەم زۆر پێ سەیر بوو. هەرچیم دی لە سەرووی ئەوە بوو كە خەیاڵم لێ دەكردەوە. رۆژی 20ی ئایاری 1962 یەكێ بوو لەو ڕۆژانەی ژیانم كە هەرگیز لەیادم ناچنەوە، لەو ڕۆژەدا بوو لە ڕیزی پێشمەرگەی كوردستاندا بووم بەجەنگاوەر، هیوام زۆر گەورەیە كە تا دوا رۆژی ژیانم هەروا بمێنم و هەر پێشمەرگەبم”.
سەرۆك بارزانی هەمیشە شانازی بە پێشمەرگایەتی خۆی دەكات و شانازی بەو چەكەی دەكات كە بۆ بەرگری كوردستان و رێبازی باوكی بارزانیی نەمر لە شان كردووە و بەرێزیان دەفەرموو:
“لەو رۆژەوەی چەكم كردۆتە شانم لە 20ی ئایاری 1962 چاوەڕوان نەبووم تا ئەمڕۆ بژیم، بەڵام كە چەكم كردە شانم ئامانجم ئەوە بوو كوردستانی سەربەخۆ ببینم”.
هەروەك لە وێنەكانی جەنابی سەرۆك لە تەمەنی لاویەتی دیارە، كەگەنجێكی لێهاتووە و بە شادمانییەوە بوونی بە پێشمەرگە قبوول كردووە، چونكە دەیزانی ئامانجی پێشمەرگایەتی خزمەتكردن بە كوردستان و خەڵكی كوردستان، بۆیە هەمیشە جەنابی سەرۆك بارزانی خۆی بە پێشمەرگەی كوردستان دەزانێ، هەروەك لەسەرەوە سەرۆك مسعود بارزانی ئاماژەی بەوەكرد: (تا ئێستاش بیرهاتنی سات بەساتی چۆنیەتی رۆیشتنم بەرەو بەرەی پێشمەرگە و بارەگای بارزانی بۆ من خۆشی بەخشە و بەشێكە لە یادەوەریە هەرەخۆشەكانی ژیانم).

لەسەرەتادا.. جەنابی سەرۆك پێشمەرگەیەكی ئاسایی بێ پلەبووە

ئەو سەركردەیە لە تەمەنی لاویەتی شانازی گەورەی بە پێشمەرگایەتی دەكرد و وەك پێشمەرگەكانی دیكە بووە و هەرگیز جیاوازی نەبووە لە پێشمەرگەكانی دیكە، دەربارەی پێشمەرگایەتی خۆی چەند جار جەنابی سەرۆك فەرموویەتی:” لە ساڵی 1962 من بوومە پێشمەرگە و چەكم لە شان كرد، پاسەوانیم كردوە و ئاوم هێناوە، هەرچیەك پێشمەرگە دەیكرد، منیش كردوومە”. واتە ئەو (جەنابی سەرۆك) ئەگەرچی كوری رابەری شۆرش مەلامستەفا بارزانی بووە، بەڵام هەمیشە بێ جیاواز بووە لە گەڵ پێشمەرگەكانی دیكەی هاوسەنگەری خۆی، سەرەڕای كەسایەتی وەكو كوڕی مەلامستەفای بارزانی بەڵام بێجگە لە پێشمەرگایەتی هیچ پلەیەكی دیكەی نەبووە و وەكو هەڤاڵانی دیكەی پلەی پێشمەرگە بووە، هەرئەركێكی پێشمەرگایەتی بۆیان دیاری دەكرد یاخود پێی ڕادسپێرا ئەو(مسعود بارزانی) ئەنجامی دەدا .بۆیە سەرۆك بارزانی هەردەم شانازی بە خەباتی پێشمەرگایەتی خۆی دەكات و لەیەكێك لە چاوپێكەوتنەكانیدا دەفەرمووێ: (بارزانیی نەمر فێری كردین، كەپێشمەرگە بوون و ژیان بە رۆحیەتی پێشمەرگەوە بۆ خزمەتكردنی گەل، گەورەترین شانازی و دەوڵەمەندییە). كاتێك جەنابی سەرۆك بارزانی پۆستی سەرۆكی هەرێمی كوردستانی وەرگرت لە بیرمانە جەنابیان فەرمووی: “ئەو رۆژەی كەبووم بە پێشمەرگە لە دوای بارزانیی نەمرەوە چەكم هەڵگرت وام دەزانی گەورەترین شانازیم بەركەوت، ئێستاش كە پۆستی سەرۆكی هەرێم وەردەگرم، بۆئەوەیە كە خزمەتی خەڵك بكەم، ئەمەش هەر درێژە پێدانی پێشمەرگایەتییە بۆمن”.
واتە جەنابی سەرۆك پێشمەرگایەتی لە هەموو پلە و پایەك گرنتگر و پیرۆزتر دەزانێ. هەروەها جەنابی سەرۆك بارزانی تەنها شتێك كە لای نەگۆڕاوە پێشمەرگایەتییە، وەك جەنابیان دەفەرمووێ: “لە هەموو هەوراز و نشێویەكانی قۆناغە جیاجیاكانی خەبات و گۆڕانكارییەكان لە ئەرك و بەرپرسیاریەتیدا تاكە شتێ كە لەلام نەگۆڕ بووە ئەو روحەی پێشمەرگایەتی بووە”. لەم رووەوە سەرۆك بارزانی دەفەرموو:
(لە هەر پلە و پایەیەكدا بم هەر پێشمەرگە و خزمەتكاری كوردستانم)، بۆیە جەنابیان هەمیشە پێشمەرگایەتی و ئەركی پێشمەرگایەتی لەلای زۆر گرنگ و پیرۆزە، هەردەم سەرۆك بارزانی خۆی بە پێشمەرگەی قوتابخانەی بارزانیی نەمر دەزانێ كە هەمیشە باوكی ڕێنیشاندەری ژیان و خەباتی بوو، لەم رووەوە جەنابیان فەرموویەتی:(ئەزموونی پێشمەرگایەتی بۆ من گەورەترین قوتابخانە بووە و لەو قوتابخانەیەشدا ئێمەی پێشمەرگە مامۆستایەكی گەورەی وەك بارزانیی نەمرمان هەبووە. ئامۆژگاریەكانی بارزانیی نەمر چ وەك باوكێك و چ وەك رابەرێك ڕێنیشاندەری ژیان و خەباتی من بووە. دەتوانم بڵێم هەوێنی خۆراگری و ورەبەرزیمان لە خەباتدا ئەم ئامۆژگارییەی باوكم بوو (لە شكستدا نائومێد نەبین و لە سەركەوتندا لەخۆبایی نەبین). ئەم ئامۆژگارییە بارزانی نەمر هەمیشە لەبەرچاوم بووە و دەبێت و فاكتەرێكی بەهێزی بەردەوامییە”.
سەرۆك مسعود بارزانی ، لە وەڵامی پرسیارێكی رۆژنامەی واشنتۆن پۆست “باوكی تۆ، مستەفا بارزانی، بەناوبانگترین سەركردەی كورد بوو؟)، سەرۆك بارزانی لەوەڵامدا گوتی:”بەڵێ، ئەو سەركردایەتی بزووتنەوەی رزگاریخوازی كوردی دەكرد، ئەو كاتە من پەیوەندیم بە ریزەكانی هێزی پێشمەرگە كرد، تەمەنم تەنها16 ساڵ بوو، لەو كاتەوە تاكو ئێستا من پێشمەرگەم، هیچ گوندێك، شاخ و دۆڵێك نەماوە من پێیدا نەڕۆیشتبم، هەموو هەوڵەكانیشم بۆ ئەوە بووە، كە دەوڵەتێكی كوردی دابمەزرێنم، لەو رۆژەی ئەو دەوڵەتەش رادەگەیەندرێت، من هیچ پۆستێكی سیاسیم نابێت، چونكە ئەوكاتە ئامانجەكەمان بەدیهاتووە”.

ئێستاش جەنابی سەرۆك هەر پێشمەرگەیە

شایانی باسە چالاكی و گیانی پێشمەرگایەتی ئیستاش هەر لە ناخی جەنابی سەرۆك مسعود بارزانی لە جۆشدایە، و ئیستاش جەنابیان بەروحیەتی پێشمەرگایەتی و سیاسیێكی كاریزمادار و دیپلۆماسیێكی شارەزا رووبەرووی كێشە و قەیران و ئەو مەترسیانە دەبێتەوە كە رووبەرووی خاك و خەڵكی كوردستان دەبنەوە. هەموومان لەبیرمانە لە دەسپێكی هێرشی تیرۆرستانی (داعش) بۆسەر خاكی كوردستان، جەنابی سەرۆك بارزانی قۆڵی پێشمەرگایەتی لێ هەڵماڵی و لەگەڵ هەڤاڵانی پێشمەرگە لە سەنگەرەكانی رووبەرووی (داعش) شەو و رۆژی دەكردە یەك، بۆرزگاركردنی دەڤەری (شەنگال) و چەندین دەڤەری دیكەی كوردستان، جەنابی سەرۆك راستەوخۆ بەشداری و سەرپەرشتی رزگاركردنی بست بەبستی خاكی كوردستان كردووە. هەموو خەڵكی كوردستان ئەو متمانەیان بەجەنابی سەرۆك بارزانی هەیە، كە تەنها سەرۆك بارزانی ڤەگەڕ (مرجع) و رابەر و پارێزەی ماف و خاكی كوردستانە. خەبات و پێشمەرگایەتی و هەڵوێستە نیشتیمان پەروەرییەكانی جەنابی سەروك بارزانی ئەو تینەی داوەتە خودی پارتی دیموكراتی كوردستان كە لە هەموو هەڵبژاردنەكانی كوردستان و عێراق، بەردەوام پارتی براوەی یەكەمی هەڵبژاردنەكان بێت، لەدوایین هەڵبژاردندا بۆ پەرلەمانی عێراق لە12 ـی ئایار2018 (كە لە هەمانكاتدا یادی بە پێشمەرگەبوونی سەرۆك بارزانی بوو)، لیستی پارتی لەسەرانسەری كوردستان براوەی یەكەم بوو، هەروەها پارتی وەكو حزب لەسەرانسەری عێراق یشدا هەر لەریزبەندی یەكەمدا بوو كە زیاترین دەنگی بەدەست هێناوە. بۆیە هەموومان ئەمڕۆ دەڵێین: “سوپاس جەنابی سەرۆك مسعود بارزانی” خەبات و ماندووبوونی بەرێزتان ئاشتی و ئازادی و ئاسوودەیی بە ئەمەی خەڵكی كوردستان بەخشیوە)، ئەمڕۆ ئێمەش سڵاو و پیرۆزبایی 58 ساڵیادی بەپێشمەرگەبوونی بەرازتان دەكەین و بەڵێنیت پێ دەدەین، ئێمەش هاوشێوە و هاوئاراستەی بەرێزیان پێشمەرگەی وەفاداری رێبازی بارزانی نەمر بین.

زیاتر

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابه‌تی تر

وه‌زاره‌تی ناوخۆ: رۆژی 7-6-2020 ده‌وامی فه‌رمانگه‌كانی حكوومه‌ت ده‌ست پێده‌كاته‌وه‌

وه‌زاره‌تی ناوخۆی حكوومه‌تی هه‌رێمی كوردستان رایگه‌یاند: دەوامی فەرمانبەرانی حکومەتی هەرێم…