بەرپرسیارێتی و موزایەدەی سیاسی

0
244

شاخەوان برایم عەبدوڵڵا

دۆخی سیاسیی عێراق لەگەڵ پێكهێنانی حكوومەتیشدا ئاسایی نەبووەتەوە و گرووپە شیعەكانیش ئەوەی بۆیان بكرێ لە دژی كورد درێغی ناكەن و حكوومەتی بەغداش بەردەوامە لە گوشارە سیاسییەكانی و مووچە و بوودجەی لەسەر هەولێر بڕیوە، جموجۆڵی داعش لە زیادبووندایە و هێزە ئەمنییە عێراقییەكانیش لەبری رووبەڕووبوونەوەی گرووپە تیرۆریستییەكان، تەنیا رۆڵی سەیركەر دەبینن، وێڕای ئەمانەش مەترسی كۆرۆنا بەردەوامە و نرخی نەوتیش تەواو دابەزیوە كە بەهۆیەوە قەیرانی دارایی رووی لە عێراق و هەرێمی كوردستانیش كردووە، بەدەر لە دۆخی عێراق، لەناوخۆی هەرێمیشدا هێزە بەناو “ئۆپۆزسیۆن” و هەندێ سەرکردەی چەند حزبێکی بەشدار لە حکوومەت كەیسەكەی سۆران عومەر و قەیرانی داراییان لە دژی حكوومەتی هەرێم بەكارهێناوە بە دنەدانی هاووڵاتییان، لەكاتێكدا بەهۆی دابەزینی نرخی نەوت، قەیرانەكە بۆ هەولێر دوو هێندەی بەغداش سەختترە، بەوەی بەغدا توانای قەرزی هەیە و یەدەگی پارە و زێڕی هەیە و لەلایەن وڵاتانیشەوە وەك دەوڵەت هاوكاری دەكرێت، ئەمە بۆ هەولێر وانییە.

ئەگەر ئۆپۆزسیۆن لە وڵاتانی پێشكەوتوودا رەگەزێكی گرنگیی دیموكراسی و كارتێكی گوشاری ئەرێنی بێت لە بەرژەوەندیی هاووڵاتییاندا، رێك ئەوەی لە هەرێمی كوردستاندا دەگوزەرێت پێچەوانەكەیەتی، ئەوەی ئێرە لە بنەڕەتدا ئۆپۆزسیۆن نین و كۆمەڵێك دەستە و تاقمی سیاسیین تەنانەت ناوبانگی ئۆپۆزسیۆنیشیان ناشیرینكردووە، وەك نموونە ئۆپۆزسیۆنی كوردستان حەزدەكات حكوومەت پارەی نەبێت بۆ مووچە و پڕۆژەكانیشی بوەستن، خەڵكی ئاو و كارەبا و نەخۆشخانەكانیش دەرزی و دەرمانیان نەبێت، فەرمانگە شارەوانییەكان تەنانەت پارەی كلۆر و پاككردنەوەشیان نەبێت و قوتابخانەكان بوەستن و پاس و تاكسییەكان مانبگرن و فەرمانبەرانیش نەچنە دەوام و حیزبەكانیش بكەونە وێزەی یەكتری و ئاڵۆزی سەرتاپای هەرێم بتەنێتەوە.

بەگشتی ئۆپۆزسیۆنی كوردی حەزدەكات ناسەقامگیریی بە مانا فراوانەكەی جەستەی حكوومەت و هاووڵاتییان داغان بكات، بۆ ئەوەی وەك كارتی سیاسی لە دژی دەسەڵات بەكاری بهێنن، لەمجۆرە دۆخەشدا تەنیا هاووڵاتییان زیانمەندی یەكەمن و ئەو كولتووری دژایەتییەش خەریكە زەقتر دەبێتەوە بەوەی نەوەیەك هاتووە هەرچی هەیە رەتی دەكاتەوە، ئەو نەوەیە ئامادەیە وێنەی سەددام حوسێن بەرز بكاتەوە لەژێر كاریگەری گوتاری پۆپۆلیستییانەی ئۆپۆزسییۆن و بەشێك لەو گرووپانەی بەشدارن لە حكوومەتدا.

لە دۆخی قەیراندا گرنگە هەموو حیزبەكان هاوكاری حكوومەت بن بە پڕۆژە و پێشنیازی ئەرێنی بۆ تێپەڕاندن یان دۆزینەوەی چارەسەری قەیرانەكان، لەپێناو بەرژەوەندیی گشتیی هاووڵاتییاندا، كەچی ئەو مۆدێلە فاشیلەی بەناو ئۆپۆزسیۆنی كوردی، تەنانەت نەك هەر پێشنیاز و پڕۆژەی ئەرێنی پێشكەش ناكات، بەڵكوو بە پڕۆژەی سیاسی و میدیایی ئیش لەسەر ئەو خاڵانەش دەكات كە هێشتا جێی ئومێدن و قەیران نەیگرتوونەتەوە بەمەبەستی قووڵكردنی قەیرانەكان و زیاتر برسیكردنی خەڵك تا وەك كارتی گوشار لە دژی حكوومەت بەكاری بهێنن، لێرەدا تەنیا خەڵك زیانمەندی ئەو دۆخە ئاڵۆزە سیاسییە دەبن، هەم كاری نامێنێت و هەمیش خەڵكی دووچاری دەروونێكی ناسەقامگیر دەبن كە ئەمەش كاریگەری یەكجار قووڵ لەسەر بازاڕ و ژیان بە گشتی دادەنێت، رێك وەك ئەوەی ئەو گرووپە پۆپۆلیستییەی ئۆپۆزسیۆنی كوردی كاری بۆ دەكەن، ئینجا دیقەت بدەن بەشی هەرە زۆری ئەوانەی موزایەدە دەكەن، پەرلەمانتارانن، مووچەی تەنیا یەك مانگیان یەكسانە بە مووچەی یەكساڵی فەرمانبەرێكی دەرچوونی زانكۆ و ماستەر، كەچی لەبری قسەی خێر، هەوڵی شێواندنی دۆخەكە دەدەن.

لە هەرێمی كوردستاندا هیچ گرووپێكی راستەقینە نییە تا بتوانین ناوی بنێین ئۆپۆزسیۆن وەك ئەوەی لە وڵاتاندا پێیاندەگوترێ ئۆپۆزسیۆن، ئەوانەی لای خۆمان ئەوەی لەژێر پەردە و كەوای ئۆپۆزسیۆنبوونەوە دەیڵێن و دەیكەن، جگە لە جێبەجێكردنی ئەجێندای لایەنێكی سیاسیی بەشدار لە حكوومەتی هەرێم و لەژێر كاریگەری ئێران و بەغدا هیچی دیكە نییە، ئەو گرووپە گوتارچییەی هەست بە بەرپرسیارێتی دۆخەكە و مەترسییەكانی سەر كوردستان ناكەن و هەوڵی دروستكردنی پشێوی و پەرتەوازەیی لایەنەكانیش پرۆژەیەكی كارایانە وەك شەڕی حزبی و هەوڵی زیادكردنی پێگەی سیاسی كەسانی دیاریكراو، ئەوەی دەشگوترێت قەیرانی دارایی، راستە، بەڵام هەڵمەتی ئۆپۆزسیۆن و پاساوی قەیرانەكە بۆ تێكدانی سەقامگیریی كوردستان لە زیانی كۆی ئەزموونی كوردستان و خەڵكی بە گشتی دەكەوێتەوە بەجۆرێك لە جۆرەكان هێز و گرووپە دژە كوردەكان پارە خەرج دەكەن بۆ تێكدانی سەقامگیریی سیاسی و كۆمەڵایەتیی كوردستان، وەلێ ئەوەتا ئۆپۆزسیۆنی كوردی بە خۆڕایی ئەو پڕۆژەیەیان بۆ جێبەجێ دەكات بە تێكدانی سەقامگیریی كوردستان.

زیاتر

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابه‌تی تر

هەولێر؛ دەوامی گشت دامودەزگا تەندروستییەکان ڕاگیرا

له‌ئاگادارییه‌كدا  به‌رێوه‌به‌رایه‌تى گشتى ته‌ندروستى هه‌ولێر رایده‌گه‌ێنێت ، دەوامی فەرمی…