مەحموود محەمەد بۆ مستەفا کازمی: ئەگەر بتەوێ‌ لەوانی دیكەی پێش خۆت جیاواز بیت دەبێ‌ بانگی خۆشەویستی و مرۆڤدۆستی و دادپەروەری بەگوێی زۆرینە و كەمینەدا بدەی

0
154

مەحموود محەمەد ئەندامی مەکتەبی سیاسی پارتی دیموکراتی کوردستان کە هاوکات گوتەبێژی فەرمیی پارتییە، لە تۆڕی کۆمەڵایەتی فەیسبوک لە ئەکاونتی فەرمی خۆی، لەنووسینێکدا لە ژێرناونیشانی “بەڕێز مستەفا کازمی سەرۆکوەزیرانی عێراقی فیدراڵ” لە قوڵایی ستراتیژییەوە دەستنیشانی خاڵە جەوهەرییەکانی بەردەم پرۆسەی سیاسی عێراق و سەرۆکوەزیرانی عێراقی فیدراڵ دەکات.

جێبەجێکردنی بەڵێنەکان
دەسپێکی نووسینەکەی مەحموود محەمەد بەناونیشانی بەڕێز مستەفا کازمی سەرۆکوەزیرانی عێراقی فیدراڵ دەست پیدەکات کە سڵاوێکی کورستانییانەی ئاراستە دەکات و دێتە سەر کارنامەکەی و رایدەگەیەنێ،
“هیوادارم سەرکەوتووبی لە جێبەجێکردنی ئەو کارنامەی کە بڵاوتکردەوە، ھەرچەند شتێکی ئەوەندە زۆری بۆ ئێمەی کوردستانیان تێدانەبوو، بەڵام ئەوەندەش کە راتگەیاندوە لێی پەشیمان نەبیەوە…
ئێستا بووی بە سەرۆک وەزیرانی کۆماری عێراقی فیدراڵ، ئەو عێراقەی لەسەرەتای دروستکردنیەوە وەکو دەوڵەت پڕاوپڕبووە لە کێشە و، بارکراو و ھەڵئاوساوە بە تەنگوچەڵەمە و نادادپەروەری، ئەو عێراقەی کە دوو سێ ساڵ دوای دروستکردنی وەکو دەوڵەت، کوردستانەکەی ئێمەشی پێوەلکێندراوە، بۆچی و لەبەرچی حیکایەتێکی مێژووی سەدەی بیست و غەدرێکی مێژوویی و ….ھتد بووە؟! ئەو عێراقەی کە دەوڵەتەکەی لەسەرەتای دامەزراندنیەوە سیاسەت و مێتۆدی چارەسەری کێشەکان و تەنگوچەڵەمەکانیان نەکردۆتە رێبازی خۆیان، بەڵکو سیاسەت و میتۆدی ئێدارەی کێشە و تەنگوچەڵەمەکانیان ھەڵبژاردوە ھەربۆیەیش کێشە و تەنگوچەڵەمەکان ساڵ لەدوای ساڵ و قوناغ بە قۆناغ (بەگۆڕینی سیستەمی حوکمڕانیشەوە) بە چارەسەرنەکراوی لەسەریەکتر کەڵەکە کراون… لەبەرئەوەشە کە زەمینەی خوڵقاندنی تەنگوچەڵەمە لە عێراقدا زۆر لەبارە و ھەمیشەش زەمینەی رەخساو ھەیە و کۆمەڵێک فاکتەری بابەتی و زاتی وایانکردوە رەوشی عێراق ئاڵۆزبێ و تەنگوچەڵەمەکانیش بەردەوامیان ھەبێ.”

تاقیکردنەوەی قورس
مەحموود محەمەد لە نووسینەکەدا وێڕای دەستخستنەسەر برینی کێشەکان و چۆنیەتی چارەسەرکردنی لە عێراقدا راشکاوانە دەنووسێ کە سەرۆکوەزیرانی عێراقی فیدراڵ لە بەردەم تاقیکردنەوەیەکی سەختدایە و رایدەگەیەنێ، “بەرپرسان و حوکمڕانانی عێراق نەیانتوانیوە خۆیان لەو کولتوورە خراپە رزگاربکەن و ھەربۆیەش بە درێژایی ئەو سەد ساڵە لە عێراق سەرکردە و حوکمڕانێکی جیاواز لەپێشووی خۆی بەدینەکراوە و سەرکردەی مستقبلی کە لەگەڵ زەمەن و قۆناغی جیاوازی تێگەیشتنی مرۆڤەکان و ویست و خواستەکانیان بەشێوەیەکی بابەتیانە مامەڵە لەگەڵ روداوو و پێشھاتەکان بکات، دروست نەبووە..!
بۆیە بەڕێزتان لە تاقیکردنەوەیەکی قوڕسدان، ئایە ھەمان رێبازی دەوڵەتمەدارەکانی پێش خۆت دەگریە پێش یاخود جیاواز لەوان سیاسەتێکی سەردەمی و مرۆڤدۆستانە دەگریە بەر و خەرمانی کێشە و تەنگوچەڵەمەکان گێرە و شەن و کەو دەکەی و ئومێد دەگێڕیەوە بۆ ژیانێکی شایستە و، ترسی رابردوو و ئێستا و ئایندەشی ناخەیە سەر.
بەڕێز كازمی؛
بەڕێزت سەرۆك وەزیرانی دەوڵەتێكی كە بە قۆناغێكی دیاری مێژووییدا تێدەپەڕێ‌، زۆری و خێرایی روداو و گۆڕانكارییەكان دیقەت و كۆششی پێویستە و، ئاوێتە بوونی دەسەڵات و حوكمڕانی لەگەڵ جەماوەری دەوێت… مەترسی زۆر هەیە ئەگەر لە نرخی ئەو قۆناغە مێژوییە تێنەگەین كە هەناوی پڕە لە گۆڕانكاری و پێشهاتی نوێ‌.
دەبێ‌ ئاڵۆزییەكانی ئاستی ناوخۆی عێراق و هەرێمایەتی و دەولی تێبگەین و بزانین كە ئازارێكن زادەی رەحمی مێژوون، زادەی مێژووی 100 ساڵەن بەگشتی و 20 ساڵی رابردون، بۆیە دەبێ‌ تفاعلی بابەتییانە لەگەڵ دەرهاویشتەكانیان بكرێت ئەگینا ئازارەكە بە ئازارشكێن ناشكێ‌…
*كێشەكانی ناوخۆیی لە رێزنەگرتن لە دەستوور و لە انتقائی جێبەجێكردنیەوە دەست پێ‌ دەكەن.
* لە وڵاتێکی فرە ئاین و مەزهەبی کە 83 ساڵ بە چەمكی ناسیۆنالیزم و عروبە حوكمڕانی كراوە، 16 ساڵیشە بە چەمكی ئایدۆلۆژیای مەزهەبی و تڕاژیدیای مێژوویی حوكمڕانی دەكرێت.
* لە وڵاتێكدا كە ترس لە رابردوو و تۆڵەسەندنەوە لە پێكهاتەیەك و پەرۆشی بۆ رابردوو و ترس لە ئێستا و لە ئایندەی پێكهاتەیەكی دیكە و، ترسی رابردوو و ئایندەی پێكهاتەیەكی دیكەش.
* لە وڵاتێكدا كە روئیاكان روون نین و رق و یەكتر قبووڵ نەكردن و، لە جیاتی دیالۆگ و لێك حاڵیبوون، لولەی تفەنگەكان قسە دەكەن.
* لە وڵاتێكدا كە پێشتر رێگر و چەتەكانی شێرانی شەو بوون و بە عەقڵیەتی بیابان حوكمڕانی شاریان دەكرد و، ئێستاش بە عەقڵ كارناكرێت ئەوەندەی بە نەقڵ حوكمڕانی دەكرێت.
* لە وڵاتێكدا، حوكمرانی عێراق و گیروگرفتە دارایی و سیاسییەكانی بەشێك لە وڵاتانی خۆرهەڵاتی ناوەڕاست بوونە یەك پاكێج! بۆیە بۆ نان، بۆ ئازادی و هاتنەدەر، لە ژێرسێبەر و هەیمەنەیان، پڕ بە قوڕگی بوغزاوی ساحەی تەحریر و ساحەكانی دیكە هاوار دەكرێ‌ و توڕەییان لێ‌ دەبارێ.
* لە وڵاتێكدا كە ساڵی 1920 ئینگلیزەكان دامەزرێنەر و پارێزەری بوون و، لە ساڵی 1958 ئەو دامەزرێنەر و پارێزەرە وەدەرنرا و، ساڵی 2003 ئەمریكییەكان رژێمیان روخاند و حوكمڕانیان بە دوو دەست و لەسەر سینیەكی زێڕین پێشكەش بەوانەكرد كە ئێستا حوكمڕانن، کەچی دەبێ‌ جگە لە هەوڵی وەدەرنانیان ئاڵۆزیەكانی ئەوان و دراوسێكانی عێراق بووەتە بەشێك لە ئاڵۆزییەكانی حوكمڕانی عێراق.
* لە وڵاتێكدا كە دراوسێکانی هەریەكە و بەشێكی بە هی خۆی دەزانێ‌ و تەراتێنی تێدا دەکەن و هەڕەشەش لە هاوڵاتیانی دەكەن، سەروەری سنورەکەی مەرەكەبی سەر كاغەزە و بەس.
* لە وڵاتێكدا كە پاسپۆرت و ناسنامەكەی لە هەموو وڵاتان بەگومان و رێزلێنەگیراو سەیری دەكرێن و، ناڕاستەوخۆ وێنای داعش و قاعیدە و سەربڕین و بە كەنیزەكردنی كچان و ژنان و ئەنفال و كیمیاباران و لەسەر ناو و هەویە كوشتن دێتە بەرچاویان…
* لە وڵاتێكدا كە زۆری ژمارە، زۆرداری دەهێنێ‌ و، ستەم لێكراوی دوێنی خەریكە ئەمڕۆ دەبێتە ستەمكار.
* لە وڵاتێكدا كە ریفراندۆم بۆ دیاریكردنی چارەنووس و چۆنیەتی ژیان، بە تاوان حساب دەكرێ‌ و، نان و قوتی خەڵك زەوت دەكرێ‌ و، لە مینبەری مزگەوت و حوسێنیەكان لەگەڵ لەسینگدان رق بڵاودەكرێتەوە.”

ئەگەر بتەوێ جیاواز بیت

مەحموود محەمەد لە نووسینەکەدا دێتەسەر نەخشەڕێگای چۆنیەتی سەرکەوتنی سەرۆکوەزیرانی عێراقی فیدراڵ ئەگەر بیەوێ لەوانی پێشووی خۆی جیاوازبێ و، خاڵە چارەسەرییەکان دەستنیشان دەکات و دەڵێ،” لە وڵاتێكدا ئەگەر بتەوێ‌ لەوانی دیكەی پێش خۆت جیاواز بیت و وەكو پیاوی موستەقبەلی بۆ عێراق سەیرت بكرێ‌ و كێشە و تەنگوچەڵەمەكان كەڵەكە نەبن و چارەسەر بكرێن، دەبێ‌ بانگی خۆشەویستی و مرۆڤدۆستی و دادپەروەری بەگوێی زۆرینە و كەمینەدا بدەی و، بێ سڵەمینەوە پێیان بڵێی کە ئەزموون سەلماندویەتی لەو وڵاتە فرەنەتەوە و فرەئاین و فرەمەزهەبە بە یەك لایەن و یەک پێکھاتە حوكمڕانی ناكرێت… دەبێت هەمووان شەریك بن لە فیكر و، داڕشتن و جێبەجێكردنی یاسا و بڕیارەكان و، بە هەمووان حوكمڕانی دەكرێت و سازانی هەمووان و هاوسەنگی لە دەسەڵات و بەرژەوەندیەكان زامنی چارەسەری كێشەكانە و، برینەكان ساڕێژ دەكرێن.
توانای زۆری مرۆیی و دارایی ئەم وڵاتە، چیتر بە گولە و تۆپ نەدرێ‌ و بە سینگی یەكترەوە نەنرێ‌، بەڵکو بۆ عیلم و مەعریفە و خۆشی ژیانی تەواوی مرۆڤەكانی ئەم وڵاتە بێت و چڕنوك و چەنگی خەڵكی دیكە لە سینگی پڕ لە داخ و هاوار و زگی برسی و داخ لە دڵی چەندین ساڵەی هاوڵاتیان دووربخرێتەوە..! وڵات هی هەمووانە نەك هەندێك وابزانن عێراق هی ئەوانە و ئەوەی دەیدەن بە خەڵكی دیكە خێركردن و بەش دانە…! دەبێ‌ دەوڵەتمەداری، عەرەب و كورد و توركمان و سریان كلدان ئاشوری و مسوڵمان بە شیعە و سونەیەوە، مەسیحی و ئێزدی و… هتد، بن.

*زامی پڕ لە سوێی ئەنفال و فەیلی و بارزانیەكان و، كیمیاباران و وێرانكردنی چەندین شار و 4500 گوند، تیمار بكرێن و، سارێژ بوونیان متمانە دەگێڕێتەوە.”

لە کۆتایی نووسینەکەدا مەحموود محەمەد ئاماژە بە خاڵی سەرکەوتن دەکات ئەگەر سەرۆکوەزیران بیەوێ بکەوێتە سەر سکەی سەرکەوتن لە عێراقی فیدراڵدا دەبێ جورئەتی چارەسەرکردنی کێشەکانی هەبێ و دەڵێ،” توانا بدە خۆت و جورئەتی چارەسەری كێشەی 100 ساڵەی حكومەتە یەك لەدوای یەكەكان (کە كێشەی بنەڕەتی نێوان كورد و دەوڵەتی عێراق) هۆكاری زۆر كێشەی دیكەش بووە، پەیدا بكە و، ھەنگاو بنێ بۆ چارەسەرکردنی كێشەی كەركوك و شار و شارۆچكەكانی دیكە و، هەنگاو بنێ بۆ ماددەی 140 کە ماددەیەكی دەستووریە، كێشەی میزانیە و نەوت و غاز و، شایستە داراییەكانی پێشمەرگە، دەرهاویشتەی ئەو چارەسەرنەكردنەن، قورڕسن بەڵێ‌، بەڵام ئیڕادە و بەخەمەوە بوونی ژیان و ئارامی مرۆڤاكان و استقراری عێراق توانات دەداتێ و مرۆڤ دۆستانیش پاڵپشتت دەبن و، دەبیە پیاوی ئیشە قوڕسەكان لە مێژوو دا.
داوای سەرکەوتنت بۆ دەکەم.”

زیاتر

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابه‌تی تر

ئەندامێكی مەكتەبی سیاسی پارتی دیموكراتی كوردستان: ناكرێت دۆخەكە بەو شێوەیە بەردەوام بێت

ئەندامێكی مەكتەبی سیاسیی پارتی دیموكراتی كوردستان رایگەیاند، بڕیارە ڕاپۆرتێك ئامادە بكەین …