سه‌ره‌تا وتار راپەڕین موڵكی جەماوەرە

راپەڕین موڵكی جەماوەرە

0 جار خوێنراوه‌ته‌وه‌
0
565

فارس قادر فەقێ عەبدوڵلا*

ئەمساڵ دەبێت بە 29 ساڵ لە یادی راپەڕینە مەزنەكەی ساڵی 1991ی كوردستانی باشوور ساڵانە ئەم یادە دەكرێتەوە و لەسەری دەنووسرێ، ئەم باس و نووسینانە لایەنی چاك و خراپی هەیە، لایەنە چاكەكەی ئەوەیە كەسانێك زۆر بە واقیعبینانەو راستگۆیانە ئەم بابەتە باس دەكەن و شرۆڤەی دەكەن و رووداوەكان بە ئەمانەتەوە دەنووسن كە ئەمەیان مایەی رێز و خۆشحاڵییە، بەڵام بەشێكی تریان زۆر بەبێ بنەماو ناڕاستگۆیی وەك سیناریۆ دایدەڕێژن و رۆڵی ئەكتەرەكان نیشان دەدەن و دەچنە نێو دونیای خەیاڵ و ململانێی سیاسی و پاوانكردنی خەباتی كەسانی تر یان پارتەكانی تر بۆ مەدح و سەنای خۆیان، یان لایەنێكی سیاسی دیار و مەبەست وەك ئەو گەندەڵیانەی كە لەسەر زەوی و زار و موڵك و سامانی نیشتیمان دەكرێ و كراوە.

 بەڵێ ئەو بابەتەش شێواندنی رابردوو و خەباتی كەسانێكی ترە و سڕینەوەی ماندوبوون و خەباتی چینی هەژار و راپەڕیوی میللەتی كوردە. كاتێك ئەم بابەتە دەشێوێنن خەباتی گەلی كورد دەشێوێنن و خوێنی شەهیدان دەشێوێنن، گەلی كورد هەمووی دەیزانێت كەوا دەروازەی راپەڕین شاری رانیەی خۆشەویست بوو لە 5/3/1991 یەكەم تەقەی راپەڕین لەم شارە دەستیپێكرد و بۆ هەموو كوردیش شانازییە، چونكە رانیە بەشێكی كوردستانە و شارێكی كوردییەو ئەم شەرەفەی بە رانیە دراوە شەرەفی كوردە نەك هی فلان و فلان، گەر هەر فلانێك هەبێ گەورەتر نییە لە شەهیدەكان و دەكرێ بڵێین شەهیدەكان سەروەرن نەك هێزی فلان و كاكی فلان، چونكە راپەڕینەكە جەماوەری بوو نەك حزبی!!!

 جەماوەر بەشێك نییە لە حزب، بەڵكو حزبەكان بەشێكن لە جەماوەر، بۆیە هەر لە رانیە تا دوا ناوچە لە كوردستان هەق نییە كەس حەق بە خۆی بدات و پاوانی بكات، چونكە راپەڕینەكە جەماوەری بووەو هێزی پێشمەرگەش بەشێك بووە لەو جەماوەرە و حزبیش بەشێكی تر بووە لە جەستەی ئەم پێشمەرگەیە كە رۆڵەی ئەو جەماوەرەن. بۆیە ئەوەی دەكرێ و باس دەكرێ فلان حزب هەر خۆی بوو بە تەنها، ئەوە بە بۆچوونی من تەنها بچوككردنەوەی دەستكەوتە جەماوەریەكانە بۆ مەبەستی حزبی و بیروبۆچوونی تاكڕەوی. بەڵێ ئەم دەستكەوتە گەورانە لە مێژووی بزاڤی رزگاریخوازی كوردی زۆرجار كەسانێك لەكاتی ئیفلاسبوون و بێهێزبوونیان وەك سەروەت و سامانی ماڵە باوك هەموو شتێك بەهی خۆی دەزانێ بۆ بەرژەوەندی خۆی هەموو شتێك دەخاتە لاوە كاتێك هیچی پێ نامێنێ رۆژێك زەوی باوكی دەفرۆشی و رۆژێك تفەنگەكەی و رۆژێك ئەسپەكەی دەداتە دەست دوژمن پێی دەڵێت قوربان شایەنی تۆیە!!

بەڵێ راپەڕین سەروەت و سامانی گەلی كوردە دەبا وەك خۆی باسی بكەین و كاری لە گەڵدا بكەین و ئەوانەی كە ئەم كارەش دەكەن زۆرباش دەزانن بەر لە راپەڕین بەرەی كوردستانی لە ئەجیندای خۆی ئەو ئەگەرەی دانابوو كە ئەم رۆژە نزیكە و لە چاوەڕوانییە، بەڵام نەدەزاندرا كەوا لە 5/3/1991 چونكە تاكلایەنانە نەبوو هەر حزبەكان بڕیار بدەن، بەڵكو جەماوەر بوو هەڵسایە سەر پێ و جەماوەر بوو بە پێشمەرگەی گوت فەرموون وەرنەوە، بەڵام پێشمەرگەش وەك رۆڵەی ئەم گەلە دانەبڕابوو كە هەردەم بەشێك بوو لەو جەماوەرە، بۆیە جەماوەر پێشڕەوی پێدان كە بە تاكە نوێنەری گەلی دەزانی وەك “بەرەی كوردستانی”. بەڵێ هەر ئەم هێزە جەماوەرییە بوو كە سەدان هەزار چەكداری رژێمیشی هێنا ناو راپەڕینەكەو راپەڕینەكە بوو بە سەرتاسەری… بەڵێ لە یەك چركە پێشمەرگەو چەكدار و سەرلێشێوان و بێ ئاگایان لە گەل و نیشتیمان و ئەوانەی بەربەست هەبوو لە رێگایان هەموو بوون بە پێشمەرگە، بەڵێ لە یەك بوو بە سەد و لە سەد بوون بە هەزاران، بۆیە دەبێ ئەم بابەتەش وەك بابەتەكانی بازرگانی و ململانێی سیاسی و مەدحی ناو دیوەخان و خۆهەڵكێشانی پەنا دیوارانی لێ نەكرێ.

ئەم بابەتە دەبێ وەك خۆی بنوسرێ و بگوترێ و تۆماربكرێ… راپەڕین راپەڕینی كوردە و جەماوەر خاوەنی راپەڕینە و ئەوەی لەو جەماوەرەیە ئەویش پێشمەرگەیە، ئەوەی گەورەترە لە جەماوەر بچووكترە لەوەی ببێت بە خاوەنی راپەڕین.

* ئەندامی ئەنجومەنی سەركردایەتی پارێزگای هەولێر (پ.د.ك)

زیاتر

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابه‌تی تر

ئەنجوومەنی وەزیران بڕیاری لەبارەی مووچەی فەرمانبەران دا و دەستکاری ناکرێت

ئەنجومەنی وەزیران بە کۆی دەنگ بڕیاریدا کە بەرنامەی ئەنجومەنی وەزیران دابینکردنی مووچەی فەر…