خەبات: هاوار مورتكەیی:- دوای ماوەیەك دابڕان لەكردنەوەی پاڵەوانێتییەكانی شەترەنج لە هۆلەكان، یانەی شەترەنجی خانزاد بڕیاریدا بەكردنەوەی دوازدەهەمین پاڵەوانێتی بلیتزی خانزاد، دەست بە چالاكییەكانی بكاتەوە.

سبەی پێنج شەممە لە هۆلی یانەی شەترەنجی خانزاد، دوازدەهەمین پاڵەوانێتی شەترەنجی بلیتزی خانزاد لە هۆلی یانەكە بەڕێوەدەچێت، كە بڕیارە ژمارەیەكی زۆری شەترەنجزانانی كوڕ و كچ لە سەر ئاستی كوردستان و عێراق و وڵاتانی دەورووبەر بەشداری تێدا بكەن، پاڵەوانێتیەكەش بۆ ماوەی یەك رۆژ بەسیستەمی سویسری 3 خولەك+2چركە لەلایەن ناوبژیانانی یانەی خانزادەوە بەڕێوەدەچێن.

پاڵەوانێتی ئۆنلاین

لەمبارەیەوە د. دلزار حەمەساڵح سەرۆكی یانەی شەترەنجی خانزاد لە لێدوانێكی تایبەت بۆ لاپەڕەی وەرزشی رۆژنامەی خەبات سەبارەت بەم پاڵەوانێتییە و بەردەوامیی چالاكییەكانی گوتی: بەلەبەرچاوگرتنی ئەو دۆخەی بەهۆی پەتای كۆرۆناوە هاتە پێش، وەك هەموو ناوەندەكانی شەترەنجی جیهانی، ئێمەش چالاكییەكانمان بۆ ماوەیەك راگرت، بەڵام لەگەڵ ئەوەشدا نەمانهێشت شەترەنجزانان لە یاریكردن داببڕێن و چەندی پاڵەوانێتی ئۆنلاینمان كردەوە، خۆشبەختانەش توانیومانە لێی سەركەوتوو بین و ئامانجەكە بپیكین و زۆرترین بەشداری لە پاڵەوانێتییە ئۆنلاینەكان هەبوو.

پاڵەوانێتییەكی باوەرپێكرا

دواتر سەرۆكی یانەی شەترەنجی خانزاد گوتی:  ئێستاش بەپەیڕەوكردنی رێنماییەكانی خۆپاراستن لەم پەتایە دووبارە دەست بەچالاكییەكانمان كردەوە سبەی پێنج شەممە دوازدەهەمین پاڵەوانێتی بلیتزی خانزاد بەڕێوەدەچێت، پاڵەوانێتییەكەش بەهەماهەنگی لەگەڵ یەكێتی شەترەنجی عێراق، لەلایەن یەكێتی شەترەنجی نێودەوڵەتییەوە تۆمار دەكرێت و پاڵەوانیتییەكی باوەرپێكراو دەبێت، هەوڵ دەدەین وەك جاران پاڵەوانێتییەكان دەست پێ بكەینەوە.

كتێبی شەترەنجی قوتابخانە ئامادەیە

لە كۆتاییدا  د. دلزار حەمەساڵح لەبارەی هەنگاوەكانی خوێندنی وانەی شەترەنج لە قوتابخانەكان گوتی: ئەم پرۆژەیە بە ستراتیژیترین پرۆژەكانی یانەكەمان دەزانین و وازی لێناهینین و دەمانەوێت لەداهاتوودا بەسەركەوتویی بەهەمانهەنگی لەگەڵ وەزارەتی پەروەردەو بەڕێوەبەرایەتی گشتی وەرزشی هەرێمی كوردستان بەئەنجامی بگەیەنین، ئێمە ئامادەكاری تەواومان بۆ كردووە حالی حازر كتێبی بۆ پۆلی پێنجەمی بنەڕەتی بەناوی شەترەنجی قوتابخانە ئامادەیە بۆ بەچاپگەیاندن، ئومێدەوارین لایەنە پەیوەندارەكان ئەم بابەتە بەهەند وەرگرن و شەترەنج بكرێتە وانەیەك لەقوتابخانەكان، هەروەها گوتی: راستە ئەم پرۆژەیە هێندە ئاسان نییە بۆ ئەنجام گەیاندنی، بەڵام بەتەواوبوونی، سوودێكی زۆر بۆ نەوەكانی داهاتوومان دەبەخشێ و وڵاتانی دونیا دوای درك كردن بە گرنگیی وانەی شەترەنج بۆ قوتابیان،  ئێستا لە زۆربەی وڵاتانی جیهان وانەی شەترەنج لە قوتابخانەكان دەخوێندرێت.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابه‌تی تر

چارلێز ڤان زێل لەدیدارێکدا بۆ خەبات: دەمەوێت ناسنامەی WGM لە ئۆڵۆمپیادی داهاتووی رووسیا بەدەست بێنم

خەبات: هاوار مورتكەیی:- چارلێز ڤان زێلی خانمە شەترەنجزانی هەڵبژاردەی خوارووی ئەفریقا لە لێ…