قوتابیە یەكەمەكانی هەرێمی كوردستان لەدیدارێکی “خەبات”

0
224

خەبات: ڕۆشنا عەلی:- ڕۆژی 12/8/2020 لە كۆنگرەیەكی ڕۆژنامەوانیدا ئالان حەمە سەعید وەزیری پەروەردە و كەریم لە تیف بەڕێوەبەری گشتی ئەزموونەكان ئەنجامی تاقیكردنەوەكانی پۆلی 12 ی هەرسێ‌ بەشی زانستی و وێژەیی و پیشەیی و خوێندنی ئیسلامی و ناوی یەكەمەكانی هەرێمی كوردستانیان ڕاگەیاند،  لە كۆنگرەكەدا وەزیری پەروەردە ئاماژەی بەوەدا كە 144142 قوتابی مافی بەشداربوونیان هەبووەو ژمارەی ئەوانەی كە لە خولی یەكەم سەركەوتنیان بەدەست هێناوە 47328 قوتابیە و 86 قوتابیش لە ڕیزبەندی یەكەمەكانن ڕێژەی دەرچوون لەبەشی  زانستی( 41.71 %) لەبەشی وێژەیی ( 35.34%) بووە و لەبەشی پیشەیی (21%)ە.  لاپەڕەی پەروەردەو خوێندن  دیمانەی تایبەتی لەگەڵ سەرجەم یەكەمەكانی هەرێمی كوردستان ئەنجامدا كەژمارەی یەكەمەكان لە هەموو بەشەكان یانزە قوتابیە.    

مامۆستای قوتابخانە 

*سەرەتا قوتابی دەریا سلێمان عەلی یەكەمی هەرێمی كوردستان لەبەشی زانستی پارێزگای دهۆك لە قوتابخانەی ئامادەیا بژارەیا تێكەڵ  پەروەردەی ڕۆژهەڵات بە كۆ نمرەی 700و نمرەی 100 كە باوكی كاری پارێزەرەو دایكی مامۆستایە لەبارەی یەكەمییەكەی خۆی بۆ خەبات وتی: من لە هاوینەوە دەستم بە خوێندن كردو مامۆستای تایبەتم هەبوولەوانە زانستییەكان ،بەڵام هەمان مامۆستاكانی قوتابخانەكەی خۆم بوون، چاوەڕێی ئەوەم دەكرد لە یەكەمەكانی هەرێم بم ، كاتێك وەزیری پەروەردە تەلەفۆنی بۆكردم پێم وانەبوو لە یەكەمەكان بم ، چاوەڕێی دووەم و سێیەمم دەكرد، چونكە غەڵەتم هەبوو، بەڵام لەقەرەبووكردنەوەكە سوود مەند بووم لە بابەتی عەرەبی بە چوار نمرە.

دەریا دەربارەی پرسیارەكان وتی:كێشەی ئێمە ئەوەبوو  لەوەرگێڕانی پرسیارەكان بۆ بادینی هەڵە زۆر هەبوو ئێمە تێنەدەگەیشتین بە ئاسانی.  

یەكەمێك لە نێوان فەلسەفەو كشتوكاڵدا  

*حەسیبە جەمال عومەریەكەمی هەرێم لەشاری هەولێر لە پەروەردەی ناوەندی هەولێر ئامادەیی كشتوكاڵی هەولێر كۆنمرەی( 827) بە نمرەی( 91.89) باوكی خانەنشینە حەسیبە دەربارەی كۆنمرەكەی و كە بۆچی بەشی كشتوكاڵی هەڵبژاردووە بۆ خەبات وتی : ساڵانی ڕابردووش نمرەكانم زۆر باش بووە خۆم زۆرحەزم لەو بەشە بوو بەخواستی خۆم لە پۆلی نۆوەچوومە بەشی كشتوكاڵ پێم وابوو ئەتوانم لەبەشی كشتوكاڵەوە خزمەت بە كوردستان بكەم هیچ مامۆستایەكی تایبەتم نەبوو تەنها خۆم لە ماڵەوە دەمخوێند.

دەربارەی ئەوەی تاچەند سودی لە تۆڕی كۆمەڵایەتی وەرگرتووە دەریا وتی : تەنها لە یوتیوب سەیری وانەی هەندێك مامۆستام دەكرد و سوودم لێوەرگرت من خۆم حەزم لە بواری فەلسەفەیە توانیومە نامیلكەیەك دابنێم بە ناوی گوڵبژێرێك لە وتەكان كە ئێستا تەنها بە سی دی ئامادەم كردووە و دەمەوێ‌ بیكەم بە كتێب ئەگەر لەتوانامدا هەبوو .

دەربارەی ئەوەشی كێ‌ هەواڵی یەكەم بوونی پێداوە حەسیبە وتی : بەڕێز سەرۆكی حكومەتی هەرێم تەلە فۆنی بۆ كردم و پیرۆزبایی لێكردم زۆر زۆر هەستێكی خۆشم هەبوو وام هەستكرد كە دڵخۆشترین كەسم لەجیهان.

توشبووی كۆرۆناو یەكەمی هەرێم 

*لەنجە هیدایەت عبدلڕەحمان یەكەمی هەرێم لە پارێزگای سلێمانی پەروەردەی ڕۆژئاوا ئامادەیی بازرگانی سلێمانی كچان بە كۆنمرەی 629 بەنمرەی( 89.86 ) باوكی فەرمانبەرە لەنجە بەوتەی خۆی ساڵانی ڕابردوو نمرەكەی وەك ئەمساڵ بەرز نەبووەلەمبارەیەوە وتی:  ساڵانی ڕابردوو نمرەكانم زۆر بەرز نەبوون، بەڵام ئەمساڵ هەوڵم بۆ داوە هیچ مامۆستایەكی تایبەتم نەبوو تەنها بە هەوڵی خۆم

لەنجە دەڵێت:  ئەو پڕۆگرامەی داغڵ نەبوو زۆر نەبوو ئەگەر داغڵیش بوایە هەمان نمرەم ئەهێنا پێش تاقیكردنەوەكان توشی ڤایرۆسی كۆرۆنا بووم و ماوەیەك دابڕام لە دوای 20/6 دەستم بە خوێندن كردەوە.  

یەكەمێكی خوێندنی ئێواران 

*دەرباز ئیسماعیل حەسەن یەكەمی هەرێم لەبەشی وێژەیی لە پارێزگای سلێمانی بەرێوەبەرایەتی پەروەردەی دوكان لە دوكان ئامادەیی ساوێنی ئێواران بە كۆنمرەی( 690) و نمرەی( 98.57) دەربارەی خوێندنی ئێواران و دابڕانی لە قوتابخانەو ئەم نمرەیە بۆ خەبات وتی : من چوار ساڵ وازم لە خوێندن هێنابوو دوای گەڕامەوەو لە پۆلی 10وە دەستم پێكردو هەموو ساڵێك یەكەم و دووەم بووم سەرەتاش وەریان نەئەگرتمەوە وتیان تەمەن گەورەیە بە ناچاری چوومە خوێندنی ئێواران و بەشی وێژەیی، چونكە بەشی زانستی   ئێواران لە دوكان نەبوو نەخولی هاوینەو نە مامۆستای تایبەتم نەبوو تەنها مامۆستاكانی ساوێنی ئێواران بوون. 

یەكەمی لە گەشت و گوزار 

زەینەب عەبدولكەریم یەكەمی هەرێم لە پارێزگای سلێمانی بەڕێوەبەرایەتی پەروەردەی ڕۆژئاوا لە ئامادەیی پیشەیی گەشت و گوزار بە كۆنمرەی 760 بە نمرەی 95 دایكی مامۆستایە زەینەب بۆ خەبات ئاماژەی بەوەدا كە بە نیازی نمرەی بەرزتر بووە ،چونكە بە حسابی وەڵامدانەوەكەی 100 نمرەی بەدەست ئەهێنا، ئەو وتی :  من لە بەغداد ژیاوم تا پۆلی نۆ هەر بەعەرەبی خوێندم دواتر چوومە سەر زمانی كوردی سەرەتا زەحمەت بوو بۆ من هەموویم ئەكردەوە بە كوردی ئینجا لەبەرم ئەكرد.  دەربارەی شێوازوو دەنگۆی هەڵەی پرسیارەكانیش زەینەب وتی: وەرگێڕانەكان ئەوانەی لە عەرەبییەوە كراون بە كوردی هەڵەیەكی زۆری وەرگێڕانی تێدابوو. 

 دوو جار یەكەمی هەرێم 

*حەسەن ئامانج بورهان یەكەمی بەشی زانستی لەسەر ئاستی هەرێم پەروەردەی ناوەندی هەولێر ئامادەیی ژیاری ناحكومی بە كۆنمرەی 700 و بە نمرەی 100 باوكی ودایكی  پزیشكن حەسەن لەپۆلی نۆش لەیەكەمەكانی هەرێم بووە ، لەبارەی مامۆستاكانی و مامۆستای تایبەت وتی : من مامۆستاكانی خۆم زۆر باش بوون و چەند مامۆستایەكی تایبەتیشم هەبوو ،بەڵام بۆچوونم وایە خوێندن هیچ پەیوەندی بە مامۆستای تایبەت و خولەوە نییە قوتابی ئەگەر خۆی زیرەك بێت بە گرنگییەوە بخوێنێ‌ دەتوانێت نمرەیەكی باش بەدەست بهێنێت.  

 دەربارەی ئەوەشی ئەگەر لە قوتابخانەیەكی حكومی بویتایە هەمان نمرەت ئەهێنا ئەو وتی:   قوتابخانەكەم ڕۆڵێكی گرنگی هەبوو ناسراوەو ساڵانە قوتابییەكی زۆری یەكەمی هەیە مامۆستاو ئیدارەكەی هەوڵی ئەوە دەدەن ساڵانە یەكەمەكانییان هەبێت ژینگەیەكی پەروەردەی و زانستییان بۆ قوتابی ڕەخساندووە تا رادەیەكی زۆریش پەیوەندی بە قوتابیەكەوە هەیە قوتابی لە قوتابخانەكەی من هەیە دەرنەچووە،  بەڵام هاندانێكی زۆری تێدایە بۆ قوتابی. 

دەربارەی ئەوەی كەتاچەند وەك قوتابییەك هەست بە هەڵەی پرسیارەكان كرد ئایا هەڵە هەبووحەسەن وتی : پێم وایە زیادەڕۆییەكی زۆر كراوە لەسەر هەڵەی پرسیارەكان كە بەو شێوەیە نەبوو بە بۆچونی من ئەمە زەختی كۆمەڵێك مامۆستایە پێم وایە جوانترین و وردترین پرسیار دانرابوو حاڵەتی دوو وەڵامی هەبوو ، بەڵام بەو جۆرە زۆرە نەبوو.

خواستی وێژەیی  

سارا بەدرخان محەمەد یەكەمی هەرێم لە بەشی وێژەیی لە پارێزگای هەولێر پەروەردەی ناوەندی هەولێر ئامادەیی نەوژینی كچان كۆنمرەی 690بەنمرەی 98.57 باوكی فەرمانبەرەو دایكی كابانی ماڵە دەربارەی یەكەمبوونی بۆ خەبات وتی:  هەموو ساڵێك لە ئامادەیی نمرەكانم بەرز بوون خۆم حەزم لەبەشی وێژەیی بووە  تەنها خولی هاوینەم بینیوە پشتم بە مامۆستاكانی قوتابخانەكەم بەستووە.

دەربارەی ئەو ماوەیەی لە ماڵ بوو تاچەند سودی هەبوو وتی : ئەو ماوەیە زۆر باش بوو ماوەكەی زۆر بوو دەتتوانی بە ئیسراحەت بخوێنی و ئەوەبابەتانەی داغڵ نەبوون كاریگەری زۆرنەبوو. 

 بێزاری و قەلەقی 

*ڤانیا شێركۆ حسێن یەكەمی هەرێم لە بەشی زانستی لە پارێزگای هەڵەبجە بەرێوەبەرایەتی پەروەردەی هەڵەبجەی شەهید كۆلێژی هەڵەبجەی هاوبەشی كچان بە كۆنمرەی 700 و بەنمرەی 100 باوكی سەرپەرشتیاری پەروەردەییە قوتابخانەكەی هاوبەشە حكومی و ئەهلییە . دەربارەی مامۆستاكانی وتی :  مامۆستام نەبووە و تەنها مامۆستاكانی خۆم بوون ، ساڵانی پێشووش نمرەكانم بەرز بوون و هەموو ساڵێك یەكەم بووم. 

دەربارەی ئەو ماوەیەی ئیزن درابوون تاچەند سوودی هەبوو وتی: ئەو ماوەیە بێزار بووین بەراستی جاری وابوو بە دەڕۆژ هیچ وانەیەكم نەخوێندووە قەلەقی زۆرمان هەموو رۆژ دوائەخرا  زۆر سوودی نەبوو بە بۆچوونی من . دەربارەی هەڵەی پرسیارەكانیش  ڤانیا وتی:  من هەستم نەكردووە هیچ هەڵەیەك لە پرسیارەكان هەبووبێت .

 دانیشتووی ناحیەی سیروان 

*لەنیا فەلاح حەسەن یەكەمی هەرێم لەبەشی زانستی لە پارێزگای هەڵەبجە پەروەردەی هەڵەبجەی شەهید ئامادەیی هەڵەبجەی كچان كۆنمرەی 700 بە نمرەی 100 دانیشتووی ناحیەی سیروانەو لە هەڵەبجە ئەخوێنێ‌ هەموو ساڵێك نمرەی بەرزی هێناوە و یەكەم و دووەم بووە لەبارەی شێوازی خوێندنی وتی : من تەنها پشتم بە مامۆستاكانی خۆم بەستبوو  قوتابخانەكەشمان ئەمە یەكەم ساڵ نییە نمرەی بەرزی تیا بێت ساڵی 2014 یەكەمی هەرێمی هەبوو خۆم پیشبینی نمرەكەم ئەكرد، چونكە هەوڵێكی زۆرم بۆ دابوو كاتێك پرسیارەكانم ئەبینی هەموویم ئەزانی هیچ شتێیەكی تیا نەبوو نەیزانم . 

یەكەم لە پیشەسازی 

* میر ڕەحیم كەریم یەكەمی بەشی پیشە سازی لە پارێزگای سلێمانی بەڕێوەبەرایەتی پەروەردەی ڕۆژئاوا ئامادەیی پیشەیی زانستی كۆمبیوتەر بە كۆنمرەی 750 و بە نمرەی( 93.75) كاری باوكی  مامۆستایەو باوك و دایكی هاندەری سەرەكی ئەو بوون. دەربارەی هەڵبژاردنی بەشی پیشە سازی و كۆمبیوتەر وتی : لەگەڵ ئاوات و ئامانجی خۆم دا بوو ، قۆناغەكانی پێشتر باش بووم ، بەڵام هەر لە سەرەتای ساڵی خوێندنی {٢٠١٩-٢٠٢٠} قۆناغی ١2 بریارم دا كە یەكەمی هەرێم بم ، پشت بە خودای گەورە توانیم بە ئامانجەكەم بگەم و خۆشم چاوەڕێم دەكرد یەكەم بم.  

داخستنی سۆشیال میدیا 

*مینا زاهیر مستەفا یەكەمی بەشی خوێندنی ئیسلامی لە پارێزگای سلێمانی پەروەردەی ڕۆژئاوا لە دواناوەندی شافیعی كچان بۆ خوێندنی ئیسلامی بە كۆنمرەی (874)و بە نمرەی (97.11) باوكی پزیشكەو بە خواستی خۆی چۆتە بەشی خوێندنی ئیسلامی.  دەربارەی هەڵبژاردنی بەشی خوێندنی ئیسلامیش مینا وتی : زۆرم حەز ئەكرد ببمە قوتابیەكی خوێندنی ئیسلامی وهەڵبژاردنم بۆ ئەم بەشە لای من باشترین بڕیاری ژیانم بوو باوكم زۆر هاندەرم بوو متمانەی پێ دەدام هەمیشە پێی ئەوتم تۆ ئەتوانی ودڵنیاشم كە سەرم بەرزئەكەیت.  

دەربارەی ئەوەشی كە ئایا هەست چی بوو كاتێك بیست كە یەكەمی مینا وتی : كاتێك بەڕێوبەری قوتابخانەكەمان پەیوەندی بە باوكم كردوتی : كچەكەت لە یەكەمەكانە وپەروەردە داوای ژمارەكەتانی كردووە ئەو كاتە هەسم ئەكرد كە دڵخۆشترین كەسم لەم ژیانەلەخۆشیا گریام دڵم زۆر ئاسوودە بوو.

دەربارەی بەكار هێنانی سۆشیاڵ میدیاش مینا وتی : زۆربەی بەرنامەكانی سۆشیاڵ میدیام داخست ئەوكاتە تەنها ئەوانەم هێشتەوە كە پێویستم پێی بوو بۆ پەیوەندی وپرسیار كردن وزەرەریشی نەبوو بۆم ، چونكە خۆم بەباشی بەكارم ئەهێنا بەرژەوەندی خۆمم ئەزانی.

   

زیاتر

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابه‌تی تر

یانەی شەترەنجی خانزاد دەست بە چالاكییەكانی خۆی دەكاتەوە

خەبات: هاوار مورتكەیی:- دوای ماوەیەك دابڕان لەكردنەوەی پاڵەوانێتییەكانی شەترەنج لە هۆلەكان…