خەبات: هاوار مورتكەیی:- وڵاتی ئیمارات یەك لەو وڵاتانەیە كە بەم دواییە بایەخێكی زۆری بەیاری شەترەنج داوە و ناوە ناوە پاڵەوانێتییەكانی جیهان لەئامێز دەگرێت و چەندین یانەو پەیمانگای تابەت بەشەترەجی هەیە و دیارترین ناوەكانی شەترەنجی جیهانیش راهێنەرایەتیان دەكات، گەورەترین یانەی شەترەنجی جیهانیش لەم وڵاتەیە كە یانەی شارقەیە، خاتوو زوحا عەدنان موعەلم راهێنەری ئەو یانەیه، لەهەمان كاتیش ناوبژیوانی نێودەوڵەتییە، لاپەڕەی وەرزشی رۆژنامەی خەبات لە دیمانەیەكی لەگەڵ ئەنجامدا و وێرای باس لەكاروانی وەرزشی خۆی، ئاماژەی بەو یانەیە و بایەخی ئەو وڵاتە بۆ شەترەنج داوە.

قۆناغە زێڕینەكان
‌زوحا عەدنان ئەلموعەلم ناوبژیوان و راهێنەری یانەی شارقەی ئیماراتی لە ساڵی 1971 لە شاری ئیدلب لە سوریا لە خێزانێكی شەترەنج دۆست لەدایك بووە، هەر لەوێش كۆلیژی مافی لە زانكۆی ئیدلب تەواو كردووە، لەهەمان كاتیش یاریزانی هەڵبژاردەی سوریا بووە لەچەند بۆنەیەكی نیودەوڵەتیدا، ئەو دەڵێت: لە رێگەی د. عدنان معلم كە باوكمە فێری ئەو یارییە بووم، ساڵی 1984 بۆ یەكەمین جار بەشداری پاڵەوانێتی شەترەنجم كرد كە پاڵەوانێتی كۆماری بوو بۆ ئافرەتان، دواتر لەتەمەنی 13 ساڵی لە پێكهاتەی سەرەكی هەڵبژاردەی سوریا وەرگیرام، هەروەها لە یانەیه ئومییە لە ئیدلب یارییم دەكرد، لەگەڵ هەڵبژاردەی وڵاتەكەم بەردەوام بووم تا ساڵی 1991 و لەچەندین پاڵەوانێتیدا لەناوخۆ و دەرەوە بەشداریمان كرد، دواتر بۆ ماوەیەك بەهۆی بارودۆخێكی نەخوازراودا لەو یارییە دووركەوتمەوە، بەڵام كاتێك چوومە ئیمارات لەوێ دەرفەت زۆر هاتنە پێش و كاتیكیش سەردانی یانەی شارقەم كرد، كە گەورەترین یانەیە لە جیهان، لەوێ ئەو شەرەفەیان پێدام كە ببمە راهێنەری تازەپێگەیشتووان، لەوێ دەرفەتی ئەوەشیان بۆ رەخساندم كە ناسناوی راهێنەر و ناوبژیوان بەدەست بهێنم ئەویش دوای بەشداری كردنی چەندین خول.

چۆن پەروەردەی منداڵان بكەین؟
ئەم خانمە راهێنەرە لەهەمان كاتیش نوینەری یەكێتی شەترەنجی ئیماراتە بۆ خوێندنی شەترەنج لە قوتابخانەكان زیاتر دەڵێت: بێگومان شەترەنج كاریگەری ئەرێنی زۆری بۆ سەر هەمووان هەبووە، یارمەتیدەرە بۆ سەركەوتن لە تەواوی بوارەكانی ژیان، بەتایبەتیش لە رووی زانستییەكەوە، كە پێویستی بەبیركردنەوەی قوول هەیە، فێری دان بەخۆداگرتن و كۆششت دەكات، شەترەنج فەلسەفەیە و شێوازە رێڕەوی ژیانە، گومان لەوەشدا نییە كە فێركردنی منداڵ لەتەمەنی چوار ساڵیدا هێندە ئاسان نییە، بەڵام ئەمە ئەركی راهێنەرە كە چۆن بتوانێتی خۆشەویستی ئەو یارییە بخاتە ناو دڵ و هزری ئەو منداڵانەوە، هەروەها چۆن وا لەو منداڵانە بكات شەترەنج بكاتە جێگرەوەی یارییە ئەلیكترۆنییەكان، بەڵام ئەمە زەحمەت نییە ئەگەر تەواوی تەكنیك و پێداویستییەكان لەبەر دەست بوون، بەتایبەتیش لەو پرۆگرامە شەترەنجیانەی كە چێژ دەبەخشنە منداڵان، دەبێ ئەو راهێنەرە لەلایەن منداڵەكانەوە خۆشەویست بێت و هەوڵ بدات كە چی بوێت منداڵەكان بەگوێی بكەن، بەهەر شێوازێك بێت سەرنجیان بۆ لای یارییەكە رابكێشێت، بەتایبەتیش لەپێدانی پاداشتی ماددی و لۆژیكی لەوكاتەی ئەو منداڵە كاریكی باش دەكات.

ئەوانەی هاوكاری بوون
لە كۆتاییدا زوحا عەدنان موعەلم كە وەكو راهێنەر و ناوبژیوان و كارگێڕی نوێنەرایەتی هەڵبژاردەی سوریای كردووە گوتی: سوپاسی هەموو ئەمانە دەكەم كە هاوكارو پشتیوانم بوونە بەتایبەتیش باوك و وڵاتی سوریا و یەكێتی شەترەنجی سوری، هەروەها سوپاسی ئیماراتی خۆشەویست و بەتایبەتی سووپاسی یەكێتی شەترەنجی ئیمارات دەكەم، كە لەگەڵیاندا كار دەكەم بۆ بڵاوبوونەوەی وانەی شەترەنج لە قوتابخانەكان ئەمە جگە لە سوپاسێكی تایبەتی بۆ یانەی شارقە و شێخ سعود ئەلمەعال كە سەرۆكی یانە و لەهەمان كاتیش سەرۆكی یەكێتی شەترەنجی عەرەبە.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابه‌تی تر

وەزیری پەروەردە: بەداخەوە هەندێ‌ جار ئەم پرسانە بۆ موزایەدە بەكار دەهێنرێت، دەیانەوێت موزایەدە بخەنە ناو كەرتی پەروەردە

خەبات: رۆشنا عەلی:- وەزیری پەروەردە لە میانەی كردنەوەی قوتابخانەی شاری مامۆستایانی بنەڕەتی…