خەبات: ڕۆشنا عەلی:- دەنگۆی نەمانی گرێبەستی  قوتابخانە هاوبەشەكانی سابیس لەگەڵ وەزارەتی پەروەردەو  دەستپێنەكردنەوەی خوێندن دوای مانگێك لە قوتابخانەكان ، وەرنەگرتنی منداڵانی باخچەكان هاوشێوەی ساڵانی ڕابردوو، پێنەدانی شایستە داراییەكانی مامۆستایانی قوتابخانەی ناوبراو كێشەكانی قوتابیانی پۆلی 12 ی هەمان قوتابخانە پرسیارگەلی ڕۆژانەی ئەم ماوەیەی ناو خەڵكن ، لاپەڕەی پەروەردەو خوێندن بۆ وەڵامدانەوەیان دیمانەیەكی تایبەتی لەگەڵا شیلان خلیل جنید بەڕێوەبەری گشتی فێركردنی بنەڕەتی وباخچەكانی ساوایان ئه‌نجامد ا:  

* پرسیاری سەرەكی ئەوەیە ئایا قوتابخانەكانی سابیس بە نێودەوڵەتی دەمێننەوە؟ 

 بەڵێ‌ %100 بە نێو دەوڵەتی دەمێننەوەو بەردەوام دەبن بە شێوازی ڕابردوو بە هەمان سیستەمی ژمارەی قوتابیان و ئاستی خوێندن و پڕۆگرامی خۆیان و ئێمە بەرپرسیارین لە ئاستیان و كوالێتی خوێندنیان و دابینكردنی خزمەتگوزاری بۆیان.  

* بۆچی تا ئێستا نەكراوەتەوە لە كاتێكدا سابیسی شوەیفاتی  ناحكومی هەمان سیستەمەو كراوەتەوە بە ئۆنلاین دەخوێنن؟ 

ئەوە هەڵەیەكی گەورەیە هەموو جار ئەو دوو قوتابخانەیە وەك یەك تەماشا دەكەن، بەڵام وانییە شوەیفات قوتابخانەیەكی ناحكومی نێودەوڵەتییە مۆڵەتی تایبەتی خۆی هەیە و سیستەمی خۆی هەیە سابیس كۆمپانیایەكی سەربەخۆیەو جیاوازە لە شوەیفات راستە هەردوكیان هەمان سیستەمن ، بەڵام مامۆستاو ئیدارەیان جیاوازە تەنها سیستەمیان یەكە لە ڕووی مادی ئەوان توانایان باشترەو ئێمە بەپێی ئەو بودجەی تەرخانكراوە بۆ ئەو قوتابخانەیە ئیش دەكەین ، هۆكاری ئەوەی تا ئێستا دەوام نەكراوە لەبەر كۆرۆنایە .  

* دەربارەی وەرگرتنی منداڵان لە باخچەكانی منداڵان كە خەڵكێكی زۆر چاوەڕێیە تا ئێستا دیار نییە ئایا بڕیارێك هەیە كە ئەمساڵ منداڵان لە باخچەكانی سابیس وەرنەگیرێت ؟ 

 باخچەكانی منداڵان بە گشتی لە وەزارەتی پەروەردە هەتا ئێستا بڕیارمان نەداوە كە بكرێتەوە، چونكە ئێمە چاوەڕێ دەكەین بارودۆخی كۆرۆنا باشتر بێت ئەو كات ئەنجومەنی وەزارەت كۆدەبێتەوەو بڕیاری لەسەر دەدات، ئێستا ئێمە لە دەسپێكی دەوامین و تەماشای بارودۆخی پۆلی 12و یەك و دوو دەكەین كە هەفتەی داهاتوو دەچنە دەوام كە تاچەند دەگونجێت قوتابخانەكان بە گشتی و باخچەكان بكەینەوە ، باخچەكانیش ژمارەیان كەمە و زەختێكی زۆریش لەسەریان هەیە ، هەر كاتێ ئێمە بزانین دۆخەكە بەرەو باشتر چوو جا چ ئەم مانگە یان مانگی داهاتوو یان وەرزی داهاتوو ئەو كاتە بڕیار دەدەین ،بەڵام بڕیارمان نەداوە ئەمساڵ منداڵی باخچە وەرنەگیرێت، بە تایبەتی مندالێ‌ چوار ساڵی كە بۆیەكەم جار لە ناو باوەشی خێزانەوە دێتە ناو كۆمەڵگا بۆیە زۆر بابەتی تەندروستی هەیە كە منداڵ بەو تەمەنە نایزانێت و ڕاستە كۆرۆنا كاریگەری زۆر لێناكات،  بەڵام دیسان دەترسین هۆكارێك بن بۆ گواستنەوە بۆ ناو خێزانەكانی خۆیان ، خاڵێكی تر ئەوەیە كە قۆناغی باخچەی منداڵان قۆناغێكی ئیلزامی نییە واتە هەر كاتێك بێت ئێمە دەتوانین قەرەبووی ئەو منداڵانە بكەینەوە.

* دەربارەی ئەو دەنگۆیانەی كە دەڵێن گوایە سابیس هیچ گرێبەستێكی لەگەڵ وەزارەتی پەروەردە نەماوە تاچەند راستە؟

 بۆ ئەمساڵ ماوە گرێبەستەكەیان  واتە 2020-2021 و بۆ سێ‌ ساڵی داهاتووش نوێمانكردۆتەوە واتە تا ساڵی 2023-2024  ئێستا لە ئەنجومەنی وەزیرانە هەركاتێك ئەنجومەنی وەزیران ڕەزامەندی لەسەر بدات بۆ سێ‌ ساڵی تر نوێدەبێتەوە .

* دەربارەی كێشەی سەرەكی مامۆستاكانی سابیس كە گلەییان زۆرە و ماوەی ساڵێكە شایستە كانی خۆیان وەرنەگرتووە بۆچی ئەم شایستانەیان دوادەكەوێت و پێیان نادرێت ؟ 

ئێمە لە هەوڵێكی بەردەوامین بۆ چارەسەركردنی ، ئەو كێشەیەش پەیوەندی بە قەیرانی داراییەوە هەیە لە هەرێمی كوردستان ئێمە لەگەڵ جەنابی وەزیر لە هەوڵی بەردەوامین بۆ دابینكردنی ئەو پارەیە كە بڕێك پارەی زیادە مامۆستایان لە بەرامبەر درێژی دەوامی قوتابخانەكە وەریدەگرن، جگە لە مووچەكانیان دوێنێ‌ خۆم لەگەڵ جەنابی وەزیری دارایی بووم هەوڵێكی جدی دەدەین بە زووترین كات كێشەی شایستە داراییەكانی مامۆستاكان چارەسەر بكەین.  

* ئەوان دەڵێن لە پار ساڵەوە بەڵێنمان پێدەدەن و جێبەجێناكرێت ؟ 

هەر لە ساڵی پارەوە قەیرانی دارایی هەبوو كێشەكەش هەبوو، بەڵام هەندێك لە قوتابخانەكان  بارودۆخیان باشتر بوو، بەڵام ئێستا بەڵێنمان وەرگرتووە و بەم نزیكانە كێشەكەیان چارەسەر دەكەین،

خاڵێكی تریش ئەو پارەیەی بۆ ئەوان پێویستە بڕەكەی زۆرە و بەئاسانی لەم دۆخە دابین نەدەكرا بۆ نموونە لە كەلار بڕێك پارەی پێویست هەبوو مووچەمان بۆ سەرفكردن تا مانگی شەش ، بەڵام ئەم كێشەیە لە هەولێرو سلێمانی دروستبوو ،چونكە مانگی 12 هیچ بڕە پارەیەك لە بانق نەبوو لەو ماوەیە داوامانكردووە بدرێت بە دڵنیاییەوە كێشەكەیان چارەسەر دەبێت.  

 * دەنگۆیەك هەیە كە قوتابی زۆر وەردەگیرێت لە دەرەوەی ڕێنماییەكان و لەپشت تیرو پشكەوە تاچەند ئە م دەنگۆیانە ڕاستە و ئایا ئێوە ئاگادارن؟ 

من لە 1/1/2020 بەرپرسم لەم قوتابخانانە كە خرانەوە سەر وەزارەتی پەروەردە پێشوو تر نازانم پارساڵ لە ڕێگای تیروپشك زۆر شەفافانە وەرگرتن كرا بە بەرچاوی دایك و باوكانەوە لێرەش چەند جار وردبینیمان كردووە و لە كۆمبیوتەر سەیرمانكردووە، بەڵام منداڵی كوڕو كچی شەهید ئەوە لە دەرەوەی تیرو پشك وەردەگیرێن و تەنها لە قۆناغی یەكەمی باخچە ، پارساڵ كورسی بەتاڵ ڕاگەیەنرا كە كۆمەڵێك قوتابی وەردەگرت لە هەموو قۆناغەكان و بەپێی پێویستی قوتابخانەكان كە دەچنە تاقیكردنەوەیەكەوە بە بەرزترین نمرە وەردەگیرێن ئەویش بە فەرمانی وەزاری جگە لەوە  ئەمساڵ لە حەوت قوتابخانەكەی سابیس هیچ منداڵێك لە هیچ قوتابخانەیەك وهیچ قۆناغێك وەرنەگیراوە 

هاتنی ئەم قوتابخانانە بۆ سەر وەزارەتی پەروەردە كارێكی ئاسان نەبوو بە میلاك و قوتابییەوە  چەند بڕیارێكمان دا بۆ باشكردنی ئاستی خوێندن و باشتركردنی بەڕێوەبردنی ئەو قوتابخانانەو ئاستی خوێندنیان  كە مەبەستمان  خزمەتكردنی ئەو قوتابیانە بوو، كاتێك تۆ گۆڕانكارییەك دەكەیت پێویستی بە كاتە،  بەداخەوە هاتنی كۆرۆنا كاریگەرییەكی خراپی هەبوو لەسەر ئەو پڕۆسەیە و ئەوەبوو مانگی 3-4-5 دەوام ڕاوەستا و تاقیكردنەوەكان دواخران ، بەڵام بۆ ئەمساڵا ئەنجامی ئەو گۆڕانكارییە بە زووترین كات دەردەكەوێت، گۆڕانكاریەكانیش بە ئاڕاستەی بەڕێوەبردنێكی باشتر كە بەرژەوەندی قوتابیانیش یەكەم شتە كەلەم پڕۆسەی گۆڕانكاریەدا لەبەرچاو دەگیرێت،  ئامانج و خواستی ئێمەیە منداڵی كوردیش  بەرامبەر منداڵی هەر دەوڵەتێكی تر بەرەو پێش بچن و كێبڕكێی قوتابیانی وڵاتان بكەن و نمرەی بەرز بە دەست بهێنن .

* بۆچی قوتابیانی پۆلی 12  ی سابیس لە قوتابخانەی فاخیر مێرگەسوری حكومی دەوام دەكەن؟

لە گرێبەستی ساڵی 2018 كە ئیمزا كراوە لەبەندی 27 باسی ئەوە دەكات بۆ دوو ساڵ وەكو ئەزموون قوتابیان دەتوانن یان تاقیكردنەوەی نێو دەوڵەتی سات بكەن یان دەتوانن تاقیكردنەوەی وزاری خۆمان بكەن بە پڕۆگرامی وەزارەتی پەروەردە ، بۆ ساڵی 2019-2020 و 2020-2021 ئارەزوومەندانە قوتابی سەرپشك دەكرێت ،بەڵام دوای ئەو دوو ساڵە هەموو تاقیكردنەوەكان دەبێتە نێو دەوڵەتی ،   بۆ ئەمساڵ بەپێی گرێبەستەكە بەمجۆرەیە.  

بەڵام بە مەرجێك كۆمپانیا وەك بەرپرسیارلە كارگێڕی ئەو قوتابخانەیە  قوتابییەكە ئامادە بكات بۆ تاقیكردنەوە نێو دەوڵەتییەكان .    

 * تاقیكردنەوەی نێو دەوڵەتی بەو مانایەیە كە مافیان لە زانكۆكانی حكومەت نەبێت؟ 

نەخێر بەشیان پارێزراوە چ لە زانكۆی حكومی و چ ناحكومی.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابه‌تی تر

وەزیری پەروەردە: بەداخەوە هەندێ‌ جار ئەم پرسانە بۆ موزایەدە بەكار دەهێنرێت، دەیانەوێت موزایەدە بخەنە ناو كەرتی پەروەردە

خەبات: رۆشنا عەلی:- وەزیری پەروەردە لە میانەی كردنەوەی قوتابخانەی شاری مامۆستایانی بنەڕەتی…