بیانییەك لە كوردستان: لە كورد پەرۆشتر بۆ زمانی كوردی … دكتۆر فرانۆ ئیڤیزا: كارەساتە لەناو ماڵی خۆتدا زمانی دایك حیسابی بێگانەی بۆ بكرێ

0
201

دیدار: سابیر حوسێن
ئەو پەروەردەكارێكی پەروەردە ناسە، لەسیستەمە پەروەردەییەكان بیرو بۆچوونی تایبەت بە خۆی هەیە، تەنانەت بچێتە هەر وڵاتێك كاریگەری و شوێن پەنجەی خۆی تێدا جێدەهێڵێ. خۆی دانی بەوە دانا، كە لەسەر دەستی دایك و باوكێكی نەخوێندەواری ئەلبانی پەروەردە بووە، بەڵام لە منداڵیەوە بەرەو ئەمریكا كۆچیان كردووەو لە ویلایەتی مێشیگان گیرساونەتەوە. دایك و باوكی لە ماڵەوە رێگەیان نەداوە جگە لە زمانی ئەلبانی، زمانی دیكەی بیانی بەكار بهێنێ، بۆیە هەر لە منداڵییەوە فێری ئەوە بووە كە زمانی دایك نابێ ركابەری هەبێ،ئەگەر زمانی دووەمیش فێر بووی، نابێ لەسەر حیسابی زمانی دایك بێت، چونكە زمانی دایك موقەدەسە…
ئەو ئەكادیمیستە ناوی دكتۆر فرانۆ ئیڤیزایە، بەرێوەبەری قوتابخانەی بریتانی نێودەوڵەتی(بسك)ە، تێزی دكتۆراكەی لەسەر فرە كەڵچەرییە، لە دیمانەیەكی رووبەروو بۆ رۆژنامەی خەبات جەختی كردەوە، كە تایبەتمەندییەك لە ئەزموونی پەروەردەیی هەرێمی كوردستان سەرنجی راكێشابێت ئەوەیە، كە خێزانەكان كاتێك منداڵەكانی خۆیان دەنێرنە قوتابخانە تایبەتەكانی زمانی ئینگلیزی، هەموو ئاواتیان ئەوەیە كە منداڵەكانیان لە جیاتی زمانی كوردی بە زمانی ئینگلیزی گفتوگۆ بكات، ئەوەش كارێكی زۆر نێگەتیڤەو كەمو كوڕیەكەو جێگەی شانازیكردن نییە، منداڵێك زمانی دایكی خۆی لەبیر بكات و زمانی بیانی فێر بێت ئەوە چ هەستێكی پڕ لە كەمو كوڕیە، دكتۆر فرانۆ ئیڤیزا، جەختی كردەوە كە لەم قوتابخانە نمونەیی و تایبەتانەدا زمانی كوردی وەك زمانی بێگانە مامەلەی لەگەل دەكرێ، چونكە لە كۆی هەموو كاتژمێری وانە وتنەوە بە زمانی بیانی، تەنها دوو كاتژمێر لە هەفتەیەكدا بۆ وتنەوەی زمانی كوردی تەرخان كراوە واتە شەرمنانە پەراوێز خراوە، ئەم زانیاریەش وەك مەرج لەلایەن وەزارەتی پەروەردەی هەرێمی كوردستان فەرز كراوەتە سەر قوتابخانە نمونەیی و تایبەتەكانی نێودەوڵەتی وەك ئێمەمانان. ئەوەش بۆخۆی كارەساتە تۆ لەناو ماڵی خۆتدا زمانی دایكی خۆت حیسابی بێگانەی بۆ بكرێ، ئەم جۆرە مۆدیلە پەروەردەییە لە هیچ وڵاتێكی جیهان وێنەی نییە… دكتۆر فرانۆ ئیڤیزا، بەرێوەبەری قوتابخانەی بریتانی نێودەوڵەتی دووپاتی كردەوە كە ئەم خۆ بەكەمزانینەی تاكی كورد وای كردووە لەسەر سێكتەرەكانی دیكەی ژیانیش رەنگداتەوە، بۆ نمونە پزیشكێكی توركی یان ئێرانی یان ئەڵمانی لە پزیشكێكی كوردی بەباشتر بزانی، یان كەرەسەیەكی ئەمریكی لە كوردی بەباشتر بزانی، ئەمە كارەساتە، من ئێستا هاوڵاتییەكی هەڵگری رەگەزنامەی ئەمریكیم، بەڵام لە كوردستان چارەسەری ددانەكانی خۆم دەكەم نەوەك بچمەوە ئەمریكا، كەچی دایك و باوكێكی كوردی خاوەن بروانامەی بەرز، كە منداڵەكەیان لای ئێمە دەخوێنێ، بە داخەوە بەشانازیەوە هاتبوونە لام و دەیانگوت: ئێمە لەگەل منداڵەكەمان لە ماڵەوەش بە زمانی ئینگلیزی گفتوگۆ دەكەین و زمانی كوردی بەكار ناهێنین، من بەو قسەیە شەرمم لە خۆم كردەوەو راستەوخۆ پێم گوتن، كە فەرامۆشكردنی زمانی دایك كارێكی هەڵەیە، با زمانی دیكە فێر بن، بەڵام فێربوونی زمانی بیانی لەسەر حیسابی زمانی دایك هەڵەیەكی گەورەیە…


دكتۆر فرانۆ ئیڤیزا بۆ خەبات روونی دەكاتەوە: كە نابێ كورد بڵێ ئەوە بۆ هۆكاری ژێر دەستەیی و داگیركاری دەگەرێتەوە، نەخێر من دەلێم وانییە، چونكە ئەوە پەرلەمانی كوردستانو سیستەمی وەزارەتی پەروەردەی هەرێمی كوردستانە رێساو یاسای پەروەردەیی داناوە، خۆ دۆناڵد ترامپ لە ئەمریكاوە نالێ پێویستە بەو شێوەیە زمانی دایك فەرامۆش بكەن و زمانی ئینگلیزی بكەنە زمانی باڵای خۆتان…!!
دكتۆر فرانۆ ئیڤیزا زیاتر دەلێ: وەك شارەزایی خۆم بەلامەوە گونجاوترە كە سیستەمی( 50/ 50 ) بەكار بهێنرێ لەو قوتابخانانەی بە زمانی ئینگلیزی كراونەتەوە لە كوردستان، لەو بارەشەوە پرۆژەیەكی پەروەردەیم پێشكەشی وەزارەتی پەروەردەی حكومەتی كوردستان كردووە، بەڵام تا ئێستا وڵامم نەدراوەتەوە.لە كۆتایشدا دكتۆر فرانۆ ئیڤیزا جەختی كردەوە كە ئەو قوتابخانانەی بە زمانی ئینگلیزی لە هەرێمی كوردستان كراونەتەوە، ساڵانە لەجیاتی ئەوەی مونافەسە لەسەر پێشكەشكردنی باشترین پرۆسەی فێركردن بكەن، كەچی مونافەسەیانە لەسەر ئەوەی كام قوتابخانە زۆرترین قوتابی بۆخۆی رابكێشێ و زۆرترین قازانجی مادی بكات، بەداخەوە دەڵێم ئەوە مونافەسەكردنی (مەگدۆناڵد و كەی ئێف سی) نییە، بەڵكو ئەوە سیستەمی پەروەردەیە، ئەمانەتی نەوەیەكە كە ئایندەی چاوەروانیەتی…

زیاتر

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابه‌تی تر

له‌ پارێزگای دھۆك دەوامی فەرمیی له‌ دامودەزگاكانی حكوومەت راده‌گیرێت

جێگری پارێزگاری دھۆك، رایگەیاند، دەوامی فەرمیی دامودەزگاكانی حكوومەت لە تەواوی سنووری پارێ…