2018-02-14

فارس قادر فەقێ عەبدوڵڵا*

ڤاڵانتاین، ئەم رۆژە هەر وەك دەزانین بووە بە رۆژێكی جیهانی و جەژنێكی خۆشەویستی سەرتاسەری و گشتی، زۆر سەیرە وەك مەسەلەكەی لێهاتووە (دەیخۆی ئەوەیە نایخۆیت ئەوەیە) دەبێت ئەم جەژنە هەر بكەین! باشە چۆن بیكەین؟ هەر لە كۆڵی خۆمانی بكەینەوە و قسەی زل و بریقەداری لەسەر بنووسین؟ یان لەناو دڵەوە بیكەین؟ جارێ بەر لە هەموو شتێك، من پێویستم بە رۆژێك نییە بۆ خۆشەویستی، من پێویستیم بە 365 رۆژە، پێویستم بە هەموویەتی، ئەی ئەو یادە چۆن بكەین؟ باشە لەم وڵاتەی ئێمەدا لە نێوان ئەو هێندە دڕندانەی دەوراوپشتمان جارێك داعش و جارێك بەعس و جارێك میت و جارێك پاسدار، منیش دەڵێم ئەی هاوار كوا دادپەروەری؟ مەڕ بە گورگ بسپێرن و داوای ئەمانیشی لێ بكەن؟! كورد خۆی لە خۆیدا لە خۆشەویستی دروستبووە و بۆ خۆشەویستی دەژیت، پەیكەرتاشەكان وێنەی خۆشەویستییان لە مێژوودا نەخشاندووە، شێخەكان لە تەكیەكانیان دادپەروەرییان پەخشكردووە، فەرموون لە بارزان بەر لە هەموو جیهان مافی ئاژەڵییان پاراستووە لە كاتێكدا خەڵك لە مافی مرۆڤ تێنەگەیشتووە! لە خۆشەویستیدا ئێمە خەج و سیامەندمان هەبووە، ئەسمەری كابایز و مامەر ئاغامان هەبووە، زین و مەمی ئالانمان هەبووە، شیرین و فەرهادمان هەبووە و دەیانی دیكەش. هتد.. بەڵام رۆژیان نەبووە، كەچی مێژوویان هەبووە، چیرۆكی خۆشەویستی لای ئێمەیە، لە ناخی ئێمەیە، ئێمە لێی تێدەگەین و لێی دەزانین و هەر ئێمەش خاوەن مێژووی خۆشەویستین. بەڵام ئێستا لەگەڵ كێ؟ پاسدار كە شانازی دەكەن دوێنێ دەیانگوت بە 6 رۆژ توانیمان پرسی سەربەخۆیی كوردستان تێك بدەین یان لەگەڵ عەبادی یان پاشماوەی بەعس یانیش لەگەڵ شۆڤینییەكانی ئەتاتورك.
ئێمە لەناو حەقد گەورە بووین و خۆشەویستییەوە بۆ رق و كینە لە گوڵەوە بۆ لولەی تفەنگ خۆی لەخۆیدا ئەم خاكەی ئێمە خاكی خۆشەویستییە و هەموو گوڵێكی لەسەر دەڕوێت، بەڵام دوژمنان بارووتییان تێدا چاندووە و هەوای سافە و ئاوی سازگارە، بەڵام ژەهراوییان كردووە، ئەگەر خۆشەویستییەك بێت لەناو بارووت چاندرابێت بەئاو و هەوای ژەهراوی پەروەردە كرابێت، تەنها لە 14/2 تەپڵی بۆ لێدرێت ئەمەم پێویست نییە و مستەورەدە و هی من نییە ئەگەر دەتانەوێت لەگەڵ خەڵك بم، وەك خەڵك بژیم با دەست پێبكەین باروتەكان لەناو ببەین، ئاو و هەوای ژەهراوییەكە پاك بكەینەوە تا بتوانین گوڵەكان جوان پەروەردە بكەین وەك دڵەكان خاوێن بكەینەوە، دڵەكان بەو گوڵانە بڕازێنینەوە دەبا دەستپێبكەین ڤاڵانتاینی كوردی ببوژێنینەوە لەنێوان ماڵەكانمان برایەكان شارەكان گەڕەكەكان حزبەكان با واز لە شیعاری بریقەدار بێنین و تەنها لە 14/2 بە جیهان بڵێین ئێمەش لەگەڵ ئێوەین با وانە بكەین با خاوەنی هەر 365 رۆژ بین و منیش دەڵێم لەو رۆژەدا كە رۆژی جیهانییە با دەست پێبكەین یەكتر ببوورین و جارێكی تر دەڵێم بمبوورن دەتانبوورم خۆشم دەوێن بەسە رق و كینەتان و بەو چاوە تەماشام بكەن، منیش تەماشاتان دەكەم خودا ئەو چاوە كوێر بكات بە چاوی رق و كینە سەیری مرۆڤایەتی دەكات.

*ئەندامی ئەنجوومەنی سەركردایەتی پارێزگای هەولێر “پ. د. ك”

 
چاپکردن   Share گه‌ڕانه‌وه‌