2018-02-12

فارس قادر فەقێ عەبدوڵڵا*

ناونیشانی بابەتەكەم دوو وشەی عەرەبییە، ئێمەی كوردی باشوور زۆر بە كاری دێنین وەك بەكارهێنانی وشەی ئەنفال و كۆمەڵێك بابەتی دیكی لە راستیدا ئەو وشانە هەمووی بۆ نادادپەروەری بەكارهاتوون تا ئەو رادەیەی ئێمەی كوردیش لەنێوان خۆمان زۆربەی كاتەكان بۆ مەبەستی خراپەكاری بەكارمان هێناون، چ لە سەپاندنی باج (زەریبە) یان دەستبەسەرداگرتنی ماڵی یەكتر و بە حەڵاڵ زانینی بە تایبەت لە فەترەی جاشایەتیدا بەداخەوە روویداوە، هەروەها لە سەردەمی ئەنفالەكان دوژمن ماڵی ئێمەی بە غەنیمە زانیوە، بۆ نموونە لە بەرواری 7/2/2018 لە كەناڵی رووداو گوێبیستی ئەوەبووم ئەرتەشی ئازادی سووریا لە عەفرین مریشكیان دزیوە بە حەڵاڵ و غەنیمەی جەنگیان زانیوە بە وێنە و مستەمسەكات پیشانیاندا و شانازیشیان پێوە دەكرد، ئێمە لەو باوەڕەدا نەبووین ئەم كارە شەرمەزارییە ببینین و لێرەدا پرسیارێكی زۆر سەیر دێتە پێشمان، ئەویش ئەرتەشی ئازاد دەبوایە بهاتبان بۆ بەرەنگاربوونەوەی جەیشی توركیا، یان دزینی مریشك؟!
ئەوەش رەنگە بۆ ئەرتەش ئیحراجی تێدا بێت، چونكە من دەزانم چ ئەرتەشی ئازاد بێت یان توركیا بۆ منێكی كورد هەر یەكن و بۆ ئەوانیش كورد هەر كوردە و ئەم گفتوگۆیە منی لە ناخەوە خستۆتە گێژاوێك كە كۆمەڵێك كارەسات و رووداوی سەیری هێناوە یادم، بۆ نموونە كە گوتیان ئەرتەشی ئازادی سووری مریشكی دزیوە و بە غەنیمەی داناوە، هاتەوە یادم برایانی كوردی رۆژئاوا بە هاتنی داعش ئاوارەی كەمپەكانی سنووری هەولێر بوون، یەكێك لە ئاوارەكانی ئەو كەمپانە پیاوێكی رۆشنبیر و تێگەیشتوو بوو، خۆی بە (ئەندازیار) ناساند، گوتی: برادەرانی سالح موسلیم، زەریبەیان لێوەردەگرتین و زۆر ئازاریان دەداین، تا ئەو رادەیەی باجیان لەسەر هێلكەش دانابوو، رۆژانە هێلكەی مریشكەكانیان دەژمارد و رێژەیەك لە هێلكەكانیان دەبرد بە ناوی باج! جا گەر وابێت دەبێ لامان سەیر نەبێت كە دوژمن بێت مریشكەكانمان ببەن.
ئەوكات جاشەكان ترسنۆك بوون، كە گوندەكان كاول دەكران و زەلامەكان دەكوژران، دوای دزیەكان دەكران و بەسەرشۆڕی كارەكەیان دەكرد، ئێستا بەر لە كاولكردن، تاڵانكردن بە ناوی كوردایەتی دەكرێت، كاتی خۆی پێشمەرگە گەر موحتاجی نانیش بوایە، داوای هاوكاری لە خەڵك دكرد وەك هاوكاری و بە رەزامەندی خەڵك و لە خەڵك بێ منەت نەبوون، بەڵام ئێستا زەریبە بە ناوی كوردایەتی كراوە بە حەقێكی رەوا و بێشەرمانە وەردەگیرێت و منەتیش بەسەر میللەتەوە دەكەن، لەبەر ئەوەی بە مریشك و هێلكە دەستمانپێكرد، دەكرێت بڵێین مریشك لە هێلكەیە، یان هێلكە لە مریشكە؟ هیچ جیاوزای نییە، هەمووی هەر یەكە، غەنیمە بێت یان زەریبە، هەردووكیان هەر كاولكارین.
لە مێژووشدا وا بووە لە سەردەمی رژێمی بەعس لە هەشتاكان، لە بازگە رەسمی و كاتییەكان زۆرجار داوای هەویە دەكرا و چەندین جۆر بەڵگە و ناسنامەیان داوا دەكرد، لە كۆتاییدا هیچ هەنجەت نەدەما، دەیگوت: (هسە انتە مو كوردی) كە دەتگوت بەڵێ كوردم، دەیگوت (انزل ولا تناقش) دابەزە و قسەمەكە، دیارە شانسی كوردبە (خاوێنی یان بە پیس) و بە پێشمەرگە و بە جاش هەر كوردە، هەمووی بۆ دوژمن یەك مەبەستە، ئەوەی لەگەڵ ئێران بێت، توركیا دژیەتی ئەوەی لەگەڵ توركیا بێت ئێران دژیەتی ئەوەی لەگەڵ عێراق بێت سووریا دژیەتی ئەوەی لەگەڵ سووریا بێت، عێراق دژیەتی دابەشبوون سوودی نییە، دوژمن لەژێرەوە یەكن لە سەرەوە تەمسیل دەكەن و ئەكتەرن، بەڵام نازانم ئێمە بۆچی بووینە بە ماشە و دار و دەستیان! دەبێت كەی تێبگەین؟ تاكەی ئەوان غەنیمە وەربگرن، ئێمەش زەریبە، بۆچی ئەو میللەتە وەك مەسەلەی مسرییەكان لێبكەین، گەر وا بڕوات دوایی میللەت لێی تێكدەچێت، كام جاشە، كام باشە، ناحەقیش نییە، ئەوەی ئازاری بدات فەرقی نییە، چ كورد بێت یان غەیرە كورد، ئازار درا، دەكەوێتە ناو خانەی زوڵم و ستەم بە تەئكید زوڵم و ستەمی ناوخۆش بە ئازارترە لە هی دوژمن جا بۆیە دەڵێم و دووبارەی دەكەمەوە گەر ئێمە هێلكەمان نەدزیبا، دوژمن نەیدەتوانی مریشك و قەلمان بدزێت! ئاخ و ئۆف بۆ ئەو میللەتەی كاتێك وەك نیچێرێك لە دەست دۆست و دوژمن ئەمانی نەبێت ئای كە مەزلومە و قوڕبەسەری ئەو زۆڵە كوردە بێت ماڵی باوكی دەدزی و دەیدا بە بێگانە، كە وەك ئەوەیە خیانەت لەگەڵ دایكی بكات، دەبا غیرەتمان هەبێت چیتر هێلكەی هەژاران نەبەین، تا دوژمن جورئەت نەكات بڵێت مریشكەكانی كورد غەنیمەن.
 *ئەندامی ئەنجوومەنی سەركردایەتی پارێزگای هەولێر (پ. د. ك).

 
چاپکردن   Share گه‌ڕانه‌وه‌