2018-01-28

ئامادكردنی‮: ‬لاپەڕەی‮ ‬كاروباری‮ ‬سیاسی

زۆرن ئەوانەی‮ ‬لە پێناوی‮ ‬نیشتمان و نەتەوە و مرۆڤایەتیدا خزمەت دەكەن،‮ ‬حاجی‮ ‬فازڵ گەردی‮ ‬یەكێكە لەو مرۆڤانەی‮ ‬سڵی‮ ‬لە توندووتیژی‮ ‬و سزای‮ ‬داگیركەر لە پێناوی‮ ‬خزمەتكردنی‮ ‬لێقەوماوان نەكردۆتەوە،‮ ‬بەداخەوە‮ ‬رۆژی‮ ‬25/1/2018 كۆچی‮ ‬دوایی‮ ‬كرد،‮ ‬بۆ كۆچی‮ ‬حاجی‮ ‬فازڵ بە پێویستمانزانی‮ ‬لەم راپۆرتەدا تیشك بخەینە سەر ژیان و خزمەتەكانی‮.‬

سەرەتا بڵند ئیسماعیل بەرپرسی‮ ‬لقی‮ ‬16 لەبارەی‮ ‬حاجی‮ ‬فازڵ گەردی‮ ‬گوتی‮: ‬حاجی‮ ‬فازڵ گەردی‮ ‬لە كوردپەروەری‮ ‬نموونەی‮ ‬پیاوی‮ ‬دڵسۆز بوو،‮ ‬پێشمەرگەی‮ ‬شۆڕشی‮ ‬ئەیلوول بوو،پاش نسكۆ چەند ساڵێك بۆ باشووری‮ ‬عێراق دوورخراوەتەوە،خواپەرست و دینداربوو،‮ ‬ئەوەندەی‮ ‬سامانی‮ ‬خۆی‮ ‬بۆ كاری‮ ‬خێرخوازی‮ ‬و رەزامەندی‮ ‬خوا و ئاسودەیی‮ ‬ویژدانی‮ ‬خۆی‮ ‬و لە خزمەت هەژاران سەرفی‮ ‬دەكرد،‮ ‬بۆ خۆشی‮ ‬ژیانی‮ ‬خۆی‮ ‬سەرفی‮ ‬نەدەكرد‮.‬

لەبارەی‮ ‬بەهاناوەچوونی‮ ‬چوونی‮ ‬لێقەوماوانی‮ ‬خەڵكی‮ ‬بادینان كە پاش ئەنفال گوێزرانەوە ئۆردوگای‮ ‬جەژنیكان،‮ ‬بەرپرسی‮ ‬لقی‮ ‬16 گوتی‮: ‬لە ساڵی‮ ‬1988 كە بەعس ئەنفالی‮ ‬بادینانی‮ ‬كرد و خەڵكەكەی‮ ‬بۆ دەوروبەری‮ ‬هەولێر راگواست،‮ ‬حاجی‮ ‬فازڵ هەموو سەرمایەی‮ ‬خۆی‮ ‬خستە خزمەتیان،‮ ‬كاتێك كاربەدەستانی‮ ‬رژێم پێی‮ ‬دەڵێن ئەم خەڵكە سزادراون تۆ بۆ‮ ‬یارمەتییان دەدەی،‮ ‬لە وەڵامیاندا دەڵێت تا ئەو خەڵكە لە دەوروبەری‮ ‬من بێت‮ ‬یارمەتییان دەدەم،‮ ‬هەر بەم بۆنەیەوە سەرۆك بارزانی‮ ‬باسی‮ ‬كردووە كە ئەوكات ویستویەتی‮ ‬بە نامەیەك سوپاسی‮ ‬خۆی‮ ‬بەرامبەر ئەم‮ ‬یارمەتیدانە بۆ حاجی‮ ‬فازڵ بنێرێ،‮ ‬بەڵام فەرمووی‮: "‬لەوە ترسام نامەكە بكەوێتە دەست رژێم و ببێتە هۆی‮ ‬ئازار و زەحمەتی‮ ‬بۆ حاجی‮ ‬فازڵ،‮ ‬بۆیە نامەكەم نەنارد‮". ‬لە‮ ‬1991 تا‮ ‬1997 كە وەزعی‮ ‬ژیانی‮ ‬خەڵك خراپ بوو،‮ ‬حاجی‮ ‬فازڵ بەشی‮ ‬زۆری‮ ‬داهاتی‮ ‬دەغڵودانی‮ ‬خۆی‮ ‬بۆ هەژاران دادەنا و كەمێكی‮ ‬بۆ خۆی‮ ‬تەرخان دەكرد‮.‬

‮*‬لەبارەی‮ ‬پەرۆشیی‮ ‬سەرۆك بارزانی‮ ‬بۆ كۆچی‮ ‬دوایی‮ ‬حاجی‮ ‬فازڵ،‮ ‬بڵند ئیسماعیل گوتی‮: ‬حاجی‮ ‬فازڵ زۆر جێگای‮ ‬بایەخی‮ ‬سەرۆك بارزانی‮ ‬بوو،‮ ‬هەفتەیەك بەر لە وەفاتی،‮ ‬جەنابی‮ ‬سەرۆك كاك سیداد بارزانی‮ ‬بە نوێنەرایەتی‮ ‬خۆی‮ ‬بۆ هەواڵ پرسین ناردە لای‮. ‬بۆ پرسەكەشی‮ ‬دیسان كاك سیداد بارزانی‮ ‬بەشداریی‮ ‬كرد و جەنابی‮ ‬سەرۆك هەموولایەكی‮ ‬راسپارد كە بەوپەڕی‮ ‬وەفا و رێزگرتن پرسەكەی‮ ‬بەرز رابگیرێت‮.‬

لەبارەی‮ ‬ژیاننامەی‮ ‬حاجی‮ ‬فازڵ گەردی،‮ ‬عەبدوڵڵا حاجی‮ ‬فازڵ گوتی‮: ‬ناوی‮ ‬تەواوی‮ ‬محەمەد فازڵ ئەبابەكر خورشید ئاغا گەردی‮ ‬،‮ ‬ناسراو بە حاجی‮ ‬فازڵ ئاغا گەردی،‮ ‬لە ریكەو تی1/7/1932 لە گوندی‮ ‬جێژنیكانی‮ ‬ئەبابەكر لە دایك بووە،‮ ‬لە بنەماڵەیەكی‮ ‬نیشتیمانپەروەر پەروەردە بوو،‮ ‬لە زۆربەی‮ ‬بزووتنەوەكانی‮ ‬شۆڕشی‮ ‬كوردستان بەشدار و هاوكار بووە،‮ ‬لەشۆڕشی‮ ‬ئەیلوول بەشداری‮ ‬كردووە و جێگای‮ ‬متمانەی‮ ‬شۆڕش بوو،‮ ‬دوای‮ ‬نسكۆی‮ ‬شۆڕشی‮ ‬ئەیلوول لەبەر هەڵوێستی‮ ‬نیشتیمانپەروەرانەی‮ ‬بۆ‮ ‬باشووری‮ ‬عێراق‮ ‬پارێزگای‮ ‬دیوانیە نەفی‮ ‬كراووە،‮ ‬دوای‮ ‬چەند ساڵێك بەبڕیارێكی‮ ‬حكوومەتی‮ ‬عێراقی‮ ‬بەر لێبوردن كەوت‮ ‬و گەڕایەوە سەر زێدی‮ ‬باب و باپیرانی‮. ‬

لەبارەی‮ ‬چۆنیەتی‮ ‬هاوكاریكردنی‮ ‬لێقەوماوان عەبدوڵڵا حاجی‮ ‬فازڵ گوتی‮: ‬لە ژیانی‮ ‬رۆژانەی‮ ‬خۆیدا رۆژانە‮ ‬یارمەتی‮ ‬هەژاران و لێقەوماوانی‮ ‬داوە لە ساڵی1983 كە حكوومەتی‮ ‬عێراقی‮ ‬ئەنفالی‮ ‬بارزانیەكانی‮ ‬قوشتەپە و بەحركەی‮ ‬دەست پێكرد ئەوانەی‮ ‬توانیان خۆیان بگەینە لای‮ ‬حاجی‮ ‬فازڵ لە دەستی‮ ‬حكوومەتی‮ ‬بەعسی‮ ‬سەدام رزگاریان بوو‮. ‬هەروەها لە ساڵی‮ ‬1988 كە ئەنفالی‮ ‬بادینان كرا،‮ ‬ئەوانەی‮ ‬هێندرانە هەولێر كەوتنە كومەڵگای‮ ‬جێژنیكان،‮ ‬ویژدانی‮ ‬ئەم كەڵە پیاوە ئاسوودە‮ ‬نەبوو تاوەكو‮ ‬هاوكاری‮ ‬نەگەیاندە ئەم لێقەوماوانە،‮ ‬هاوكاری‮ ‬كردنی‮ ‬لێقەوماوان فیداكاری‮ ‬بوو،‮ ‬لەو رۆژگارەدا ئەم هەڵوێستەی‮ ‬حاجی‮ ‬فازڵ توندترین سزای‮ ‬هەبوو،بەڵام گوێی‮ ‬پێ نەدا رۆژ بە رۆژ رژتر دەبوو بۆ‮ ‬یارمەتیدانیان،‮ ‬تاكە هیوای‮ ‬ئەم پیاوە مەزنە رزگاری‮ ‬خاكی‮ ‬كوردستان و دامەزراندنی‮ ‬دەوڵەتی‮ ‬كوردستان بوو،‮ ‬بۆیە هەرچەندە باری‮ ‬تەندروستیشی‮ ‬جێگیر نەبوو،‮ ‬كەچی‮ ‬لە‮ ‬25/9/2017 زۆر بەورەیەكی‮ ‬بەرزەوە،‮ ‬لە ریفڕاندۆم بەشدار بوو،‮ ‬بەداخەوە ئەو ئاواتەی‮ ‬نەهاتەدی‮ ‬و لە‮ ‬25/1/2018 كۆچی‮ ‬دوایی‮ ‬كرد‮.‬

 
چاپکردن   Share گه‌ڕانه‌وه‌