2018-01-09

دڵشاد مستەفا وەسانی

لە لاپەڕە 3 ی ژمارە 7461 ی دوێنێی (كوردستانی نوێ) فەرید ئەسەسەرد ئەندامی سەركردایەتیی یەكێتی نیشتمانی كوردستان، لە (گۆشە) ـەكەیدا بە ناوی (فایلەكانی نێوان هەولێر و بەغدا لە ساڵی تازەدا)، ریفڕاندۆم بە سەركێشییەكی ژێركەوتوو دادەنێت، دوای 16 ی ئۆكتۆبەر زۆر كەس هەوڵی ئەوە دەدات، ئەنجامی ئەو ناپاكییەی روویدا، بشارێتەوە و بیكاتە بۆنەیەك بۆ خۆدزینەوە لە ریفڕاندۆم و لە بەرامبەریشدا، ریفراندۆم بە سەركێشی لە قەڵەم بدات، جارێ پێم سەیرە ئەندامێكی سەركردایەتی یەكێتی، بەو شێوەیە دژایەتی ریفراندۆم بكات، چونكە بڕیارەكە بڕیاری تاكە كەس و یەك حزب نەبووە، بەڵكو بڕیاری تەواوی حزبەكانی ناو پەرلەمان و دەرەوەی پەرلەمان بووە، جگە لە گۆڕان و كۆمەڵ كە دواتر سەردەكانی ئەو دوو حزبەش دەنگیان بە بەڵێ دا، هەر سەبارەت بە بەشداری یەكێتی كە رۆڵێكی سەرەكیی لە ریفڕاندۆمدا هەبووە و بڕیاری سەركردایەتی ئەو حزبە، ئەوە وەبیر نووسەری بابەتەكە دێنمەوە كە خۆی ئەندامی سەركردایەتی یەكێتییە:
*رێككەوتنی سیاسی نێوان یەكێتی و گۆڕان كە لە 17/5/2016 ئیمزا كرا و سەركردایەتی یەكێتی پەسندی كردووە، لە بەشی سێیەم ماددەی 11 ی رێككەوتنەكەدا هاتووە:" هەردوولا كۆكن لەسەر ئەوەی كە مافی چارەی خۆنووسین و سەربەخۆیی مافی گەلی كوردستانە، پێویستە ئامادەكاری هەمەلایەنەی بۆ بكرێت بە ئەنجامدانی ریفڕاندۆمیشەوە".
*رۆژی 13/3/2017 سەركردایەتی یەكێتی نەخشەڕێگەیەكی پەسند كرد، لە خاڵی هەشتەمدا دەڵێ:"ریفڕاندۆم بۆ سەربەخۆیی وەك مافی چارەنووسی گەلی كوردستان لە هەرێم و ناوچە كوردستانییەكانی تر ئامانج و دروشمی یەكێتیە و بۆ بەدیهێنانی ئەم ئامانجەش یەكێتی سوردەبێ لەسەر خەباتی سیاسی و دیموكراتی و ئاشتیانەی خۆی".
*رۆژی 18/6/2017 لە راگەیاندراوی سەركردایەتی یەكێتیدا هاتووە:"ئەنجوومەنی سەركردایەتی جەخت دەكاتەوە كە یەكێتی وەكو پێشەنگی خەباتی مافی دیموكراسیانەی چارەی خۆنووسین، داكۆكیكەری بێ ئەملا و ئەولا دەبێ و تێدەكۆشێ پرۆسەی ریفڕاندۆم لە پێناوی سەربەخۆیی، لە هەرێمی كوردستان و تەواوی ناوچە كوردستانییەكانی دابڕێندراو لە هەرێم سەربخرێ".
*هەروەها بەرپرسی دەستەی كارگێڕیی مەكتەبی سیاسیی یەكێتی بەڕێز مەلا بەختیار لە سەروتاری ژمارە 635 ی رۆژی 27/11/2017 ی رۆژنامەی (چاودێر) بەناوی (ئایا تەنگژەی یەكێتی زادەی ریفڕاندۆمە؟) دەڵێ:"یەك ئەندامی سەركردایەتیش نادۆزیتەوە دژی ریفڕاندۆم بووبێ، واژووی هەموویانم لە لایە" هەروەها لە شوێنێكی دیكەدا دەڵێ:"هەموو ئەوانەی دەیانەوێ ئەنجامی ریفڕاندۆم لە ئۆباڵی وەفدی دانوستانی یەكێتی بئاڵێنن، رۆژێكی نزیك دێ بەڵگەنامەكان بە واژووی خۆیان بڵاودەكرێتەوە و راستییەكان بۆ ڕای گشتی ساغ دەكرێنەوە".
ریفڕاندۆم شكستی نەهێناوە، سەركێشییەكی ژێركەوتوو نەبووە، بەڵكو هەنگاوێكی زۆر گرنگی مێژووییە، یەكەم جارە بە فەرمی خواستی گەلی كوردستان بگاتە هەموو جیهان، جگە لە گەلی كوردستانیش، هیچ هێزێك ناتوانێ بڕیار لەبارەی ئەو بڕیارە مێژووییە بدات، كە 93% ی دەنگدەران دەنگیان بە بەڵێ داوە. ئەگەر ئەو ناپاكییە نەبایە كە لە 16 ی ئۆكتۆبەر روویدا، ئەوا ئێستا كوردستان لە دۆخێكی زۆر باشتردا دەبوو، نەیارانی نەیاندەتوانی بەو زمانە قسەی بەرامبەر بكەن و داخ لەدڵەكان نەیاندەتوانی بە سەركێشیی ژێركەوتوو ناوی بێنن.
دەبێ ئەوەش بگوترێ كە ملهوڕیی بەغدا لە ئەنجامی بەهێزییەوە نییە، بەڵكو كەڵك وەرگرتنە لە خیانەتێكی هەرگیز لەبیرنەكراوی تاقمێكی خۆپەرست و هەوڵدانیان بۆ تێكدانی یەكڕیزی لە كوردستان، بەڕاستی پاكانەكردن بۆ بەغدا لە رێی دژایەتیكردنی ریفڕاندۆم، هیچی لە خیانەتی 16 ی ئۆكتۆبەر كەمتر نییە و هەرگیز ناتواندرێ ئەو خیانەتە گەورەیە بشاردرێتەوە، بە سەركێشی زانینی ریفڕاندۆم و ئیشكردن لەسەر بە هەڵەزانینی ریفڕاندۆم وەك شێوازێكی خەبات، وەك ئەوە وایە بڵێین بەكارهێنانی چەك دژی سەدام هەڵە بوو، هەموو شۆڕشەكانی رابردووی كوردستان و خەباتی هەزاران تێكۆشەر هەڵە بووە و ئەو هەموو خوێنەی رژاوە لە پێناوی دۆزێكی رەوادا نەبووە، ئەگەر بڕواتان پێی نەبووە بۆچی بەشداریتان تێیدا كرد، ئەگەر ئێستاش لێی پەشیمانن بە ئاشكرا رایبگەیەنن كەپەشیمانن.

 
چاپکردن   Share گه‌ڕانه‌وه‌