2017-12-12

خەبات: رانیار دڵشاد

لیۆ ناوێكی دیارە لە تۆڕەكۆمەڵایەتییەكان، ئەو زیاتر لەبواری هونەری وێنەكێشان كاردەكات، كارەكانیشی بەشێوەی 3D دین، هەر لە منداڵییەوە ئارەزووی وێنەكێشان دەكات، لە كۆتایی ساڵی 2007 دەستی بەكاری هونەری وێنەكێشانی ئاسایی كردووە، تا ئێستا وێنەی بۆ بەشێك لە بێژەر و كەسایەتیەكانی ناوخۆ و دەرەوە كێشاوە، ئەو ئێستا لە هەولێر دادەنیشێت، لە دیدارێكیدا بۆ "خەبات" بەم شێوەیە تیشكی خستە سەركارەكانی هونەری وێنەكێشان لە كوردستان.

* سەرەتا كورتەیەك لەژیانت؟
ئەحمەد عوسمان ناسراوم بە "لیۆ خۆشناو" ساڵی 1991 لە شاری هەولێر لەدایك بووم،هەر لەو شارە خوێندنم تەواو كردووە و ئێسا لەهەولێر نیشتەجێم،  (lion)  واتا شێر، هەر لەبەرخۆشەویستیم بۆ شێر هاورێ و كەسانی نزیكم هەر بە لیۆ بانگم دەكەن، لەقەبیشم خۆشناوە بەو بۆنەیەوە بوم بە لیۆ خۆشناو، لە تۆڕە كۆمەڵایەتییەكانیش بە لیۆ خۆشناو ناسراوم ، هەر لە منداڵییەوە ئارەزووی وێنەكێشان دەكەم، لە كۆتایی ساڵی 2007 دەستم بە وێنەكێشانی ئاسایی كرد، بە خۆمم گوت دەبێت رۆژێك بێت ببم بە بەناوبانگترین وێنەكێش، وەك دەبینن ئێستا لەتۆڕە كۆمەڵایەتیەكان كارەكانم باشترین بینەری هەیە.

* وێنەكێش كێیە، ئایا ئەو كەسانەی لەفێرگەكان دەخوێنن دەتوانن ببن بە وێنەكێشێكی تەواو؟
بەكەسێك دەڵێم وێنەكێش كە بتوانێت تۆنەكانی روخساری مرۆڤ لە شوێنی خۆی جێیان بكاتەوە، چوونكە دانانی شێوەی مرۆڤ قورسە دەبێت بەملیم حسابی بۆ بكرێت، لە ئەگەری تێكچوونی هەر ملیمێك هەموو شێوەكەی تێكدەچێت، بەڕای من نەك تەنیا وێنەكێشان، بەڵكو هەموو ئەو  بەشانەی  لە فێرگە هونەرییەكان هەیە، هیچ پێویستی بەوە نییە بۆی بخوێنی، گەر ئارەزووت لە كارێك بێت تەنیا تەركیز و مێشكی خۆت زۆر گرینگە بۆ ئەوەی ببیت بە باشترین وێنەكێش، من  نە خوێندوومە نە مامۆستاشم هەبووە، لە هەر هەڵەیەكی تەكنیكی هەمیشە خۆم مامۆستای خۆم بوومە، لە ئێستاشدا دەستخۆشییەكی زۆرم لێدەكرێت، هەمووان وادەزانن قوتابی ئەكادیمیم، بەڵام لەگەڵا ئەوەشدا خۆشحاڵم لەو ئاستە بەرزە دەمبینن.

* ئاستی هونەری وێنەكێشان لە كوردستان چۆن دەبینن؟
ئەوە من دەبینم گرینگییەكی كەمی پێ دەدرێت، لە فێرگەكان هونەری 3D هەر ناخوێندرێت، لەكاتێكدا پێویستە لە بەشی وێنەكێشان هەموو جۆرەكانی وێنەكێشان بخوێندرێت، ئەوەندەی لێرە تەنیا گرینگی بە وێنەی مانادار یان ستایلی ژیان دەدرێت،ئەوەندە گرینگی بەكاری راستی نادرێت.

* ئەوەی ئێمە دەبینین زیاتر كارەكانت بەشێوەی  3Dدین، كێشانی وێنەیەكی كەسی بەو كوالیتیە چەند دەخایەنێت؟
من هەر بەو كوالیتیە بەردەوام دەبم، بۆ كاركردن لەسەر وێنەیەكی كەسی 10تا 30 كاتژمێژ كاركردنی دەوێ،چوونكە ئەو هونەرە پێویستی بە وردەكارییە.

* تاوەكو ئێستا لەلایەن هیچ دەزگا و كۆمپانیایەكی هونەری داوای كاركردنت لێنەكراوە؟
لە زۆرێك لە كۆمپانیا و لایەنە سیاسیەكان داوام لێكراوە ببم بە وێنەكێشی تایبەتییان،بەڵام من دەمەوێت  لە ئێستادا سەربەخۆبم و هەموو كەسێك ئاشنای كارەكانم بێت.

* تا ئێستا چەند وێنەتان كێشاوە، ئایا لەلایەن ئارەزوومەندانی ئەو بوارەوە داوای كردنەوەی خولتان لێنەكراوە؟
بەڵێ زۆر داوام لێدەكرێت سەنتەری فێركاری بكەمەوە، داواكاریشی زیاتر لەوەیە كە خۆم چاوەرێی لێ دەكەم، وێنەم زۆر كێشاوە بە ژمار نایەت، چونكە كار بۆ هەموو كەسێك دەكەم.

* ئایا بۆ داهاتوو هیچ پڕۆژەیەكی نوێتان هەیە؟
لە ئێستادا كار بۆ پرۆژەیەكی 25 وێنەیی دەكەم،لەنێویاندا وێنەكان دووجۆرن مانادار و 3D، بەشێكی باس لە ئازایەتی پێشمەرگە دەكات، ئەوەی دیكەش باس لە كارەساتی ئاوارەكانی شەنگال، دوای تەواو بوونیان بڵاویان دەكەمەوە.

 
چاپکردن   Share گه‌ڕانه‌وه‌