2017-11-29

موحسین خالیدی

ھەبوونی ئۆپۆزسیۆنی راستەقینە و كارا و دوور لە دروشم، پێویستییەكی گرنگی ھەر دەسەڵات و حكومەتێكە تا بە وردبینی زانستیانە و ئەوینێكی نیشتمانیانە و دوور لە ھەر رق و قینێك، ئاگای لە ھەر ھەنگاوێكی دەسەڵات بێ و بە پێی پێویست رخنە بگرێ و ھاوكات بە پێشنیازەكانی،  رێنیشاندەریش بێ، بەڵام ئۆپۆزسیۆنێك كە تەنیا بیانوو بگرێ و ئامادە نەبێ دان بە كردەوە باشەكانی دەسەڵاتە بنێت و ھەموو شتێك رەش نیشان بدات و داتا و زانیاریی ھەڵە بە گوێی خەڵكدا بچرپێنێ و تەنانەت لەو ھەلومەرجە نیشتمانییانەی پێویستی بە كۆدەنگی ھەموو لایەنەكان ھەیە، دیسان بیانوو بێنێتەوە و لە باتی ھەڵمەتێكی نیشتمانی دژ بە كەسانی خاكفرۆش، خۆی بە پرۆژە و نووسینەوەی خاڵ و .. خەریك بكات، دەبێتە ئۆپۆزسیۆنێك كە لە بازنەی دروشم و خۆڵ لە چاوی خەڵك كردن دەسوڕێتەوە.
بارودۆخی كوردستان دوای خەیانەتەكەی 16 ئۆكتۆبەر و ھێڕشی سوپا و حەشدی شەعبی بۆسەر ھەرێم و گەلەكۆمەكێی وڵاتانی دراوسێ و ئابلوقەدانی ئابووریی كوردستان، ئەوەی دەخواست و واش چاوڕوان دەكرا كە ھەموو لایەنەكان لە پشت حكومەتی كوردستان بێستن و یەك دەنگ و یەك گوتار، دژ بە بەغدا و وڵاتانی دراوسێ ھەڵوێست وەربگرن، كەچی ئەوەی لەم ماوەیە دیتمان، بێدەنگیی ئۆپۆزسیۆن لەمەڕ ئەو خەیانەتە و دیسانەوە خۆدوورگرتن لە حكومەتە خۆماڵییەكەمانە. ھەوڵدانە بەردەوامەكانی حكومەتی ھەرێمی كوردستان بۆ كۆبوونەوە و لێك نزیككردنەوەی لایەنەكان بە مەبەستی سازكردنی كۆدەنگی، لەلایەن ئۆپۆزسیۆنەوە بە پرۆژە وەڵام درایەوە. پرۆژەی دانانی حكومەتی كاتیی رزگاریی نیشتمانی؟؟؟!! ئەم پرۆژەیەش وەك زۆربەی جاران لە دروشمێكی زەق زیاتر ھیچ ھەڵناگرێت. بۆ سەلماندنی ئەمەش، ئاوڕێكی بەپەلە لە رابردوویەكی نە زۆر دوور دەدەینەوە. یانی بۆ كاتی دامەزراندنی ئەم كابینەیەی ئێستا كە ھەموو لایەنەكان تێیدا بەشدار بوون. لەبیرمانە چەندین مانگی خایاند تا حزبەكان (بەتایبەت لە سلێمانی) توانیان لەسەر كاندیدەكانیان بگەنە رێككەوتنی ناوخۆیی. بە ئاماژە بەوەی كە ئەودەم كێشە ناوخۆییەكانیان وەك ئێستا لە لووتكە نەبوون، پرسیار ئەوەیە، ئێستا لەم ماوە كەمە كە تا ھەڵبژاردن ماوە، چۆن وەزیرەكانیان دەستنیشان دەكەن؟ لەراستیدا، بە سەرنجدان بەو بارودۆخە سەپێنراوەی سەر كوردستان، كابینەی نوێ چی دەتوانێ بكات كە ئەم كابینەیە پێی ناكرێت؟ مەگەر ھەر ئەم لایەنانە كە ئێستا ھەن، بەشداریی كابینە كاتییەكە ناكەن؟ مەگەر وەزیرە نوێكان كارتی سیحرییان پێیە؟ بە بڕوای من، ئەوە تەنیا خۆدزینەوە لە ئەو واقیعە تاڵەیە كە بەسەر كوردستاندا سەپێنراوە و تا بە ھەر بیانوویەك بێ، ھیچ بەرپرسیارەتییەك لە ئەستۆ نەگرن.  

 
چاپکردن   Share گه‌ڕانه‌وه‌