2017-10-08

خه‌بات: هاوار مورتكەیی

دوای‮ ‬ئەوەی‮ ‬ئاریان سەعیدی‮ ‬كچە لەشجوانەكەی‮ ‬رۆژهەڵاتی‮ ‬كوردستان لە پاڵەوانێتی‮ ‬نێودەوڵەتی‮ ‬لەشجوانی‮ ‬پلەی‮ ‬یەكەمی‮ ‬بەدەست هێنا كە لە ویلایەتە‮ ‬یەكگرتووەكانی‮ ‬ئەمریكا بەبەشداری‮ ‬چەندین وڵاتی‮ ‬جیهانی‮ ‬بەڕێوەچوو،‮ ‬ئێستاش ئاریان خان خۆی‮ ‬بۆ پاڵەوانێتییەكی‮ ‬دیكەی‮ ‬نێودەوڵەتی‮ ‬ئامادە دەكات كە پێی‮ ‬دەڵێن‮ ‬NATIONAL QUALIFIER YORTON CUP‮‬ و ئومێدی‮ ‬زۆرە بتوانێت پلەی‮ ‬یەكەم بەدەست بهێنێت‮.‬

ئاریان سەعیدی‮ ‬لە رێگای‮ ‬تەلەفۆنەوە پەیوەندی‮ ‬بە رۆژنامەی‮ ‬خەباتی‮ ‬كردوو سەبارەت بەو پاڵەوانێتییە لە لێدوانیكی‮ ‬تایبەتدا گوتی‮: ‬ئێستا مەشقێكێ چڕ‮ ‬دەكەم و هەوڵ دەدەم تەواو ئامادە بم بۆ ئەو پاڵەوانێتییەی‮ ‬لە ئەمریكا بەڕێوەدەچێت‮.‬

هەروەها گوتی‮: ‬ئەو پاڵەوانێتییە بە بەشداری‮ ‬چەندین وڵاتی‮ ‬جیهانی‮ ‬لە ڤێرجینیا لە‮ ‬21ی‮ ‬ئەم مانگە بەڕێوەدەچێت و ئەگەر بتوانم پلەی‮ ‬یەكەم بەدەست بهێنم،‮ ‬ئەوا سەردەكەوم بۆ فینالی‮ ‬جیهانی‮ ‬كە پاڵەوانێتییەكەش لە‮ ‬28ی‮ ‬ئەم مانگە لە واشنتۆن بەڕێوەدەچێت، بۆیە ئەو ماوەیە زۆر خۆم ماندوو دەكەم،‮ ‬بۆ ئەوەی‮ ‬بتوانم ببمە پاڵەوانی‮ ‬جیهان‮.‬

دواجار ئاریان سەعیدی‮ ‬لەشجوان دەڵێت‮: ‬ئەم پاڵەوانێتییە زۆر گرنگ و جێی‮ ‬بایەخە لای‮ ‬وڵاتانی‮ ‬جیهانی،‮ ‬هەربۆیەشە خەڵاتێكی‮ ‬گەورە بۆ براوەكان تەرخان كراوە،‮ ‬بۆیە دەمەوێ ئەمجارە نوێنەرایەتی‮ ‬كوردستان بكەم لەم پاڵەوانێتییە،‮ ‬وە بە ئاڵای‮ ‬كوردستانەوە بەشداری‮ ‬دەكەم، دەمەوێ ئەو پەیامە بە وڵاتانی‮ ‬بەشداربوو بگەیەنم كە ئێمەی‮ ‬كوردین و وەك ئافرەتی‮ ‬كورد دەتوانین لە گۆڕەپانی‮ ‬وەرزشیشدا لیهاتوویی‮ ‬خۆمان بەدونیا بگەیەنین‮.‬

جێی‮ ‬باسە ئاریان تاكە لەشجوانی‮ ‬ئافرەتی‮ ‬كوردە لەو ماوەیە بەسەركەوتوویی‮ ‬دەركەوتووە،‮ ‬جیا لەمەش جومبازێكی‮ ‬بەتوانایە و لەم وەرزەش لەچەندین پاڵەوانێتیدا بە ئاست بەرزی‮ ‬دەركەوتووە،‮ ‬بەڵام ئەوەی‮ ‬جێی‮ ‬سەرنج بێت ئەوەیە كە هیچ كەسێك سپۆنسەری‮ ‬نییە لەو پاڵەوانێتییانەدا و لەسەر ئەركی‮ ‬خۆی‮ ‬بەشداری‮ ‬دەكات،‮ ‬ئەمە لەكاتێكدا كە قوتابی‮ ‬كۆلێژە و كاریش دەكات‮.‬

 
چاپکردن   Share گه‌ڕانه‌وه‌