2017-09-10


فارس قادر فەقێ عەبدوڵڵا*

هەڵوێست هەوێنی سەربەخۆییە، زۆرجار مرۆڤ لەگەڵ كاریگەریی یەكهەڵوێستی شەرەفمەندانە، لە یەكێكی خۆشەویستی خۆی هەموو رێرەوی ژیانی دەگۆڕدرێت، رەنگە لە سەنگەری بێ ئاگایی و خیانەت، بگەڕێتەوە سەنگەری راستەقینەی خۆی، كە ئەویش سەنگەری گەل و نیشتمانە، رەنگە ببێتە هۆی هێز و توانا و تەقینەوەی بوڕكانێكی پەنگخواردوو لە ناخیدا، بەڵێ وایە، نەك ئەو هێندە، بەڵكو هەندێ‌ هەڵوێستی جوامێرانە مرۆڤ دەگرێنێت و وەك مەسەلەكە گوتەنی، گریانی پیاوانیش مانای خۆی هەیە، بەڵێ، ئەم هەڵوێستەی دایكە ئامینەی خاوەن 9 شەهید، كە لە 9/6/1985 كە چوار لەم شەهیدانە لە زێوە شەهیدبوون، جگەرگۆشەی خۆی بوونە، ئەم شێرە ژنەیان نەرووخاندووە، بەڵكو هەڵوێست و خۆڕاگری ئەم شێرە ژنە بوو بە (مەسەل ئەعلای) سەرۆك بارزانی، هەروەك سەرۆك خۆی دەفەرمووێت كە لەو كات و ساتەدا لە حزوری ئەم شێرە ژنە ئامادە بووە و ئەم شێرە ژنە بە سەرۆكی گوتووە كە نامەوێ فرمێسك لە چاوانت ببینم و ئەو كوڕانەی ماومن، بە قوربانی كوردستانیان دەكەم و شەهیدی جوانەمەرگ ئیدریس بارزانی، ئەویش لەو كاتە ئامادەبوو، پرسیاری لەو شێرە ژنە كردووە و پێی گوتووە، چۆن وا بە جەرگی ئەم شێرە ژنە گوتویەتی (دەبێ بە جەرگبم، خۆ منیان بە غەدر نەهێناوە بۆ ئێرە) كەواتە دەڵێت من خاوەن قەزیەم و چاوەڕوانی ئەم كارەساتەشم، دەبێ رازی بم و لە هەمووشی گرنگتر، دایكە ئامینە منەت لەسەر كوردایەتیش ناكات!
ئەم قسانەی دایكە ئامینەم لە كەناڵی رووداو بیست، لەم جەژنە دیارە چاوپێكەوتنی لەگەڵ كرابوو، دوایش بەرەو گۆڕستانی شەهیدان لە شارۆچكەی سۆران بردرا كە دایكە (عائیشە) لە گۆڕستانەكە چاوەڕوانی بوو، دایكە عائیشە دایكی سێ شەهیدە، لە یەك رۆژدا، كە هەرسێك بەرامبەر بە داعشە دڵڕەشەكان لە زوومار لە 25-10-2015 شەهید بوون، سەرۆك بارزانی بۆ ئەویش فەرمووی (زۆر زەحمەت بوو بچمە دیداری و سەردانی بكەم، وەكو بینیم شعورێكم لا دروستبوو، خۆم زۆر بە بچووك زانی، بەرامبەر بەم گەورەییەی دایكە عائیشە و زۆر شەرمم كرد) سەرۆك دەفەرمووێ دایكە عائیشە پێیگوتم: (دوو كوڕم ماوە، ئەویشیان بە قوربانی كوردستان دەكەم).
بەڕاستی فەرموودەكانی سەرۆك و هەڵوێستەكانی دایكە ئامینە و عائیشە مرۆڤ لە ناخەوە دەهەژێنن داروبەرد، بە قسە دێنن، دەشت و دۆڵ و چیا دەتاسێنن، ئاسان نییە مرۆڤ بتوانێت بەرامبەر بە مردنی چوار كۆرپەی نەڕووخێت و هەڵوێست وەرگرێت و چۆك دانەنێ و رشتر بێت لەسەر خەباتی و ئاسان نییە دایكێك 3 رۆڵەی لە یەككاتدا لە ژێر گڵ بنێت و دوایش بڵێ دووی ترم ماون، ئەویش بە قوربانی كوردستان دەكەم، گەورەییە رێبازێك وەك رێبازی بارزانیی نەمر لە نێوان 30 ساڵ دووجار شێرە ژنەكان ئەم هەڵوێستە بنوێنن، هەر جارێك لە شوێنێك خوێنی رۆڵەیان بڕژێت، بەڵام هەڵوێست نەگۆڕێت، رەنگە دەیان هەڵوێستی دیكە هەبووبێت لەمجۆرانە، بەڵام تۆمار نەكرابن، بە هەرحاڵ لەوەش جوانتر و خۆشتر و جەرگبڕتر و سەر سورهێنەر تر ئەوە بوو كە دایكە ئامینە چوو بۆ سۆراغی دیداری دایكە عائیشە لەسەر قەبرستان (گۆرستانی شەهیدان و نەمران) كە گەیشتن بە یەك دەستیان لە ملی یەكتر كرد و خوێنی شەهیدانی 30 ساڵیان بە یەكتر ئاشنا كرد، زۆر جەرگبڕ بوو كاتی دایكە ئامینە شاد بوو، بە دیداری دایكە عائیشە رێگاورێگا تا بە یەكگەیشتن لە پێش خۆی دەیگوت (خودانی شەهیدان دەگەنە یەك) بەڕاستی ئەم هەڵوێستە ئازایانەی ئەم ژنە گەورانە، پیاوی گەورە دەگریێنن و دایكە ئامینە دیار بوو دوور لە خۆهەڵكێشان بۆ دڵدانەوەی دایكە عائیشە، دەیفەرمووی من 9 شەهیدم بە دەستی خۆم شاردۆتەوە و دایكە ئامینە فەرمووی ئێمە هەر دەمرین با بەسەر بڵندی بێت باشترە، بەڕاستی ئەم هەڵوێستانە مرۆڤی مەرد لە ناخەوە دەهەژێنن و سەرۆكیش ناحەق نییە بڵێت خۆم بە بچووك دەزانم بەرامبەر بە گەورەیی ئەم شێرە ژنانە و فرمێسكیان بۆ دەبارێنم، ئەمانە ویژدان و ناخی مردووان دەهەژێنن، داروبەرد بە قسە دێنن، بەڵێ ئەوانە خودانی شەهیدانن، خودانی كوردستانن، خودانی سەری بڵند و ناسنامەی نەتەوەییمانن، ئەوانە بناغە و هەوێنی سەربەخۆیی كوردستانن، بی َ باكن، چونكە خاوەن خوێنن، خاوەن خاكن و خاوەن مێژووێكی پاكن و بڕوابەخۆن، بۆیە بێ باكن.
منیش لە كۆتاییدا، دەڵێم بە هیچ ناوێك ئاشنا نەبوومە كە گەورەتر و پیرۆزتر و موقەدەس بێت لە ناوی كوردستان، ئەگینا دەمگوت خۆزگە وڵاتەكەمان دەكرا بە ناوی كۆماری ئامینە و عایشەی دایكمان، هەرچەندە لە مێژووی كورد شێرە ژن زۆرن، زۆریشیان سەربازی ونن، بەڵام لەگەڵ ئەوەشدا ئومێد دەخوازم، پەیكەرێكی (دەستە خوشكانە) بۆ ئەو دوو دایكە شەهیدانە دەست لە مل یەكتر دروست بكرێت و لە هەموو دەروازەكانی كۆماری كوردستان دابنرێت و بۆ ئەوەی هەموو دونیا بە ناسینی ئەم دوو شێرە ژنە ئاشنابن و پێشنیار دەكەم زانكۆكانمان گرنگی بدەن بە ژیانی ئەم دوو شێرە ژنە، وەك هەر شۆڕشگێڕ و سەركردەیەك لێكۆڵینەوە و نامەی زانستی لەسەر ژیانیان و خەباتیان بنووسن و خۆزگە خشتەیەك بە ناوی شێرە ژنانی كوردستان دەكرا و هەر شێرە ژنێك كورتەیەك لە ژیانی دەنووسرا تا دەگەیشتە دایكە ئامینە و دایكە عائیشە و لە دایكبوونی كۆماری كوردستان بۆ ئەوەی مێژوویان ون نەدەبوو، بۆ نەوەی داهاتوومان.

*ئەندامی ئەنجوومەنی سەركردایەتی پارێزگای هەولێر پ. د. ك.

 
چاپکردن   Share گه‌ڕانه‌وه‌