2017-09-10

نەزهەت حالی

كات زۆر بە خێرایی تێپەڕ دەبێت و لە ڕۆژی 25\9\2017 ،ڕۆژی دیاریكراو بۆ ڕیفراندۆم نزیك دەبینەوە ، لە ئێستادا كە لە دواین قۆناغەكانی سەربەخۆیی داین و لەو سەردەمەی خێرا گەیشتنی زانیاری ، نەك تەنیا ڕۆژەكان بەڵكو چركەكانیش زۆر گرنگن ، بەڵام ئەوەی تێبینی دەكرێت خەبات و چالاكی سیاسی و بانگەشەكەش بۆ سەربەخۆیی لە ئاستی گشتی و گرنگی و مەزنایەتی پرۆسەكە وەكو پێویست نیە، بەرپرسیارێتیە قورسەكە هەم لە ڕووی خەباتی سیاسی و هەم لە ڕووی بانگەشەوەش كەوتووەتە سەرشانی بارزانی.
ڕاستە ئەركی گەورە و سەرەكی لە سەرشانی بارزانی دایە ، بەڵام ئایا ڕیفراندۆم و سەربەخۆیی تەنیا بۆ بارزانیە یاخود بۆ رزگاری و ئازادی گەلێكە؟ ئایا هەندێك لە ئێمەمانان كە بە دروستی لەو بابەتە هەستیارە ناڕوانین و تەنانەت هەندێكمان لەبەر ڕقی سیاسی بێ مانا و بێ نرخ لە ئاستی مەزنایەتی سەربەخۆیی، نەك تەنیا حەز ناكەین پڕۆسەكە سەر بكەوێت بەڵكو كار بۆ سەرنەكەوتنیشی دەكەین، بیر لەوە ناكەینەوە كە نەك لەبەر خۆمان بەڵكو لە بەر گەلەكەمان و قوربانیدانە بێ شومارەكەی و لەبەر نەوەی داهاتوو كە شایانی ئەوەیە لە وڵاتی خۆی و لە سەر خاكی خۆی لە ژێری سەروەری دەوڵەتی خۆیدا بژیت و ئاسایشی خۆی و نیشتمانەكەی پارێزراو بێت ، هەر لەبەر ئەوە هیچ یەك لە ئێمە لە ڕوی ئەخلاقی و نەتەوایەتییەوە و تەنانەت لە ڕوی ئاینیەوەش نەك مافی دژایەتی كردنی پڕۆسەكەمان نیە بەڵكو ئەركی سەرشانمانە هەڕجی لە دەستمان بێت ، دەبێت بۆ سەركەوتنی ئەنجامی بدەین.
دەڵێن ڕازی خۆشبەختی و بەختەوەری ئازادییە و ڕازی ئازادییش بوێری و ئازا بوونە، بەها و نرخی پاراستنی  ئازادی مرۆڤیش هەمیشە هۆشیار بوونە، واتە بۆ ئەوەی ئازاد بین دەبێت ئازا بین و بۆ ئەوەی هەمیشە بە ئازادی بژین بین دەبێت هەردەم و هەمیشە  وریا و هوشیار بین.
ئێمەی گەلی كوردستانی باشوور بە ئازایەتی و قوربانیدانێكی زۆر نیمچە ئازادییەكمان لە هەرێمی كوردستان بە دەست هێناوە ، بەڵام بۆ گەیشتن بە ڕزگاری و ئازادی هەمیشەی دەبێت هەموومان پێكەوە بوێرانەترداوای مافی ڕەوای خۆمان بۆ سەربەخۆیی بكەین و زیاتر لە هەموو كاتیش هۆشیار بین بۆ ئەوەی كەس ڕێگای ڕزگاریمان لێ نەشێوێنێت و پیلانەكانی نەیاران پوچەل بكەینەوە، هەروەها هیچ پاساوێك و گلەیەك نابێت ڕێگر بێت لە یەكگرتن و پێكەوە تێكۆشانمان بۆ سەربەخۆی. لەبەر ئەوەی تێكۆشان بۆ سەربەخۆی تەنیا قۆستنەوەی دەرفەتەكە نیە بەڵكو پێویستییەكی ژیارییە بۆ پاراستنی بوون و كەرامەتی نەتەوەییمان، مانەوە لە چوارچێوەی عێرااقی شكستخواردوو جگە لە زیان و ڕێگر بوون لە بەرەوپێشڤە چوونمان بۆ دامەزراندنی دامەزراوەكانی دەوڵەتێكی خاوەن سەروەری مودێرن و دیموكراسی و بە فیڕۆدانی دانی كات  و ڕووبەڕووبوونەوە لەگەڵ هەڕەشە بەردەوامەكان  هیچیتر نییە.

 
چاپکردن   Share گه‌ڕانه‌وه‌