2017-07-05

خەبات: رانیار دڵشاد

سۆفی عومەر هاوڵاتییەكی دەڤەری شەمزینانی باكووری كوردستانە، بەشداریی لەهەر هەڵپەركێیەكدا بكات تایبەتمەندی بەو هەڵپەركێیە دەدات.
سۆفی عومەر لەگرتەیەكی ڤیدیۆیدا كە لەیوتوب بڵاوبۆتەوە، باسی بەشداریكردنی لەهەڵپەركێ دەكات و دەڵێ: ئارەزوو دەكەم دڵی گەنجان خۆش بكەم، بۆیە هەڵپەركێ دەكەم، بەڵام تا داوەت نەكرێم بەشداریی هیچ هەڵپەركێیەك ناكەم.
لەبارەی تەمەن و ژیان و گوزەرانی دەڵێ: من شوان بوومە و ئاژەڵداریم كردووە، پێنج كچ و پێنج كوڕم هەیە.
سۆفی عومەر توانایەكی زۆری لەهەڵپەركێ دا هەیە و جووڵەكەی مایەی سەرنجی لاوان و هەوادارانی شایی و هەڵپەركێیە، لەگەنجان بەتواناترە و هەست بەماندوبوون ناكات، سۆفی عومەر كە شوانەتی كردووە و بەو حەماسەتەشەوە هەڵپەڕكێ  دەكات، تەندروستی زۆرباشە، لەوبارەیەوە دەڵێ: لەژیانمدا تەنیا جارێك چوومەتە لای پزیشك، جارێكیش ماتۆرسكیل لێیداوم بەو هۆیەوە چووم.
سۆفی عومەر باس لەگەنج و لاوی ئەم سەردەمە دەكات و دەڵێ: گەنجی ئێستا نازانم بۆ وان هەست دەكەین بێتاقەتییان پێوە دیارە، لەتەمەنی 15 و 17 ساڵیدا سەریان سپی دەبێ.
لەبارەی بەشداریكردنی لە داوەت و هەڵپەڕكێدا دەڵێ: لەگەڵ گەنجان زۆر ئارەزوو دەكەم بەشداری داوەت و هەڵپەڕكێ بكەم، زۆرجار لەرۆژهەڵات و باشووری كوردستان بۆ داوەت و هەڵپەڕكێ داوەتكراوم، بەڵام بۆ ئەو دوو بەشەی كوردستان ناچم، چوونكە رەشبەڵەك هەیە و من نایكەم.
ئەو داوەت و هەڵپەڕكێیانەی سۆفی عومەر تیایاندا بەشدارە، جۆش و خرۆشیان پێوە دیارە، بەجۆرێك هەڵدەپەڕێ و جووڵە دەكات، سەرنجی ئامادەبووان بەلای خۆیدا رادەكێشێت، سۆفی عومەر بەو جووڵە جوانە، وەك خۆی دەڵێ دەیەوێ دڵی گەنجان خۆش بكات.

 
چاپکردن   Share گه‌ڕانه‌وه‌