2017-07-05

وەزارەتی كاروباری شەهیدان و ئەنفالكراوان بە هەماهەنگی لەگەڵ لێژنەی باڵای بە جینۆساید ناساندنی كەیسی كوردانی ئێزدی هاوكات لەگەڵ چەند تیم و رێكخراوی تایبەتمەند بە بوارەكە لە ئایندەیەكی نزیكدا دەست دەكرێت بە هەڵدانەوەی گۆڕە بە كۆمەڵەكانی سنووری شنگال. بەڕێوەبەری گشتی لە وەزارەتی كاروباری شەهیدان و ئەنفالكراوانی حكوومەتی هەرێمی كوردستان، بەرەڤان حەمدی رایگەیاند: وێڕای هەبوونی چەند هۆكارێك لە بەردەم درەنگكەوتنی هەڵدانەوەی ئەو گۆڕە بە كۆمەڵانە، هێزەكانی پەكەكە و لقەكانی بە هیچ شێوەیەك هاوكار نەبوون لەبەردەم كارەكانمان و لە بەربەست زیاتر هیچ كارئاسانییەكیان بۆ نەكردووین.
- هەستیارترین بەڵگەكانی بە جینۆسایدناساندن
بەڕێوەبەری گشتی لە وەزارەتی كاروباری شەهیدان و ئەنفالكراوانی حكوومەتی هەرێمی كوردستان، بەرەڤان حەمدی لە لێدوانێكی بۆ ئاژانسی ئانادۆڵو گوتی: گۆڕە بە كۆمەڵەكان یەكێكن لە هەستیارترین بەڵگەكانی بە جینۆسایدناساندنی ئەو تاوانانەی داعش دەرحەق بە كوردانی ئێزدی كردی لە شنگال. لە ئێستا زیاتر لە 35 گۆڕی بە كۆمەڵ هەن و چەند گۆڕێكی بە كۆمەڵیش دەكەوێتە ئەو ناوچانەی بەم دواییە لە لایەن حەشدی شەعبی كۆنتڕۆڵكران. بەڕەڤان حەمدی گوتیشی: ئامادەكاری تەواو كراوە لە لایەن وەزارەتی كاروباری شەهیدان و ئەنفالكراوان بە هەماهەنگی لەگەڵ لیژنەی باڵای بە جینۆساید ناساندنی كەیسی كوردانی ئێزدی و كۆمەڵگەی دادوەری لە پارێزگای دهۆك و رێكخراوی ICNP كە تایبەتمەندە بە بوارەكە، هەڵبەت ئەگەر دۆخی ئەمنی ناوچەكە لەبار بێت لە ئایندەیەكی نزیكدا دەست دەكرێت بە هەڵدانەوەی گۆڕە بە كۆمەڵەكانی سنووری شنگال، بۆ ئەوەی وەك یەكێك لە هەستیارترین و بەهێزترین بەڵگە بۆ بە جینۆساید ناساندنی تاوانەكانی داعش بەرامبەر بە كوردانی ئێزدی بەكاربهێنین.
- پێش ساڵیادی كارەساتی شنگال، گۆڕە بە كۆمەڵەكان هەڵدەدەینەوە
لەبارەی ژمارەی ئەو گۆڕە بە كۆمەڵانەی بڕیار وایە هەڵبدرێنەوە ئەو بەڕێوەبەرە گشتییە لە وەزارەتی كاروباری شەهیدان و ئەنفالكراوانی حكوومەتی هەرێم دەڵێت "قۆناغی یەكەمی هەڵدانەوەی گۆڕە بە كۆمەڵەكان پێكدێت لە 7 تا 9 گۆڕی بە كۆمەڵ، چونكە لە ئێستادا ئەو چەند گۆڕە بە كۆمەڵە دەستنیشانكراون و كاتی هەڵدانەوەیان هاتووە و لە ئەگەری دواكەوتنی هەڵدانەوەیان لەوانەیە لەناوبچن، چونكە ئەو گۆڕە بە كۆمەڵانە بە تەواوی نەنێژراون و تەنها بە خۆڵێكی كەم داپۆشراون. دەشڵێت: ئەو كاتەی دەستنیشانمان كردووە بۆ هەڵدانەوەی گۆڕە بە كۆمەڵەكان، پێش 3ی مانگی ئابە كە ساڵیادی كارەساتی شنگال بە دەست تیرۆریستانی داعش، هەوڵدەدەین گۆڕە بە كۆمەڵەكانی كوردانی ئێزدی لە شنگال هەڵدەینەوە.
- پەكەكە و حەشدی شەعبی هاوكار نەبوون لەبەردەم كارەكانمان
بەرەڤان حەمدی باس لە بەربەستەكانی بەردەم هەڵدانەوەی گۆڕە بە كۆمەڵەكان و كۆكردنەوەی بەڵگەكانی تاوانەكانی داعش دەكات و دەڵێت: هەندێك ئەگەر هەبوون لەبەردەم درەنگ كەوتنی كارەكانمان كاتمان پێویست بوو بۆ ئەوەی لە لایەن وەزارەتی پێشمەرگە گۆڕە بە كۆمەڵەكان پشكنینیان بۆ بكرێت، چونكە مەترسی ئەوە لە ئارادا بوو كە گۆڕە بە كۆمەڵەكان لە لایەن داعشەوە بۆمبڕێژكرا بن. لە لایەكی دیكەوە لە رووی كارگێڕییەوە تیمەكانیشمان پێویستییان بە راهێنان شوێنی مانەوەی تایبەت هەبووە بۆ ئەوەی تیمەكانمان تێیدا بحەسێنەوە، لەگەڵ ئەوەشدا نەتەوەیەكگرتووەكان و رێكخراوەكانی بواری مافی مرۆڤ داوایان لێ كردین پەلە نەكەین لە هەڵدانەوەی گۆڕە بە كۆمەڵەكان، مەبەستیان ئەوەبوو لە كاتی دامەزراندنی دادگایەكی تایبەت تاوەكو دادوەرانی دادگاكە پشتگیری لە بەڵگە و دیكیۆمێنتەكان بكەن. ناوبراو ئاشكراشی دەكات كە پەكەكە و حەشدی شەعبی لە سنووری شنگال ئامرازی خێرنەبوون لە بەردەم كارەكانمان بۆ هەڵدانەوەی گۆڕە بە كۆمەڵەكان، چونكە ناكرێت تیمەكانی تایبەتمەند بەو بوارە مۆڵەت لە گرووپە نادەستووریەكانی ناوچەكە وەربگرن، بەڵكو دەبێت لە لایەن هێزە ئەمنییە دەستوورییەكانی ناوچەكە بپارێزرێن. لە حاڵەتی بوونی گرووپی چەكداری وەك پەكەكە و یەپەشە و یەپەگە و حەشدی شەعبی ئەگەری زۆری هەیە تانەلێدان بكەوێتە سەر بەڵگە و دیكیۆمێنتەكان بە جینۆساید ناساندنی تاوانەكانی داعش دەرحەق بە كوردانی ئێزدی لە شنگال. هاوشێوەی زۆرینەی ئەو ناوچانەی كەوتنە ژێر دەسەڵاتی داعش، چەكدارانی داعش بە هەر گوند و شارەدێیەكی سنووری شنگال تێپەڕی بن، وێڕای بڵاوكردنەوەی بیری توندڕەوی و سەپاندنی نەهجی خەلافەتەكەیان بەسەر هاووڵاتییاندا، لەژێر بیانووی جیا جیا دوای خۆیان كارەساتێكی مرۆیی گەورەشیان جێهێشتووە.
داعش كە شنگالی داگیر كرد، جگە لەوەی دەستی نەپاراست لە رفاندنی هەزاران كچ و ژنانی كوردی ئێزدی بۆ ناوچەكانی ژێر دەسەڵاتی خۆی، بە سەدان هاووڵاتی ئەو ناوچەیەی كۆمەڵكوژ كرد و لە گۆڕە بە كۆمەڵەكاندا ژن و پیاو، پیر و منداڵیان پێكەوە ناشت. لە ئێستادا ئامادەكارییەكان تەواو بوون بۆ هەڵدانەوەی گۆڕە بە كۆمەڵەكان، دوای هەڵدانەوەی گۆڕە بە كۆمەڵەكان رەنگە ژمارەی قوربانیان بەرز بێتەوە.

 
چاپکردن   Share گه‌ڕانه‌وه‌