2017-06-13

خەبات: رانیار دڵشاد

فۆتۆگرافەری نێودەوڵەتی سابر دری، دانیشتووی قەزای سۆرانە سەر بەپارێزگای هەولێر، زیاتر كارە فۆتۆكانی تایبەتن بە سروشت و ئاژەڵە كێویەكان، تاوەكو ئێستا حەوت پێشانگای فۆتۆگرافیان لە ناوخۆ و دەرەوە كردۆتەوە، ئەو لەچەند كۆڕ و سیمینارێكدا تیشكی خستووەتە سەر هونەرەكانی فۆتۆگرافی بەشێوەیەكی گشتی، هەروەها لەگەڵا چەند كۆمپانیایەكی دەرەوە پرۆژەی هاوبەشیان هەیە، ئەو لەڕێگەی دیدارێكەوە زیاتر تیشك دەخاتە سەر كار و پڕۆژە هونەرییەكانی.

* چۆن بوو رووتانكردە كاری هونەری فۆتۆگرافی؟
هەر لەمنداڵییەوە خولیای ئەو بوارەیەم هەبووە، هەستم بەوەكردووە دەتوانم لەو هونەرە خزمەتێكی باش پێشكەش بكەم، ئێستاش لەبەر پرۆسەی خوێندن نەمهێشتووە پرۆژەكانم بوەستن.

* ئایا هیچ دەزگایەكی میدیایی دەرەوە داوای وێنە و كاركردنیان لێنەكردوون؟
بە دڵنیاییەوە داوایان كردووم و زۆر لەوێنەكانیشم لەئاژانسەكانی دەرەوە بڵاوبۆتەوە، پڕۆژەشم هەبووە لەگەڵیان بە تایبەت "سانكچواری ئاسیا" و "دی سی پی" و زۆریك لە كۆمپانیاكانی دەرەوە، بەڵام لەبەر سەرقاڵی و پەستانێكی زۆر لەسەرم، پرۆژەكانم تەنها بە شێوەی پچڕپچڕ بووە لەگەڵیان.

* تاوەكو ئێستا چەند پێشانگای فۆتۆگرافیتان كردۆتەوە؟
تا ئێستا (7) پێشانگام كردۆتەوە، (3) یان لە دەرەوەی وڵات بەهاوبەشی لەگەڵ فۆتۆگرافەرەكانی دەرەوە هەریەك لە هیندستان و دوبەی، (4) پێشانگای تایبەتیشم لە ناوەوەی كوردستان هەیە، ئەوانەی دەرەوە بە سپۆنسەری كۆمپانیای نیكۆن و بەشێك لە كۆمپانیاكانی دیكەی دەرەوە كراونەتەوە، لە ناوخۆش بە سپۆنسەری كۆمپانیای شەهید بۆ پەروەردە و خوێندنی باڵا بوون، وا بڕیارە بۆ ئەمساڵیش دوو پێشانگای گڵوباڵی لە سلێمانی و دهۆك بە سپۆنسەری سەرەكی كۆرەك تیلیكۆم بكرێنەوە.

* جگە لەوێنەگرتنی سروشت، وێنەی ئاژەڵەكانیش دەگرن، ئایا تاوەكو ئێستا رووبەروی هیچ ڕووداوێكی مەترسی نەبوونەتەوە، لەكاتی وێنەگرتنی ئاژەڵەمەترسیدارەكان؟
بە دڵنیاییەوە رووبەروی نەهامەتی و مەترسی دەبییەوە كاتێك ئەم كارە دەكەیت، گەر ئێمە بمانەوێت وێنەیەكی باش و جوان لە زۆربەی كاتە زێرینەكان بگرین، دەبێت رەچاوی هەموو حاڵەتێكی لەم جۆرەیە بكەینەوە، دیارترین مەترسیش كەبەسەر ژیانم هاتبێت، ئەو پڵنگە بوو كە لەسنووری نێوان سریلانكا و هیندستان رووبەرووم بوویەوە، منیش لەو دەمە فۆتۆیەكم گرت، ئەو فۆتۆیەشم لە پێشانگاكانی ئیمارات و هەولێرنمایش كرا.

* لە ماوەی رابردوو كۆمەڵێك سیمینارتان‌ لەسەر هونەری فۆتۆگرافی بەڕێوەبرد و لەنێویشیاندا خەڵاتكراون، ئایا كاردانەوەیان چۆن بوو؟
ئەو سیمینار و ۆركشۆپانە زیاتر بۆ ناساندنی هونەرەكانی فۆتۆگرافیە بەشێوەیەكی گشتی، ئەو زانیارییانەی من هەمە، دەمەوێت لەو رێگایانەوە بۆ هاوڵاتیان باس بكەم، بۆ ئەوەی سوود لەهونەرەكانی فۆتۆگرافی وەربگرن، بەتایبەتی بۆ ئەو ئارەزوومەندانەی كەحەز بەو هونەرە دەكەن، ئامانجێكی تری سیمینار و ۆركشۆپەكانم زیاتر ئاگاداركردنەوەیە لە بارەی سروشت و ئاژەڵی كێوی، بەداخەوە لێرە و لەوێ خەڵكانێك هەن تاوەكو ئێستاش ڕاودەكەن و ئەو دار و سروشتەجوانەی كوردستان لەنێودەبەن.

 
چاپکردن   Share گه‌ڕانه‌وه‌