2017-03-18

  بەرپرسی لقی 3ی پارتی لە كەركووك دەڵێت، ئێستا ئاڵای کوردستان لە هەموو سنووری کەرکووک هەڵکراوە و تەنیا ماوە بەفەرمی بکرێت، بۆ ئەو مەبەستەش پارێزگاری کەرکووک داوای لە ئەنجوومەنی پارێزگا کردووە، لەتەک ئاڵای عێراقدا ئاڵای کوردستانیش هەڵبدرێت.

لەدوای سەرهەڵدانی داعش لە سنووری کەرکووکدا، هێزی پێشمەرگە نەیهێشت داعش دەست بەسەر  کەرکوودا بگرێت و توانی ئەم شارە بپارێزێت و سەقامگیریی بۆ گشت پێکهاتەکانی کەرکووک دابین کرد، لەگەڵ پارێزگاریکردن لە کەرکووک لەژێر سایەی ئاڵای کوردستاندا، ئێستا لە تەوای سنوورەکەدا ئاڵای کوردستان هەڵکراوە و بۆ ئەو مەبەستەش داواکراوە، ئەنجوومەنی پارێزگای کەرکووک بڕیارێک بۆ بەفەرمیکردنی ئاڵای کوردستان لە کەرکووک دەرچوێنێت. سەبارەت بەم پرسە، (د. محەمەد خورشید)، بەرپرسی لقی 3ی پارتی لە كەركووك دەڵێت: ''لە ڕۆژانی ڕابردوودا (د. نەجمەدین كەریم)، پارێزگاری كەركووك، نووسراوێكی ئاراستەی ئەنجوومەنی پارێزگای كەركووك كرد و داوای كرد ئەنجوومەنی پارێزگا بڕیارێك دەربكات، کە لەتەك ئاڵای عێراقدا ئاڵای كوردستانیش لە سەرجەم دامودەزگاكانی ئەم پارێزگایەدا دابنرێت. بەڵام بەشێكی سەركردەکانی عەرەب و توركمان لە شارەكەدا كەوتوونەتە خۆ و لێدوانی ئاگرین دەدەن. خۆ دەبوو، ئەوان لەبری ئەم قسانە لەگەڵ ئەنجوومەنی پارێزگا و لایەنە كوردییەكان كۆببونایەتەوە و بە گفتوگۆ ڕای خۆیان دەربڕیبا، نەوەك ئەو لێدوانە ئاگرینانە بدەن.''

(د. محەمەد خورشید) بە ماڵپەڕی فەرمیی پارتی دیموکراتی کوردستانی گوت: ''ئەمە پێشنیاریكە و بە ئەنجوومەنی پارێزگا دراوە، نوێنەری توركمان و نوێنەری عەرەب و سەرجەم لایەنەكان لە ئەنجوومەنی پارێزگادا هەن و لەوێدا گفتوگۆی لەسەر دەكرێت و یەكلایی دەبێتەوە.''

بەرپرسی لقی 3ی پارتی لە كەركووك ڕوونی كردەوە: ''لە دەستووری عێراقدا كەركووك وەک ناوچەیەكی كێشەلەسەر دەستنیشان كراوە. بەڵام هێزی پێشمەرگە بەبێ جیاوازی ئەم شارەی لە چنگی تیرۆریستان پاراست و ئاڵای كوردستانی لە سەرجەم سنووری ئەم شارەدا بەرز كردەوە و ئێستا ئاڵاكە دەشەكێتەوە. خۆ تەنیا كورد لە كەركووك كوردستانی نییە، بەڵكو كەركووك بە هەموو نەتەوە و پێكهاتەکانییەوە ناوچەیەكی كوردستانییە. خۆ ئاڵای كوردستان لەمێژە لە كەركووك هەڵكراوە و تەنیا ماوە بەفەرمی لە فەرمانگەكاندا دابندرێت و ئەنجوومەنی پارێزگا بەفەرمی بڕیاری لەسەر بدات.''

(د. محەمەد خورشید)  گوتیشی: ''زۆربەی خەڵكی كەركووك بە سەرجەم پێكهاتەكانییەوە لەژێر سایەی حوكمی هێزی پێشمەرگەدا حەساونەتەوە و ئاواتەخوازن بازگەی بانی مەقان و پردێ بگوێزرێتەوە ئەمدیوی كەركووك، بۆ ئەوەی بەتەواوی حکوومەتی هەرێم بیانپارێزێت. ئەمەش هەر قسە نییە و دووای ئەوەی  هێزە عێراقییەكان ڕایان كرد و لەلایەن هێزی پێشمەرگەوە بەرگریی لە شارەکە کرا و ئێستاش دەکرێت، بەئاشكرا هەست بە ئارامی و ئاسایش و حەسانەوەی شارەكە دەكرێت.''

 
چاپکردن   Share گه‌ڕانه‌وه‌