2017-03-11

له‌ وێستگه‌ی سه‌ره‌كی شاری دۆسلدرۆفی ئه‌ڵمانیا، كه‌سێك به‌ ته‌ور هێرشی كرده‌ سه‌ر ئه‌و كه‌سانه‌ی له‌ وێستگه‌كه‌دا بوون و، له‌ ئه‌نجامدا حه‌وت كه‌س برینداربوون. له‌ روونكردنه‌وه‌یه‌كدا كه‌ له‌لایه‌ن پۆلیسی دۆسلدرۆفه‌وه‌ بڵاوكراوه‌ته‌وه‌، ئاماژه‌ به‌وه‌ كراوه‌ كه‌ كه‌سێك له‌ وێستگه‌ی شه‌مه‌نده‌فه‌ر به‌ ته‌ور هێرشی كردووه‌ته‌ سه‌ر ئه‌و كه‌سانه‌ی له‌ وێستگه‌كه‌دا بوون.

له‌ روونكردنه‌وه‌كه‌دا ئاماژه‌ به‌وه‌ كراوه‌ كه‌ له‌و رووداوه‌دا حه‌وت كه‌س برینداربوون كه‌ برینی سیانیان سه‌خته‌، هێرشبه‌ره‌كه‌ش له‌ كاتێكدا هه‌وڵی هه‌ڵاتنیداوه‌ له‌ پردێكه‌وه‌ خۆی فڕێداوه‌ته‌ خواره‌وه‌ و به‌ سه‌ختی برینداربووه‌.

پاشان به‌ برینداری گواستراوه‌ته‌وه‌ بۆ نه‌خۆشخانه‌، ده‌ستیش به‌سه‌ر ئه‌و ته‌وره‌دا گیراوه‌ كه‌ له‌ هێرشه‌كه‌دا به‌كاریهێناوه‌. هاوكات له‌ روونكردنه‌وه‌كه‌دا باس له‌وه‌ كراوه‌ كه‌ ئه‌و كه‌سه‌ی ده‌ستگیركراوه‌ به‌ ره‌گه‌ز یوگۆسلاڤییه‌ و نیشته‌جێی شاری فوبرتاڵه‌ و ته‌مه‌نی سیی و شه‌ش ساڵه‌ و، كێشه‌ی ده‌روونی هه‌یه‌. له‌ پێگه‌ی فه‌رمی پۆلیسی فیدراڵدا له‌ تویته‌ر، باس له‌وه‌ كراوه‌ كه‌ وێستگه‌كه‌ بۆ ماوه‌یه‌كی كاتی داخراوه‌ و گه‌شته‌كانیش راگیراون.

 
چاپکردن   Share گه‌ڕانه‌وه‌