2017-02-16

خەبات: رانیار دڵشاد
هەرێمی كوردستان لە رووی یاریی خلیسكێنەی سەر بەفر و شاخەوانییەوە ناوچەیەكی لەبارە، بۆیە تادێت ژمارەی ئارەزوومەندانی ئەو بوارە لەزیادبووندایە، ئارەزوومەندانی ئەو بوارە، بۆ زیاتر گرنگی پێدان روویان لە دامەزراندنی رێكخرا و سەنتەری تایبەت بەم بوارە كردووە.
دەڤەری بارزانیش یەكێك لەو ناوچە شاخاوییانەی هەرێمی كوردستان، كە سەنتەرێكی ژینگەپارێزی و یاری تایبەت بە شاخاوانی لەخۆ دەگرێت، بەناوی (سەنتەری بارزان بۆ ژینگەپارێزی و شاخەوانی)، ئەم سەنتەرە لە 14/3ی ئەمساڵ كە دەكاتە رۆژی لەدایك بوونی بارزانی نەمر، بەشێوەیەكی فەرمی دەكرێتەوە، بۆ ئاشنابوون بەكارو چالاكییەكانی ئەم سەنتەرە، (ئەنوەر حەسەن دۆلەمەری) بەرپرسی سەنتەری ژینگەپارێزی و شاخەوانی بارزان، لەم بارەیەوە بۆ (خەبات) بەم شێوە دەدوێت.
لەبارەی دامەزراندنی ئەم سەنتەرەوە
ئەنوەر دۆلەمەری بەرپرسی سەنتەری بارزان بۆ ژینگەپارێزی و شاخەوانی گووتی: لەبەر جوانی و سروشتی ناوچەشاخاوییەكانی هەرێمی كوردستان لەنێویشیاندا دەڤەری بارزان، كە هەلًكەوتەی لەبارە بۆ یاری شاخەوانی، بۆیە بیرم لەدامەزراندنی ئەم سەنتەرە كردەوە، سەرەتا پێویستە زۆر سووپاسی هه‌ریه‌ك له‌ بەرێزان پارێزگای هه‌ولێر و غەفور ئەحمەد قائیمقامی قەزای مێرگەسۆر بكەم، بۆ پاڵپشتی و هاوكاریكردنی سەنتەرەكەمان، كاك غه‌فور یەكێكە لەو ئەندامانەی سەنتەرەكەمان.
 ژینگەدۆستی و كرانەوەی كۆمەڵایەتی
ئەنوەر دۆلەمەری گووتی: پێش هەموو شتێك دەمەوێت بڵێم دەڤەری بارزان لەرووی سروشتەوە جیاوازە لەگەڵ ناوچەكانی دیكەی هەرێمی كوردستان، خوالێخۆشبوو شێخ ئەحمەد بارزانی بۆ پارێزگاری كردن لە سروشت چەندین رێنمایی دەركردوون، وەك قەدەغەكردنی بڕینی داری تەڕ و كوشتنی ئاژەڵی كێوی و باڵندەكان.
هاوڵاتیانی بارزان ژینگە دۆستن و هەتا لەرووی كۆمەڵایەتیشەوە كراوەن، گەنجەكان زۆر ئارەزووی یارییە وەرزشیەكان دەكەن، هەر دوای دامەزراندنی سەنتەری ژینگەپارێزی و شاخەوانی، هاوڵاتیانی ئەم دەڤەرە لە هەردوو رەگەز، رۆژانە پەیوەندیمان پێوە دەكەن بۆ ئەندام بوون لە سەنتەرەكەمان، كەواتە ئەمە جێگای خۆشحاڵی ناوچەكەمانە كە بەبێی جیاوازی  تەمەن و رەگەز ئەندام وەردەگرین،ئەندامەكانیش تەنیا تایبەت نین بەناوچەیەك، تا ئێستا (15) ئەندامین.
ئامانجی سەنتەر
ئەنوەر دۆلەمەری لەبارەی ئامانجی سەنتەرەكەیان گووتی: ئامانجمان ئەوە دەمانەوێت سەنتەرەكەمان بەرەو پێش ببەین و فراوانی بكەین، بۆ ئەوەی ئێمەش لەداهاتوودا وەكو هەرێمی كوردستان ببین بەگرووپێكی شاخەوانی، بەشداربین لە یارییە پێشبڕكێكانی شاخەوانی  وڵاتان، ئەشكەوتی وا هەیە تائێستا شاراوەیە، ئێمە ئەو ئەشكەوتە شاراوانە كەشف دەكەین و شوینە گەشتیارییەكان بە پاك و خاوێنی رابگرین، هەوڵدەدەین چەندین خولی شاخەوانی و ژینگە پارێزی رێكبخەین و ئەلبوومێك بە زمانی كوردی و عەرەبی و ئینگلیزی لەو بوارەدا بەچاپ بگەیەنین.
كەموكورتی سەنتەر
لەبارەی كەم و كورتییەوە ئەنوەر دۆلەمەری گووتی: لەرووی پێداویستی جل و بەرگەوە كەموكوڕیمان هەیە، چوونكە خۆت دەزانی جلی شاخەوانی تایبەتە، ئەو جلانەش زۆر كەم لێرە دەست دەكەون، ئەوەی كە هەشە نرخیان گرانە و لە توانای ئێمەدا نیە، كێشەی هاتووچۆشمان هەیە، ئێمە دەمانەوێت لەكاتی دەرچوون هەموومان بەیەك تیم بڕۆین نەك تاك تاكە، بۆ ئەوەش گەر پاسێكمان هەبوایە دەمانتوانی باشتر كارەكانمان ئەنجام بدەین، گەر ئۆفیسی تایبەت بە سەنتەریشمان هەبوایە خراپ نەبوو، بۆ كاروباری سەنتەر و شوێنی هەڵگرتنی ئەو كەرەستە و ئامێرانەی تایبەت بەشاخەوانی.
داواكاریی
ئەنوەر دۆلەمەری گووتی: داوا لەهەموو بەرپرسان و لایەنە پەیوەندیدارەكان دەكەین، زیاتر هاوكاریمان بكەن و ئەو كەم و كورتییانەی وەك سەنتەر هەمانە بۆمان چارەسەر بكەن،بۆ ئەوەی بتوانین زیاتر لەرووی یارییە شاخەوانیەكانەوە خزمەت بە هەرێمی كوردستان بكەین.

 
چاپکردن   Share گه‌ڕانه‌وه‌