2017-02-14

فارس قادر فەقێ عەبدولڵا*

هەرچەندە لێرەدا مەبەستم شیكردنەوەی وشەی سیاسەت نییە، بەڵام پێم وایە بە مانا سادەكەی رەنگە زۆربەمان بزانین سیاسەت بریتییە لە "فن الممكنات" بەڵام ئەوەی من دەیبینم لە وڵاتی خۆمان پێ دەچێ پێناسەكەی جیاواز بێت لەگەڵ ئەو پێناسەیەی كە گشت جیهان و زانستی رامیاری لە سەری كۆكن. لە دونیا بە گشتی و لە نێو نەتەوە و وڵاتان بە تایبەتی سیاسەت بریتیە لە هەڵبژاردنی جوانترین شێوازی گونجاو بۆ بەڕێوەبردنی وڵات، یان راپەڕاندنی هەر كارێك یان ناساندنی مافەكان و خۆ گونجاندن بە مەبەستی خزمەت كردنی رۆڵەكانی وڵات بە گشتی.
گەر سەیر بكەین هەمووی لەم بۆچوونەوە رێڕەو دەگرێ، جا هەموو كات و ساتەكانیش گرەو لە سەر بردنەوەی سیاسەت كردن بە باشترین شێواز و خزمەت و خۆناساندن و پێداگرییە لە بوونی خودی مرۆڤ و هەروەها دەكرێ بگوترێ خۆنیشاندان و ئامادبوونی مرۆڤە چ وەك تاك یان لە ناو كۆمەڵ بە جوانترین شێواز و سەركەوتووترین هەڵوێست لە تەواجدا بەرامبەر بە كۆمەڵ و رای گشتی جیهان، تا دەگاتە نزیكترین تاك چ لە نزیكی مرۆڤ یان لە دووریەوە بێت. بە هەر حاڵ ئەمەیە سیاسەت لای ئێمەی كورد، بە داخەوە لێرە و لەوێ هەندێ جار وای لێدێت مرۆڤ تووشی سەرسوڕمان و بێزاری ببێت لە سیاسەت یان تووشی نەفرەت كردن بێت لە مێژووی خۆی لە سیاسەت "بمبوورن گەر وا بڵێم" چونكە دیارە مرۆڤ تواناكانی مەحدودە، بۆیە زۆر جار كە كۆنترۆڵی لە دەست دەچێ رەنگە لە كراسەكەی خۆی دەربچێ.
گەر سەیری راگەیاندنەكانی كوردی بكەین دەبینین هەندێ لەم راگەیاندنانە ئەوەی خێربێت بەسەر زاریاندا نایەت و دونیایان وا بچووك كردۆتەوە لەسەر ئەم خەڵكەو لە یەك سەعات دەیڕووخێنن و بیناشی دەكەنەوە!!! كار گەیشتۆتە ئەو رادەیەی شیرازەی خێزانیشیان تێكداوە و لەوەش خراپتر گرژی و ئاڵۆزیشیان خستۆتە ناو ژیان و گوزەرانی خەڵك، بە كورتی و بە كوردی هەموو تاكێكی ئەم كۆمەڵگەیە زەرەرمەندە لەم بازاڕە جەنجاڵەو هەرێ هاتەی ئەم سیاسەتە فاشیلەی ئەم ستافە فاشیلە. زۆر سەیرە رۆژانە هەزار و یەك فاول بكەن و بوختان بكەن وەك ئەوەیە نە بایان بینیبێ نە باران، بەڵام كاتێك دڵسۆزێك یان شۆڕشگێڕێك یان هەر تاكێكی ئەم میللەتە راستییەك بڵێت دەیكەن بە هات و هاوار و بگرەو بكوژەو نابی و دەبی و خەڵك چەواشە دەكەن و دەیانەوێت بابەتێك دروست بكەن بۆ بازارە رەش و گوماناویەكانیان، بەڵكو بە حیسابی خۆیان شتێكیان دەست بكەوێ.
بۆ نموونە ئەم هەرا و هۆسەی لە سەر بەڕێز "حەمەی حاجی مەحمود" كرا هەرچەندە رووڕەشیان بۆ مایەوە، بەڵام بە راستی بانێك و دوو هەوایە، چاویان كوێرە و گوێیان كەڕە بۆ خۆیان ئەم پینە گەورانە لە لاشەی خۆیان نابینن كە رۆژانە هەزار و یەك هەڵە و بوختان دەكەن و بە دەیان درۆ و دەلەسەش دەكەن لە كاتی لێپێچینەوەش لەگەڵیان دەڵێن دان بە دادگاكانی كوردستان نانێین!!! "كە ئەمەش بەڕای من تەوجیهاتی ئاغاكانیانە لە دەرەوەی كوردستان" بەڵام بۆ كاكە حەمە گوێیان كەڕ نییە و چاویشیان تیژە و دەبن بە پیاوی قانوونیش و پەنا دەبەنە بەر دادگای كوردستان، لەوە دەچێ پرسی ئاغاكانیان كردووبێ كاكە حەمە لە دەرەوە دادگایی بكەن، بەڵام دادگاكانی ئاغاكانیان نەیانتوانیبێت ئەم كارە بكەن؟ یان ئەوان پێیانگوتوونە بڕۆنەوە كوردستان ئێمە ناتوانین و هەقمان نییە، هەروا باشە لە كوردستان بیكەن، خۆ هیچ نەبێ دواڕۆژ دەبێتە یەك بە یەك و موقابیلی دادگایی كردنی سروە، بەڵكو سروە نەجات بدەن و وەك گۆڕینەوەی كەلوپەل بە شێوازی "نیزامی موقایەزە" لە بازرگانی دا، دیارە سیاسەتیش لای ئەوان بازرگانییە.
براینە كاكە حەمەی بەڕێز وەك دڵسۆزێك و پێشمەرگەیەك قسەی زۆر جوانی كردووەو هەق وایە بە ئاوی زێڕ بنووسرێ كە دەڵێت "لە حكومەت نەبووین و بەشداریمان كردووە لە حكومەت، لە حكومەت بین یان نا دەستكەوتەكان دەپارێزین" دەستخۆش... ئەمەیە قسەی پێشمەرگەی بە شەرەف و خاوەن سەروەری. هەروەها دەڵێت "ئێوە لە حكومەت خەریكی دابەش كردنی وەزارەت بوون، ئێمەش خەریكی دابەشكردنی رەبایەكان بووین". ئەم قسەیەش كەس بۆی نییە بەرامبەری رابوەستێ، ئەمە قسەی پیاوی مەردە و لەوە زیاتر چیتان بۆ بكا؟! كوڕێكی خۆی بەخشی بەم خاكە، ئێوە چیتان كرد بڵێن با ئێمەش گوێتان لێ بگرین.
كاكە حەمەی بەڕێز دەڵێت "لە حكومەت بین و نەبین ئێمە دیفاع لە حكومەت دەكەین" بەڵێ گومان نییە لە قسەكانت كاكە حەمە، مێژووت شاهێدە تۆ تازە لەوە بەرزتری نە من و نە كەسی تر تەقیمت بكەین، مێژووی خۆت شایەدی هەموو ئەمانەیە.
بەڵام با روو لە لایەكی تر بكەین، تكایە ئەم نهێنیەی خۆتان كەشف بكەن، بۆچی لە حكومەتن و دژی وەستاون؟ بۆچی بنكۆلی لێ دەكەن؟ بۆچی دەبن بە پیاوی ئەوانەی دژی كوردن؟ چ لە ناوەوەی عێراق یان بۆ دەرەوەو دەوراپشت، پرسیار زۆرە، بەڵام كەی وەڵام دەدەنەوە ئەمەیان نازانم! تكایە وەڵام؟ هەر بۆ ئەوەی زیاتر خوێنەر دڵنیا بكەمەوە لە گومان و سەرسوڕمانم لە سیاسەتی ئێوە، لە بەرواری 6/2/2017 برادەرێكی پەیامنێر بە ناوی "سۆران كامەران" لە بەرەكانی جەنگ لە یەكێك لە تیڤیەكان چاوپێكەوتنێكی لەگەڵ فەرماندەیەكی پێشمەرگە كرد، ئەم برا فەرماندەیە لە چاوپێكەوتنەكەدا قسەیەكی زۆر سەیر و سەمەرەی كردو دەبێ لە سەری بوەستین و پێم وایە و هەقیشە دیراسەیێكی وردی بۆ بكەین، كە گوتی "ئەگەر قسەی هەق بكەی دەڵێن ئەوە لایەنگیری پارتیە" دیارە ئەم برادەرە فەرماندەیە سەر بە پارتی نەبوو.
ئەی خودایە لەم قسەیە! وای لێهاتووە نەتوانی قسەی هەق بكەی نەوەك بڵێن پارتیە! كوڕە دەبا بڕوات، برا گیان گوێی مەدەرێ، گەر پارتی هەق بێت و هەق گوتنیش تاوان بێت، مرۆڤ گەر بۆ هەق نەمرێت ئەی بۆچی بمرێت! توخوا خەڵكینە من لە سیاسەت نازانم یان لەم وڵاتەی ئێمە گاڵتە بە سیاسەت دەكرێ، یان ئەوانەی ئەم مەهزەلە بە ناو سیاسەتە دەكەن هەموو شتن بەس سیاسی نین!!! چونكە گەر بەوانە بگوترێ سیاسی من وەك ئەو كەسەم لێ دێت كە بڵێم خەڵكینە قیبلەم لێ ون بووە، بەڵام واش نییە قیبلەم ون نەكردووەو دەتوانم بڵێم "ئەمە سەیر و سەمەرەكانی بە ناو سیاسەتە لە بۆگەنی" وەك ئەم حەوت سەیر و سەمەرەی لە جیهاندا باو و ناسراوە گەر ئەوەی خۆمان ناو بنێین بە سەیر و سەمەرەی هەشتەم بەڵام بۆ خەڵك و جیهانیشی شیبكەینەوە ئەوانەی ئێمە كە بۆگەنن لە سیاسەت بەڵام زۆر سەیرن، دەكرێ بە هەشتەمین سەیر و سەمەرەكانی جیهان لێمانی قبوڵ بكەن، چونكە بۆگەنن و هیچ پێناسەیان نییە، نازانم رای گشتی جیهان دەبێ چیبێت؟ هەرچەندە گەر شتێك لە سەیر و سەمەرەكانی جیهان بزانم ئەمانە قبوڵ نابن، بەڵام رەنگە لە بۆگەن ژمارە یەكیان پێ بدەن، جا ئەو كاتە بڵێن سەیر و سەمەرەی ژمارە یەك لە كوردستانە، بەڵام بە پێچەوانەی پێوەری هەموو جیهانە.

* ئەندامی ئەنجومەنی سەركردایەتی پارێزگای هەولێر (پ. د. ك)

 
چاپکردن   Share گه‌ڕانه‌وه‌