2017-01-03

خەبات : كەنعان بەهادین

هەفتەی رابردوو ئەنجوومەنی پارێزگای هەولێر بە تێكڕای دەنگ پڕۆژە یاسای وەرگرتنی چەكی مووچەخۆران لە بری قەرزی خزمەتگوزارییە حكومییەكانی پەسند كرد و بۆ ئەنجوومەنی وەزیرانیشی نارد بەمەبەستی پەسند كردن و جێبەجێكردنی.
هەروەك لە دەقی پڕۆژەكە كە تایبەت بۆ خەبات نێردراوە و هاتووە:
دوای تێپەڕبوونی ماوەیەك لە جێبەجێ كردنی سیستەمی پاشەكەوت كردنی مووچەی فەرمانبەرانی دەوڵەت، لە ئێستادا بارو گوزەرانی فەرمانبەران قورس بووە و لەهەمان كاتیشدا حكومەت بەرەو ئاسۆیەكی باش هەناگاوی ناوە و فەرمانبەر مووچەیەكی باشی وەكو پاشەكەوت لە بانك هەڵگرتووە، بۆ ئەمە ئەنجوومەنی پارێزگای هەولێر وەكو ئەركی خۆی كە تەنها راوێژو پێشنیارو رێگادانانە، لەمبارەیەوە لە رێگەی پڕۆژەیەكی كاتی بۆ ئەم دۆخە كە قەرزو ئیلتزاماتە حكومییەكانی مووچەخۆر كە یاساكە پێكهاتووە لە :
یەكەم : كارپێكردنی چەكی مووچەی مووچەخۆران بەناوی خۆی یان ئەندامێكی خێزانەكە "هاوسەر و منداڵەكانی" ی بێت، لەكاتێكدا سەرۆكی خێزانەكە ئەگەر مووچەخۆر نەبوو بۆ پێدانی قەرز هەر باج و رسوماتێك كە لەنێوان هاوڵاتی و حكومەتدا هەبێت وەكو كارەبا و ئاو و هاتوچۆو قەرزی خانووبەرە و پێشینەی هاوسەرگیری و كشتوكاڵ و باج و رسوماتەكان، بەمەرجێك دیكۆمێنتەكان بەناوی مووچەخۆر یان هەر ئەندامێكی خێزانەكەی بێت.
دووەم : نابێت ئەو چەكەی مووچەخۆر بەناوی كەسی تر بكرێت، تەنها دەبێت بەناوی مووچەخۆر بێت.
سێیەم : نابێت ئەو چەكەی مووچەخۆر حكومەت بۆ قەرزی كەسانی تر بەكاری بێنێت یان لەبازاڕ كاری پێبكرێت یاخود بازرگانی پێوە بكرێت.
چوارەم : پێویستە مووچەخۆری حكومەت ئەو گوژمە قەرزەی كە دەیدات بەحكومەت بۆ خزمەتگوزارییەكانی لەسەر حیسابی بانكی ئەو گوژمەیە هەبێت پشتگیری یەكەی ژمێریاری مووچەخۆرەكەی لەگەڵ دابێت.
پێنجەم : هەماهەنگی كردن لەنێوان فەرمانگەكانی حكومی و خزمەتگوزاری فەرمانگەكانی بانك و ژمێریاری و دارایی بۆ جێبەجێكردنی میكانزمی كارپێكردنی ئەم پڕۆژەیە.
شەشەم : بەهیچ شێوەیەك بۆ پێدانی قەرزی تر بەكارنەهێنرێت جگە لە پارەدانی مووچەخۆر بۆ فەرمانگەكانی حكومەت بەهەر مەبەستێك بێت.
حەفتەم : نابێت بۆ قەرزی كەرتی تایبەت بەكاربێت و لەكاتی بەكارهێنانی حكومەت بەرپرسیار نابێت لەسەرفكردنی چەكەكە جگە لە بواری تەندروستی كە بۆ چارەسەركردنی موچەخۆر یان ئەندامێكی خێزانەكەی بێت حكومەتیش پابەند بێت بە سەرف كردنی بڕەكە بۆ ئەم مەبەستە.
هەشتەم : بۆ ئەو مووچەخۆرانەی حكومەت كە گرێبەستن، پێویستە گرێبەستی بەكرێگرتنی خانوو لەگەڵ خاوەن ماڵ یان ئەندامێكی خێزانەكە هەبێت و پەسند كرابێت لە فەرمانگەی باجی خانووبەرە بۆ پێدانی قەرزی ئاو و كارەبا.
نۆیەم : سەبارەت بە سزای هات و چۆ، ئەو گوژمانەی دەدرێن بە بەرێوەبەرایەتی هاتو چۆ دەبێت ساڵانەی ئۆتۆمبێل بەناوی مووچەخۆری حكومەت بێت یان یەكێك لە ئەندامانی خێزانەكەی.
دەیەم : پاش كۆتایی هاتن بە سیستەمی پاشەكەوت و گەڕانەوەی پارەی پاشەكەوتكراو، كار بەو بڕیارە ناكرێت.
لە كۆتایدا ئاماژە بۆ ئەوە كراوە كە پاش رەزامەندی ئەنجومەنی وەزیران دەست دەكرێت بەكار پێكردن بەم یاسایە لە دام و دەزگاكانی دەوڵەت.

 
چاپکردن   Share گه‌ڕانه‌وه‌