2017-01-02

راپۆرت ـ پەری‮ ‬عومەر‮ ‬
لێبوردەیی‮ ‬ئەو چەمكەیە كەوا كەم كەس دەتوانێت لە ژیانیدا پیادەی‮ ‬بكات‮ ‬،‮ ‬ئەگەر مرۆڤ بە باشتر و وردتر لە ژیان بڕوانێت دەزانێت كەوا لێبوردەیی‮ ‬چەندە پیرۆزە‮ ‬،‮ ‬بەرامبەر بەو كەسانەی‮ ‬دوێنێ دۆست و ئەمڕۆ بوونەتە نادۆست‮ ‬جا بەهۆی‮ ‬هەر شتێكەوە بوو بێت،‮ ‬بەڵام دواجار لێبووردەیی‮ ‬كۆمان دەكاتەوە شەكراوی‮ ‬پێكەوە ژیانمان پێ نۆش دەكات،‮ ‬لێرە دا بەڕای‮ ‬تۆ لێبوردەیی‮ ‬بەهێزترە‮ ‬یان سزادان و سەرزەنشتكردنی‮ ‬یەكتر؟‮.‬
لێبوردەم لەژیانم هەربەوەش ناسراوم‮ ‬
سەرەتا سارا جەمشید قوتابی‮ ‬زانكۆ گوتی‮ : ‬من لە ژیانم هەمیشە كەسێكی‮ ‬لێبووردە بوومە بەرامبەر بە كەسەكان‮ ‬،‮ ‬كەمجار هەوڵمداوە‮ ‬ڕق هەڵبگرم و لێبوردە نەبم ئەویش ئەوكاتە بووە كە كەسێك قسەیەكی‮ ‬بۆ هەڵبەستابم كە بە هیچ شێوەیەك نەمبەخشیوە و هەوڵمداوە لە زاكیرەی‮ ‬خۆم بیسڕمەوە‮ ‬،‮ ‬ئەگینا كەسەكان و گرنگیان لام بڕیار لەسەر لێبوردنیان دەدات،‮ ‬چونكە بڵێیت نەڵێیت مرۆڤ هەڵە هەر دەكات بەڵام باشترین ئەوكەسەیە كە هەڵەی‮ ‬كرد دووبارەی‮ ‬نەكاتەوە،‮ ‬چونكە ژیان زۆر جوانە ئەگەر بە لێبووردەیی‮ ‬و سادەیی‮ ‬و خۆشی‮ ‬بەڕێیبكەین.بۆیە پە‮ ‬یامم لێبوردەییە بەرامبەر بە كەسەئازیزەكانمان كاتێك هەڵەیەك دەكەن‮ ‬یان شتێك لەدەستیان‮ ‬ڕوودەدات‮. ‬
بەرامبەرەكەت رۆڵ دەبینێ لەوەی‮ ‬دەیبوری‮ ‬یان نا
دواتر سوڵتان شەمسەدین ئەویش وەك قوتابییەكی‮ ‬دیكەی‮ ‬زانكۆ گوتی‮ : ‬لێبوردەیی‮ ‬بە زۆر دروست نابێت‮ ‬یان لەبەرخاتری‮ ‬ئەم و ئەو گەلێك جار بینیومانە لە نیوان دوو كەس‮ ‬یان بنەماڵە شەر بووە و سوڵح كراوە كەچی‮ ‬پاش چەندین ساڵ كوشتن روویداوە و شەرەكە دووبارە بۆتەوە‮ ‬،‮ ‬ئەمەش لە ئەنجامی‮ ‬ئەوەی‮ ‬لێبووردنەكە لە روحەوە نەبووە بەڵكو لەبەر خاتری‮ ‬ئەم و ئەو بووە‮ ‬،‮ ‬بۆیە لێبوردەیی‮ ‬شتێك نیە دروستی‮ ‬بكەی‮ ‬بەڵكو دەبێت مرۆڤ پەرە بەخۆی‮ ‬بدات و روحیەتی‮ ‬لێبوردەیی‮ ‬لەخۆیدا گەشە پێبدات‮ ‬،‮ ‬وەكەسەكانی‮ ‬بەرامبەر واتە كەسەكەش دەبێت وابكات بەرامبەرەكەی‮ ‬بیبوورێت جا بەهەر چ هۆكار و پۆزشێك بێت،‮ ‬چونكە درێژەدان بە رق و كینە و ناكۆكی‮ ‬زەرەری‮ ‬گەورە بە مرۆڤ و تەندروستی‮ ‬دەگەیەنێت دەبێت مرۆڤ زۆر ئاقڵانە بژیێت و دووربكەوێتەوە لە رق و كینە‮.‬
ئەگەر لێبوردەیی‮ ‬نەبوایە ژیان لەسەر زەوی‮ ‬زۆر سەختتر دەبوو
هەروەها ماردین هەولێری‮ ‬وەك فەرمانبەرێك گوتی‮: ‬بەرای‮ ‬من لێبوردەیی‮ ‬پیرۆزترین بەخششی‮ ‬خوایە لەسەر زەوی‮ ‬كە لەناخی‮ ‬مرۆڤەكانی‮ ‬داناوە جا هەیە بەكاری‮ ‬دەهێنێت هەیە پشتگوێی‮ ‬خستووە،‮ ‬چونكە ئەگەر لێبوردەیی‮ ‬نەبوایە ئەوا ژیان لەسەر زەوی‮ ‬زۆر ئاڵەزتر دەبوو،‮ ‬منیش ناڵێم لەهەموو كەس ببورن بۆنموونە هیچ كات لە دوژمنانی‮ ‬كورد و كوردستان نابوورم‮ ‬،‮ ‬ئەگەر بە بریندار بوونی‮ ‬چولەكەیش خوێنیان رژاندبێت نایانبوورم هەرگیز،‮ ‬بەڵام لە رووی‮ ‬كۆمەڵایەتی‮ ‬ناوەخۆییەوە پێویستە زیاتر لێ بووردە بین،‮ ‬ئەوە جەژنیش نزیكە دەبێت هەموومان بەیەك دڵ و گیان بڕیاری‮ ‬لێبووردنی‮ ‬گشتی‮ ‬بدەین بۆ كەسانی‮ ‬ئازیز كە دڵمان لێیان رەنجاوە‮.‬
ناكرێت لێبوردە نەبین بەڵام ناشبێت دوژمن لەیاد بكەین‮ ‬
دواتر بورهان محەمەد ئەویش وەك مامۆستایەك‮ ‬گوتی‮: ‬لێبووردەیی‮ ‬جوانە بەڵام پێویستە بزانین كێیە ئەو كەسەی‮ ‬كەوا دەیبوورین‮ ‬،‮ ‬چونكە لێبوردن لە وەختی‮ ‬خۆی‮ ‬و بەرامبەر بەو كەسانەی‮ ‬لێیاندێت ئەوە دەگەڕێتەوە بۆ بەرزی‮ ‬ئەو كەسە‮ ‬،‮ ‬وە زۆر جار ئەو كەسەی‮ ‬تاوانێكی‮ ‬كردووە بەرامبەرت بەو لێبوردن بەخۆی‮ ‬داچۆتەوە و خۆی‮ ‬زۆر چاككردوتەوە هەوڵیداوە بە چاكەكردن و رووخۆشی‮ ‬قەرەبۆی‮ ‬شتەكان بكاتەوە،‮ ‬گەلێك جار هەندێك هەن ئیستغلالی‮ ‬ئەوەدەكەن تۆ لێبوردەی‮ ‬ئەوە هەڵەكان دووبارە دەكەنەوە بۆ نموونە هاوسەران زۆر شتی‮ ‬وای‮ ‬تێدایە‮ ‬یان منداڵان بەرامبەر دایك و باوكیان چونكە ئەوان لێبوردەن‮ ‬،‮ ‬زۆر لایەنی‮ ‬دیكەیش بەڵام بە شێوەی‮ ‬گشتی‮ ‬پێویستە مرۆڤ لێبوردە بێت بە روحیەتی‮ ‬وەرزشیانە ژیان بكات‮ ‬،‮ ‬تاكو بتوانێت بە تەندروستیەكی‮ ‬با بژێت،‮ ‬سەرزەنشتكردن و تاوانبار كردن گەلێك جار بازنەی‮ ‬رق و كینە فراوانتر دەكات،‮ ‬بۆیە ئاقڵەكان هەمیشە لێبوردەن و هەر زوو لاپەرەی‮ ‬سپی‮ ‬هەڵدەدەنەوە‮ .‬
لەهەموو كەس دەبوورم تەنیا لە داعشی‮ ‬نەفرەتی‮ ‬نابوورم‮ ‬
چونكە كوڕەكەیان شەهید كردووم‮ ‬
پاشان گەلاویژئەحمەد ئەویش وەك دایكە شەهیدێك گوتی‮: ‬لە ژیان هەرگیز بیرم لەوە نەدەكردەوە رۆژێك بێت رق لەناو دڵم شین بێت‮ ‬،‮ ‬چونكە هەمیشە لەناو خزمان خەڵكی‮ ‬بە دڵساف و پاك ناسراوم‮ ‬،‮ ‬بەڵام ئێستا رقم كێوە كینەم دەریایە تۆڵم ئاگرە چونكە كوڕەكەم پێشمەرگە بوو شەهید بوو،‮ ‬چۆن لەداعش ببوورم‮ ‬،‮ ‬نەخێر هیچ كات نابەخشم ئەو كەسەی‮ ‬ئەو دەستەی‮ ‬ئەو كۆمەڵەی‮ ‬ئەو‮ ‬ڕێكخراوەی‮ ‬كە كوڕی‮ ‬منیان شەهید كرد،‮ ‬نایانبوورم بكەونە بەردەستم پارچەپارچەیان دەكەم،‮ ‬وە گەر رۆژێك دڵم بیەوێت بیانبووری‮ ‬بەدەستی‮ ‬دڵم دێنمە دەر و پارچەپارچەی‮ ‬بكەن،‮ ‬دەنا بەرامبەر هەموو ژیان و كەسانی‮ ‬دیكە لێبوردەم و گەردنیان ئازابێت‮.‬
لێبوردن سیفەتێكی‮ ‬جوانی‮ ‬خوایە بۆیە پێویستەلێبوردە بین
بەرامبەر كەسە پەشیمان بۆوەكان
دواجار زریان سالار ئەویش وەك مامۆستایەك گوتی‮: ‬لێبوردن سیفەتی‮ ‬بەرزی‮ ‬خوایە بۆیە پێویستە لەو كەسانە ببوورین كەوا پەشیمانی‮ ‬دەردەبڕن بەرامبەرت،‮ ‬بەتایبەتی‮ ‬لەكاتی‮ ‬هاتنی‮ ‬جەژن و بۆنەكان پێویستە دڵمان فراوانتربكەین و كەسەكان ببورین،‮ ‬بەڵێ دڵشكان كارەساتە بەڵام ئاگری‮ ‬كارەسات بە لێبوردەیی‮ ‬دەكوژێتەوە‮ ‬،‮ ‬هەردوو لا دەحەسێنەوە،‮ ‬بۆیە لێبوردە بن من كەسێكم دەناسی‮ ‬زۆر هەوڵیدا لەگەڵ هاوڕێكە ئاشت بێتەوە بەڵام هاورێكەی‮ ‬نەیدەبووری‮ ‬و ساڵانێكی‮ ‬پێچووە‮ ‬،‮ ‬رۆژێك ئەو كەسەی‮ ‬پێویستی‮ ‬بە لێبوردن بوو وەفاتی‮ ‬كرد‮ ‬،‮ ‬لە گۆرستان كاتی‮ ‬ناشتنی‮ ‬هاوڕیكەیم بینی‮ !!! ‬گوتم چۆنی‮ ‬گوتی‮ ‬توخوا پێی‮ ‬بڵێ بووریمە گەردنی‮ ‬ئازا بێت،‮ ‬گوتم تازە پاش چی‮ ‬بۆچی‮ ‬گوێت لێ نەگرت‮ ‬ڕۆژێك بۆچی‮ ‬ویژدانت ئاسوودە نەكرد،‮ ‬ئا بەو خەمەوە چووە ژێر گڵ،‮ ‬لەكاتێك دا دووساڵ بوو داوای‮ ‬لێت دەكرد بیبووری‮ ‬،‮ ‬بۆیە پێویستە وریابین و لێبوردەبین،‮ ‬خوای‮ ‬مەزن مرۆڤی‮ ‬لێبوردەی‮ ‬خۆشەوێت‮. ‬

 
چاپکردن   Share گه‌ڕانه‌وه‌