2016-12-20

ئۆتۆمبێلێكی بارهەڵگر هێرشی كردە سەر بازاڕی كریسمسی بەرلین و هاوشێوەی هێرشە تیرۆریستییەكەی فڕەنسا، هاووڵاتییانی كردە ژێر ئۆتۆمبێلەكە و دەیان كەس بوون بە قوربانی.
 ئاژانسی دویچەوێلەی ئەڵمانی رای گەیاند، شەوی رابردوو هاوشێوەی هێرشە تیرۆریستییەكەی فڕەنسا، ئۆتۆمبێلێكی بارهەڵگر لە بازاڕی كریسمەسی بەرلین، پایتەختی ئەڵمانیا هێرشی كردە سەر هاووڵاتییان و بەهۆیەوە 12 كەس گیانیان لە دەست دا و 48 كەس بریندار بوون.

شەوی رابردوو پۆلیسی ئەڵمانیا رای گەیاند، پێ دەچێت ئەو هێرشە بە ئەنقەست بێت و نیازێكی تیرۆریستانەی لە پشت بێت، بەڵام بۆ دڵنیابوون لە رووداوەكە دەستیان كردووە بە لێكۆڵینەوە.
بەیانی ئەمڕۆ سێشەم، ئەندریاس گەیزل، وەزیری كاروباری ویلایەتەكانی ئەڵمانیا لە كۆنفڕانسێكی رۆژنامەوانیدا رای گەیاند، تا ئێستە سەرەداوێك دەست نەكەوتووە بۆ ئەوەی دڵنیا بین ئەو رووداوە هێرشی تیرۆریستی بووە یا تەنیا سەرپێچییەكی هاتوچۆ.
پۆلیسی بەرلین ئاشكرای كردووە، دوای رووداوەكە شۆفێری بارهەڵگرەكە لەلایەن پۆلیسەوە گیراوە و تەرمی كەسێكی تریش دۆزراوەتەوە كە گومانی ئەوە دەكرێت سەرنشینی بارهەڵگرەكە بووبێت.
سەرچاوەیەكی تەناهی بە ئاژانسی "دی پی ئەی" ئەڵمانیای راگەیاندووە، شۆفێری بارهەڵگرەكە پەنابەرێكی ئەفغانستانییە كە لە مانگی شوباتی 2016 هاتووەتە ناو خاكی ئەڵمانیا و داوای پەنابەرێتی كردووە.
بەیانی ئەمڕۆ وینفرێد ڤێنزڵ، گوتەبێژی پۆلیسی بەرلین بە میدیاكانی راگەیاند، شۆفێری بارهەڵگرەكە دوای رووداوەكە رای كردووە و پۆلیس توانیویەتی لە دووری دوو كیلۆمەتر لە شوێنی رووداوەكە بیگرێت و تا ئێستەیش لەژێر لێپێچینەوەی پۆلیسدایە.
بارهەڵگرەكەی هێرشی كردووەتە سەر هاووڵاتییانی بەرلین، هی وڵاتی پۆڵۆنیایە و دوێنی هەواڵی دزرانی دراوە بە پۆلیسی ئەو وڵاتە، دوای رووداوەكە دەركەوتووە ئەو تەرمەی وەك سەرنشین لەلایەن پۆلیسی ئەڵمانیا دۆزراوەتەوە، هاووڵاتیی پۆڵۆنیایە و خاوەنی بارهەڵگرەكە بە میدیاكانی راگەیاندووە، ئەو كوژراوە شۆفێری بارهەڵگرەكە بووە و لە سەعات چواری دوانیوەڕۆی دۆینێ دووشەمەوە دیار نەماوە و وەڵامی پێوەندییەكانی نەداوەتەوە.
ستیڤان سیبرت، گوتەبیژی ئەنجێلا مێركڵ لە كۆنفرانسێكی رۆژنامەوانیدا رای گەیاند، ئێمە تازیەبارین و هیوامان وایە بە زوویی بریندارەكان چاك ببنەوە. لەبارەی مەبەستی هێرشەكەیش هەموو ناوەندەكان لە لیكۆڵینەوەدان و بەم زووانە ئەنجامی لێكۆڵینەوەكان ئاشكرا دەكرێن.

وشه‌

 
چاپکردن   Share گه‌ڕانه‌وه‌