2016-12-06

راپۆرت: زانكۆ جاف

دەزگای خێرخوازیی بارزانی رۆژانە هاوكاری و پێداویستی ژیان بۆ ئاوارەكان و ئەوكەسانەی كە پێویستیان بە هاوكارییە دابین دەكات، لە درێژەی كار و پرۆژەكانی دەزگای خێرخوازیی بارزانیدا هەفتانە زیاتر لە ٣٣ هەزار خێزان هاوكاری و یارمەتی دەدرێن بەشێكی لەسەر ئەركی دەزگاو ژمارەیەك چالاكیش بە هاوكاری لەگەڵ رێكخراوە ناوچەیی و جیهانییەكان لە ناو كەمپەكانی ''دیبگە، خازر، حەسەنشام، نێرگزلی و زلیكان'' هەروەها لە دەرەوەی كەمپەكان و ناوشار و شارۆچكەكانی هەرێمی كوردستان پێداویستی بۆ قوتابیان كەمدەرامەتان دابەش دەكات. 
ژەمەخواردنی گەرم
لەگەڵ هاتنی ئاوارەكان بۆ كەمپەكانی هەرێمی كوردستان، دەزگای خێرخوازیی بارزانی لەڕێگەی دروستكردنی چێشتخانەوە رۆژانە دوو ژەمە خواردنی گەرم بەسەر ئەو خێزان و كەسانەدا دابەش دەكات كە تازە ئاوارە دەبن، لەو بارەیەوە موسا ئەحمەد جێگری سەرۆكی دەزگای خێرخوازیی بارزانی تیشك دەخاتە سەر چۆنیەتی دابەشكردنی ژەمەخواردنی گەرم بۆ ئاوارەكان و رایدەگەیەنێت: لە ماوەی هەفتەی كۆتایی مانگی ١١ی ئەمساڵدا دەزگای خێرخوازیی بارزانی رۆژانە خواردنی گەرمی پێشكەشی ئەو كەسانە كردووە كە بەهۆی شەڕی موسڵەوە ئاوارە بوون و روویان لە كەمپەكانی هەرێمی كوردستان كردووە، هەر بۆ ئەو مەبەستە دەزگای خێرخوازیی بارزانی لە رێكەوتنێكدا لەگەڵ LDSی ئەمەریكی پرۆتۆكۆلی دابینكردنی دوو ملیۆن ژەمە خواردن گەرمیان ئیمزاكرد بۆ پێنج كەمپی ئاوارەكان و رۆژانە لەڕێگەی چێشتخانەكانی دەزگای خێرخوازیی بارزانییەوە لەڕێگەی چەند تیمێكی تایبەتەوە خواردنی گەرم دروست دەكرێت و دابەشی سەر كەس و ئاوارەكاندا دابەش دەكرێت، هەروەها ئاماژەی بەوەدا: شێوازی دابەشكردنی ژەمەخواردنی گەرم بەجۆرێكە تاوەكو ئاوارەكان دەچنە شوێن و پەناگەی خۆیان لەكەمپەكان پرۆسەكە بەردەوام دەبێت.
گرنگیدان بە بواری پەروەردە
دەزگای خێرخوازیی بارزانی گرنگیەكی تایبەت بە سێكتەری پەروەردەو خوێندن دەدات، لەو میانەشدا ساڵانە بەپێی بەرنامەیەكی رێكوپێك جانتاو پێداویستی خوێندن بەسەر 50 هەزار قوتابی ناوخۆی كوردستان و ئاوارەو پەنابەردا دابەش دەكات، هاوكات لەگەڵ ژمارەیەك رێكخراوی بیانی لە بەشێكی كەمپی ئاوارەو پەنابەراندا قوتابخانەی دروستكردوەو ئێستاكە خوێندن تیایاندا بەردەوامە، لەو میانەشدا موسا ئەحمەد جێگری سەرۆكی دەزگای خێرخوازیی بارزانی ئاماژەی بەوەدا: ئێمە ساڵانە لەگەڵ دەسپێكی پرۆسەی خوێندن لە هەرێمی كوردستان و كەمپی ئاوارەو پەنابەراندا، جانتاو پێداویستی خوێندن دابەش دەكەین، لەگەڵ ئەوەشدا گرنگی بە دروستكردنی قوتابخانەو نۆژەنكردنەوەیان دەدات، هەروەها ئاماژەی بەوەدا: دەزگای خێرخوازیی بارزانی بەهاوكاری خێرخواز حاجی حەسەن قوتابخانەیەكی بنەرەتی لە گوندی پلینگانەی سەر بە شارەدێی قوشتەپە لەسنوری پارێزگای هەولێر دروستكرد. هاوكات بەپێی پرۆژەیەكی تری هاوبەشی دەزگای خێرخوازیی بارزانی لەگەڵ دەوڵەتی كوێت ئەمساڵ 20 هەزار جانتا پەڕاو و پێداویستی خوێندن دابەش دەكات و پرۆسەكە دەستی پێكردوەو سەرجەم قوتابیانی ئاوارە لە كەمپەكان و دەرەوەی كەمپەكان دەگرێتەوە.
قوتابیانی ناوخۆی كوردستان
وەك ئاشكرا دەزگای خێرخوازیی بارزانی بەردەوامە لە هاوكاریكردنی قوتابیانی ئەو ناوچانەی كە ئاستی بژێوی ژیانیان نزمە، جێگری سەرۆكی دەزگای خێرخوازیی بارزانی لەبارەی هاوكاریكردنی قوتابیانی ناوخۆی كوردستان لەمساڵی خوێندندا دەڵێت: دەزگای خێرخوازیی بارزانی كۆمەك و هاوكارییەكانی پێشكەشی قوتابیان و قوتابخانەكان كردووە و لە بواری پەروەردەدا بەردەوام خزمەتی ئەو كەسانەی كردووە كە پێویستیان بە هاوكاری هەیە، ساڵانە جانتا، دەفتەر، قەڵەم و پێداویستی خوێندن بەسەر قوتابیانی شارەكانی هەرێمی كوردستاندا دابەشكردوە، راشیگەیاند: چالاكیەكانمان لەو بوارەدا بەردەوامەو دەستی هاوكاری دەگەیەنینە سەرجەم شارو ناوچە كوردستانیەكان، بۆ نموونە هەفتەی رابردوو جانتا و پێداویستی خوێندن بەسەر ٥٠٠ قوتابی قەرەتەپە و جەبارە دابەشكرد، هەروەها دەزگای خێرخوازیی بارزانی لە شارۆچكەی ئامێدی هاوكاری ٢٠ بەشەناوخۆیی كرد و كە لەو چوارچێوەیەدا ٤٥٠ پارسێلی خۆراك بەسەر ١٤٠ قوتابی زانكۆ و پەیمانگاكاندا دابەشكرا.
پێداویستی منداڵانی ئاوارە
پاش ئەو شەپۆلە زۆرەی هاتنی ئاوارەكانی شاری موسڵ و ناوچەكانی دەوروبەری، ژمارەیەكی زۆر منداڵ رووبەڕووی قەیرانی كەمی شیرو پێداویستیەكانی تر بونەوە، دەزگای خێرخوازیی بارزانی رۆژانە لەپێشوازیی ئاوارەكاندایە و پێداویستی و خواردنی گەرم و شتومەكیان بەسەردا دابەش دەكات، بۆ منداڵانی شیرەخۆرەش هەوڵی جدیداوە لەگەڵ رێكخراو كەسایەتیە خێرخوازییەكانی كوردستان پێداویستی منداڵان دابین بكات، لەو میانەشدا موسا ئەحمەد جێگری سەرۆكی دەزگای خێرخوازیی بارزانی رایگەیاند: دەزگای خێرخوازیی بارزانی هاوكاری شیر و پێداویستی منداڵانی بەسەر كەمپەكاندا دابەش دەكات، بۆ نمونە، ٣٥٠٠ منداڵ لە كەمپەكانی ''خازر، حەسەن شام و زیلیكان'' هاوكاری كران، منداڵان قوربانی سەرەكی شەر و ئاڵۆزییەكانن و ژمارەی منداڵان لە كەمپەكانی ئاوارەكان زۆر زۆرە و رۆژانە روو لە زیادبوونە هەر بۆیە دەزگای خێرخوازیی بارزانی بەهاوكاری لەگەڵ كۆمەڵێك كۆمپانیا و كەسانی خێرخواز هاوكاری بەسەر مندالاندا دابەشدەكات.
هاتنی وەرزی سەرماو سۆڵە
لەگەڵ نزیكبوونەوەی وەرزی زستان، ئاوارەكان پێویستیان بە جلوبەرگ و ناوماڵە هەیە، لەگەڵ گەرمكەرەوەو نەوت و دەیان پێداویستی تر، لەو بارەیەوە موسا ئەحمەد رایگەیاند: دەزگای خێرخوازیی بارزانی نەوت و پێداویستییەكانی گەرمكەرەوەی بەسەر سەرجەم دانیشتوانی هەر پێنج كەمپەكەی ''دیبگە، خازر، حەسەنشام، نێرگزلی و زلیكان'' دەكات و پرۆسەكەش بەردەوام دەبێت تاوەكو سەرجەم خێزانە ئاوارەكان سودمەند دەبن، هەروەها ئاماژەی بەوەدا: بە هاوكاری لەگەڵ UNHCR نەوت و گەرمكەرەوە پێشكەشی زیاتر لە ١٤٠٠ خێزانی كەمپی دیبەگەكرا هەروەها لە كەمپی خازر ٥٠٠٠ خێزان جل و بەرگ و پێداویستی زستانەیان وەرگرتووە و ٤١٢٨ خێزانی ئاوارە خواردن و پەناگە و پێداویستی ناوماڵیان پێشكەش كراوە.
چیای شەنگال
دەزگای خێرخوازیی بارزانی بە بەردەوامی هاوكاری خێزانە ئاوارەكانی چیای شەنگال دەكات و بەردەوام هاوكاریەكانی دەزگای خێرخوازیی بارزانی لە خۆراكی گەرمەوە هەتا پێداویستییە سەرەتاییەكانی ژیان پێشكەشی ئاوارەكانی موسڵ لەناو كەمپەكان دەكات، هەر لەدرێژەی هاوكاریكردنی ئاوارەكانی سەر چیا كە ١٨٧٠ خێزانی چیای شەنگال بەشەخۆراكیان بەسەردا دابەشكراوە كە بەشێوەی مانگانە دابەش دەكرێت.
گرنگیدان بە كەرتی تەندروستی
بەمەبەستی چارەسەرو پشكنینی ئەو ئاوارانەی كە پێویستیان بەچارەسەری تەندروستی و دەرمان هەیە، دەزگای خێرخوازیی بارزانی بەهاوكاری لەگەڵ دەوڵەتی كوێت دوو بنكەی تەندروستی لە هەردوو كەمپی خازر و حەسەن شام لەسنوری پارێزگای موسڵ دەكەنەوه، لەو میانەدا موسا ئەحمەد ئاماژەی بەوەدا: كردنەوەی ئەم دوو بنكەیە كارئاسانی و بارگرانییەكی زۆر لەسەر نەخۆشخانەو بنكەكانی ناو شاری هەولێر كەمتر دەكاتەوەو ئاوارەكان لەڕێگەیەوە دەتوانن پشكنین و چارەسەرە سەرەتاییەكان وەربگرن، هەروەها ئەو بارگرانیەش كە لەسەر نەخۆشخانەكانی هەولێر هەیە كەمتر دەبێتەوە، هەروەها راشیگەیاند: گلەیی زۆرمان لە حكومەتی ناوەندی عێراقیش هەیە كە زۆر كەمتەرخەمن لە گەیاندنی هاوكارییە سەرەتاییەكان بۆ ئاوارەكان، لەڕووی پێداویستیە خۆراكی و تەندروستیەكانەوە كەمپەكانیان ئیهمال كردوە و پێویستە حكومەتی عێراق زیاتر بێنە سەر خەت بۆ چارەسەركردنی كێشەو گیروگرفتی ئاوارەكان.

 
چاپکردن   Share گه‌ڕانه‌وه‌