بەڕاستی سەیرە بۆ ئێمەو مانانێ، كە زەمانێك، دەروێش ئاسا، پشتیوانی بێ چەند و چۆنی وڵاتانی شۆڕشگێڕی وەك ڕووسیا و چین-مان دەكرد. هەش بوون ئەو دوو وڵاتەیان بە لوتكەی شۆڕشگێڕی لە قەڵەم دەدا و تێزەكانیان وەك ئایەتی قورئان سەیر دەكرد و تێكڕای وڵاتانی دیموكراتی و پەرلەمانییان بەكۆنە پەرست و زاڵم- ئەوسا پێیان دەووت ئیستعمار!- دادەناو دیموكراتیخوازیشیان بەخوردە بورجوازی وێنادەكرد.
كەچی ئەمڕۆ هەر ئەو دوو وڵاتە بەپێچەوانەی هەموو بیروبۆچوونەكانی خۆیانەوە ڕەفتار و هەڵوێست دەنوێنن و زۆر بەڕاشكاوانە و بێ پەردە داكۆكی لە دیكتارتۆریەت دەكەن. سەیری سوریا، ئەوە زیاد لەشانزە مانگە، ڕژێمی ئەسەدی كوڕ، بەئاگرو ئاسن بەرەنگاری گەلانی سوریا بۆتەوەو ڕۆژانە سەدان و بگرە زیاتریشیان لێ دەكوژێ و خانوو ماڵیان بەسەردا دادەتەپێنێ و هەزارانیش دەربەدەر دەكات، كەچی ئەم دوو وڵاتە نەك هەر بێدەنگ نین لەسەر ئەو كوشتارە دەستەجەمعی یە، بەڵكو پشتیوانی ئەو ڕژێمە دیكتاتۆری یە دەكەن و بەهیچ شێوەیەك ناهێڵن بڕیارێك لەئەنجوومەنی ئاسایش بەسوودی خەڵكی ڕاپەڕی و شۆڕشگێڕی سوریادا دەربچێ، كەدەبوو بەپێی ئەو مێژووەی خۆیان، پێشەنگی پشتیوانانی گەلانی سووریا بوونایە.
ئەوەتا ڕووسیا و چین، بۆ جاری سێهەم لەئەنجوومەنی ئاسایش لە ڕۆژی 5 شەمەی پێشوودا دژی بڕیارێك بوون كە هەڕەشەی سزا لە حكوومەتی سوریا دەكات.
بەداخەوە ئەوانەی ڕۆژانێك قەڵای پشتیوانی گەلان بوون و شۆڕشگێڕییان بەسەر گەلاندا پەخش دەكرد، ئەوانن ئەمڕۆ، داكۆكی لە دیكتاتۆرییەت دەكەن. من لەبەرژەوەندی ئابووری ئەو ولاتانە دەگەم. بەڵام تا ئەو ڕادەیە چاوپۆشین لە گەرماوی خوێن هیچ پاساوێكی بۆ نابینم.
