| دكتۆری زمانزان |
2012-07-14 |
 |
|
|
سەلام عەبدوڵڵا
لەبەردەم دەرگای دكتۆردا- وەك ئەوانی تر- راوەستابووم، منیش چاوەڕێی سەرەی چوونە ژوورەرەك دەكرد. زیاتر ئالۆزی خوێندنەوەی پلاكاتی سەردیوارەكان بووم: كە زۆریان باسی نەخۆشی مەلاریا و تەراخوما و زەردوویی و. شتی لەوبابەتانەیان دەكرد- كەكابرای فەڕاش، ئیشارەتی بۆكردم و دەرگای دكتۆری بۆ خستمە سەرپشت. هەرچۆنێك بوو لەو قەلەباڵغیەدا پاش پاڵە پەستۆ و راكێشانی كوڵوانە و كراس و جامان، خۆم خزانە ژوورەوە. ماوەیەك بێ وورتە، لەژوورەكەدا رەق ڕاوەستام. ئەوی راستی بێ نەم ئەویس جیهانی تایبەتی دكتۆر و خەو و خەیال و زەوق و خۆشی، ئاوا بەناكاوێك، تێك دەم. دكتۆر هەر خەریكی رادیۆ بچكۆلەكەی بوو كە لە ناكاوێكدا سەری هەڵبڕی و بەسەرسوڕمانێكەوە، وەك تازە هەستی بەبوونم لەڕوورەكەیدا كردبی، ووتی: ((فەرموو)) رادیۆكەی كوژاندەوە پاڵی دایەوە و بە دەستی چەپی قڕی سەر چاوی هەڵدایەوە، هەناسەیەكی قوڵی هەڵكێشاو یەكسەر ووتی:
(( فەرموو. نەخۆشیەكەتان چیە؟)) دەستی دایە پاندانێكی سەر زیوین و پەرەیەكی بچكۆلەشی راكێشا، سەیرێكی قوڵی كردم، دیار بوو چاوەڕێی ئەوە بوو نەخۆشیەكەمی پێ بڵێم، بەڵام من هەر رەق راوەستابووم، خەریك بوو پێ بڵێم، بەڵام من هەر رەق راوەستابووم، خەریك بوو پێی بڵێم: دكتۆر ئەگەر بەزانیایە نەخۆشیەكەم چیە، رەنگ بوو نەهاتنایە، بەڵام لەدڵی خۆمدا ووتم: با لەوەتەری حەساسی كەیف و زەوقی ئەو بەیانیە زووەی نەدەم، و لەباتی ووتم: ((دكتۆر لەوە ئەچێ نەم ناسی؟؟؟..)) دكتۆر زیاتر سەری سورما، بەڵام زۆر بەڕێزەوە، كە زیاتر لەگاڵتەیی كردنیش ئەچوو ووتی: ((نەخێر قوربان. كێن جەنابتان؟)) دكتۆر راستی ئەكرد، چونكە منیش چەند رۆژێ بوو نەقڵی دێی(س) كرابووم. دەی (س) كە ئەكەوێتە نزیك شاری سلێمانییەوە لە ناو دێیەكانی تری ناوچەكەدا بەوە ناسرابوو، كەسێ شتی گرنگی تێدایە سەربازگەیەكی یەكجار گەورە كە ئەیڕوانی بەسەر دێیەكەدا، خستەخانەیەكی بچكۆڵە ـ كە دیاردەیەكی یەكجار نائاساییە لە دێیەكەدا ـ و قوتابخانەیەكی بچووكتریش. دكتۆر هەر چاوەڕێی منی دەركرد كە شتێ بڵێم، بۆیە منیش هەر وەك عزور هێنانەوەیەك پێمووت. ((ببورن دكتۆر، بەراستی هەڵەی خۆمە كەوا بۆ سێ رۆژ ئەبێ، نەقڵی قوتابخانەی دێ بووم و نەهاتووم خۆمت پێ بناسێنم..؟)) پاشان خۆم پێشكەكەش كرد. بە تەواوی باسی خۆمم بۆ كرد، ئەو شوێنانەی لەوەو پێش لێی بوو، تا دەگاتە عەلاوەو مەعلش و غائیبی و هەندێ شتی عەجایەب تریش، لە موفەتیش!! هەر بە پێوە راوەستابووم كە دكتۆر- نازانم چوون؟ هەستی پێ كردو فەرمووی دانیشتنی لێ كردم. دكتۆر- لە ڕاستیدا هەڵەشە بڵێم دكتۆر، چونكە ئەوانەی كە ئەنێردرێن بۆ دێ و شارۆچكەكانمان، لەبرین پێچ زیاتر تێپەڕناكەن دەستی كرد بە باسكردنی خۆی كە لە بنەڕەتدا خەڵكی بەغدایەو قوتابخانەیەكی بچوكتر لە پزیشكی تەواو كردووە ((هەر ڕووی نەهات بڵێ برین پێچم))، پاشان لەسەر داواكردنی خۆی و پێشنیاری هاوڕێیانی سەروتری نەقلی ناوچەی ژورو كراوە. دیاربوو دكتۆر زۆر كەیفی بەباسكردنی خۆی دەهات بەتایبەتی كەزانی عەرەبیەكەم شەق و شرە، هەر ئەوەشی وەك، كەموكوڕیەك لەسەر حساب كردم. دكتۆر زۆر قسەی تری كرد تا گەیشتە ئەوەی بە فیزیكەوە بڵێ: ((بەڕاستی بۆ ئەڵمانیا دەچم و لەسەر خوێندنەكەم بەردەوام دەبم....)) زۆر بە پەلە وتاسوقەوە لە دكتۆرم پرسی: ((بۆ لەمەوپێش لە ئەڵمانیاخوێندوتە؟؟)) دكتۆر تەواو خۆی گیف كردەوەو سنگی لێ دەرپەڕاند و زەردەخەنەیەكی گەورەی گرت و گوتی: (ئەی چۆن!) یەكسەر منیش بیرم كەوتەوەو لە دڵی خۆمدا گووتم: ((بۆچی بە دكتۆر نەڵێم نامەیەكم بە ئەڵمانی بۆ بنوسێ، بە برادەرێكم كە چەند مانگێك لەوەوە پێش لە ئەڵمانیا بەجێم هێشتبوو..)) دكتۆر كەوتە باسی ئەڵمانیاو قەشەنگی شارەكانی و جوانی كچە قژ زەردو چاوشینەكانی. هەربۆیە منیش تۆزی بە شەرمەوە پێم گووت: ((دكتۆر ئەگەر نامەیەك بۆ برادەرێكم لە ئەڵمانیا بنووسم، تۆ بۆم ئەگۆڕیتەوە سەر زمانی ئەڵمانی؟)) دكتۆر بێ سێ و دوو وتی: ((ئەی چۆن!)) پاشان دكتۆر هەندێ گەچی سپی (حەب؟) بۆ نووسیم و لە خوا حافیز لێ كردندا پێی گووتم: ((ئەو حەبانەش بخۆ، بۆ سەرما باشە، بیرت نەچێ سبەینێ نامەكەت لەگەڵ خۆتدا بهێنی)) زۆر دڵشاد و بەختەوەربووم. هەر بە تەواو بوونی قوتابخانەو گەڕانەوەم بۆ ماڵێ، دەستبەجێ دەستم كرد بە نووسینی كاغەزێكی غەرامی بەزمانی عەرەبی، چونكە دكتۆر كوردی نە ئەزانی و هەرچی سەقافەت و مەعریفەتی عەرەبیم هەیە خستمەكار چەندین جار سەر عنوانی كاغەزەكەم گۆڕی، جارێ ئەمنووسی، عزیزتی، جارێكی تر، حبیبتی دوو دڵ بووم لەنێوان كەلیمەیەكی موناسبدا، زۆر كەلیمەی دیكەی وەكو: وردتی، المی، قلبی، حیاتی..و نازانم چی تریشم ئەنووسی و دەكوژانەو. بە هەر حاڵ لەدەمەو ئێوارەدا ووشەی »عزیزتی«م هەڵبژارد ئەو شەوەش هەر خەریكی باكووسی كاغەرەكەم بووم، هەر چۆنی بێ كاغەزەكەم دەمەو بەیانی تەواوكرد و لەگەڵ خۆمدا بردم. چەند جارێك بەدزیەوە لەناو پاسەكەدا كە بۆ قوتابخانە دەچوین خوێندمەوە. هەر بە گەیشتنم بۆ قۆتابخانە، رووخسەتم لە مودیر خواستو رووەو خەستەخانەكە چووم، فەراشەكە ئەیناسیمەوە بۆیە یەكسەر بێ قەیدو شەرت دەرگای ژووری دكتۆری بۆ خستمە سەر پشت. دكتۆر پێشوازیەكی تەواوی گەرمی لێ كردم و هەواڵی تەندروستی لێ پرسیم و منیش لە وەڵامدا ووتم: ((زۆر چاكم دكتۆر، عەلەمم تیا نییە. كاغەزەكەم بۆ هێناوی.)) دكتۆر بەسەر سورمانێكەوە گووتی: (كاغەز؟) هیچ مۆڵەتی سەر سورماندن و شتی وام نەدا، یەكسەر نامەكەم لە گیرفانم دەرهێناو بە دكتۆرم گووت: ((قوربان دوێنێ باسی ئەوەمان كرد كە نامەیەك بەعەرەبی بنوسم بۆ برادەرێكم و تۆش بیگۆریتە سەر زمانی ئەڵمانی...)) دكتۆر كەمێك شڵەژاو دەستی كەمێك كەوتە لەرزەو پاشان وەك بیری كەوتبێتەوە گووتی: (( باشە بمدەرێ..)) زۆر بە شەرمەوە كاغەزەكەم دایەو پێمووت: ((دكتۆر داوای لێ بوردنیش دەكەم، لە كەموكوڕی نامەكەم بەڕاستی عەرەبی باش نازانم)). دكتۆر قسەی نەكردو سەرێكی لە قاند، نامەكەی لە دەست وەرگرتم و كەوتە خوێندنەوەی و پاشان ووتی: ((بەسیگە!)) زۆر بەو قسەیە كەیف داربووم و سوپاسێكی - پێشەكی - بێ ئەندازەی دكتۆر كرد. لەو ماوە كورتەی خۆشم لە ئەڵمانیا بوو، هەندێ ئەڵمانی فێربوو بوو، بەڵام ئەوەندە نەبوو كە بتوانم بە تێروپڕی كاغەزێكی عیشق و غەرامی وا گەرم و گوڕی پێ دارێژم. دكتۆر دەستی كرد بە نووسینەوە لە سەرەتادا كە نووسیبووم عزیزتی یەكسەر دوو كەلیمەی لە باتی نووسی، بۆیە ملم تا توانی درێژ كرد و سەیری ئەڵمانییەكەیم كرد هیچ حاڵی نەبوو. بەڵام كە باشتر لێی وورد بوومەوە، بڕوام نەكرد ، ناوی دەرمانێكی نووسیبوو، وابزانم پانسلین پروكایین بوو! . هەرچەند وا تێكەڵ و پێكەڵ نووسیبووی كە بە هەزار حاڵ بووم دەخوێنداریەوە، هەر بۆیە خۆم رانەگرت و پەتی بیركردنەوە و نووسینی دكتۆرم قوتاند و ووتم: (( دكتۆر جا ئاوا بە سەریەكەوە بینووسی ئەخوێنرێتەوە؟)) پێكەنینێكی سەیر گوتی و بە شڵەژاویەوە ووتی: ((ئەڵمانی هەروا دەنووسرێ! من فێر نەبووم بە جیا جیا بینووسم!)) لە دێری دووەم و سێیەمدا كە من باسی خۆشەویستی دووری و خەم و خەفەتم كردبوو ئەو ناوی كۆمەڵێ دەرمانی تری نووسی! بە كورتی لە جیاتی هەر دێرێ ناوی چەند دەرمانێكی دەنووسی . بوو ناونە: دەرمانی سەرێشەی دەنووسی، لە جیاتی دووری ! و دەرمانی سك ئێشە! لە جیاتی هەستی گەرمی و خۆشەویستی !! كەلیمەی عیشق و ئەقین بوو ! بە ستروپتومایسین! گریەو ناڵیس بوو بە حەبی كالیمین!! جاروباریش دكتۆر سەری هەڵئەبڕی و سەیری ئەم لاو ئەولاوی خۆی دەكرد، دیاربوو عەودالی ناوی هەندێ دەرمانی تر بوو تۆماری بكات. هەر چۆنێك بوو كاغەزەكەی (بۆ گۆڕیم!) بەڵام نەك بۆ ئەڵمانی، بەڵكو بۆ ناوی داوو دەرمان و شرینقە و سرینج و لەفاف و مقەست و دەرزی و شتی وا ! دكتۆر تەواو سەرگەرمی گۆڕینەكەی بوو، كە بەیانی تێم ڕووانی دلویی عارەقی ناوچەوانی بەباشی بەدی دەكرا، دەستی ئەلەرزی ، قژە ڕەشە خاوەكەی بەسەر ناوچەوانیا تلیسابووە و و بریقەی ئەدایەوە- نازانم هی عارەق بوو ، یان روونی لێ دابوو، یان تەری شڵەژان بوو - و جار و بار بە دەستی چەپی بەپەلە هەڵی دەدایەوە. لە كۆتایی نامەكەدا، سەری بەرزكردەوە و بێ ئەوەی سەیرم بكات ووتی: ((فەرموو ئیمزای بكە!)) خەریك بوو منیش- لەپەستیدا- لەجیاتی ئیمزا بنووسم »دی. دی. تی« یان شتی لەو بابەتە، بەڵام ووتم نا. با دكتۆر لە خەیاڵ و زەوق و شڵەژان نەدەم، بۆیە بەرێكوپێكی ناوی خۆم لە سەرنامەكە نووسی و سوپاسێكی گەرم و گوڕی دكتۆرم كرد. دكتۆر دیاربوو ئەیویست بەهەر شێوەیەك بێت لەو هەڵوێستە رزگاری بێ بۆیە گووتی: ((مامۆستا بەڕووخسەتی بەڕێزتان. نەخۆشی تر هەیە..)) منیش لە وەڵامدا گووتم: ((بێگومان منیش دەچمەوە قوتابخانەو دەرسم هەیە.)) كە هاتمە دەرەوە جارێكی تر بە نامەكەدا (نامە؟) چوومەوە و ناوی دەرمانەكانم- ئەوی دەزانی- خوێندەوەو دامە قاقای پێكەنین و لەبەر خۆمەوە گووتم: ((لە دوێنێ نیوەڕۆوە خەریكی نامەم بە عەرەبی بینووسم و ئێستا هەر عەینی نامەیەو بووە بەرەچەتە!)) رۆژی دوایی ویستم سەری دكتۆر بدەم، فەراشەكەی پێی گووتم: ((ئیجازەی وەرگرتووەو گەڕاوەتەوە بۆ بەغدا..)) كەس لەوە و پاش دكتۆری نەدیەوە، لەوە دەچوو داوای گواستنەوەی كردبێ، یان: ((رەنگە بۆ تەواوكردنی خوێندنەكەی لەسەر داخوازی »هاورێیانی سەروتر« بەرەو ئەڵمانیا چووبێ!!)) |
| |
|
|
|
_60x60.jpg)